ວັນທີ 9 ມີນາ 2021 ແຂວງສາລະວັນ ໄດ້ເລີ່ມສັກວັກຊິນປ້ອງກັນພະຍາດໂຄວິດ-19 ຮອບທີ 1 ໂດຍຈັດຂຶ້ນຢູ່ທີ່ໂຮງໝໍແຂວງສາລະວັນ, ເຊີ່ງໄດ້ສັກໃຫ້ພະນັກງານການນຳຂັ້ນແຂວງ, ພະນັກງານແພດໝໍ ແລະ ເຈົ້າໜ້າທີ່ໆເຮັດວຽກທີ່ມີຄວາມສຽງຈາກການພົວພັນກັບສັງຄົມຕາມຈຸດຕ່າງໆ ແລະ ຮອບຕໍ່ໄປ ຈະໄດ້ສັກໃນວັນທີ 5-10 ເມສາ 2021 ຕາມເປົ້າໝາຍ ແລະ ປະຊາຊົນ ທີ່ມີຄວາມສ່ຽງ.

ທ່ານ ດຣ ອາຄົມ ລ່ຳວິຈິດ ກຳມະການພັກແຂວງ ຮັກສາການຫົວໜ້າພະແນກສາທາລະນະສຸກແຂວງ ກ່າວວ່າ: ພາຍຫຼັງໄດ້ຮັບການແບ່ງປັນວັກຊິນ ຈາກລັດຖະບານ ກໍ່ຄືກະຊວງສາທາລະນະສຸກ ຈຳນວນ 9.600 ໂດສ ແລະ ໄດ້ເລີ່ມ ສັກວັກຊິນ ໃຫ້ກັບກຸ່ມເປົ້າໝາຍທີ່ມີຄວາມສ່ຽງ ຄືຶ: ພະນັກງານແພດໝໍ, ພະນັກງານທີ່ປະຕິບັດໜ້າທີ່ຕາມຈຸດຜ່ານແດນສາກົນຕ່າງໆ ແລະ ກຸ່ມຄົນທີ່ເຮັດວຽກຢູ່ສູນຈຳກັດບໍລິເວນ, ປະຊາຊົນ ທີ່ຢູ່ໃນກຸ່ມສ່ຽງຕ່າງໆ ໂດຍການສັກວັກຊິນແມ່ນຈະໄດ້ປະຕິບັດ 2 ໄລຍະຄື: ຮອບທີ 1 ຈະສັກທັງໝົດ 9.600 ໂດສ ນັບແຕ່ວັນທີ 9-15 ມີນາ 2021 ແລະ ຮອບທີ 2 ຈະສັກຕື່ມໃນວັນທີ 5-10 ເມສາ 2021.

ພ້ອມນີ້ຍັງໄດ້ແຈກຢາຍວັກຊິນດັ່ງກ່າວແລ້ວ ໃຫ້ບັນດາເມືອງ 7 ເມືອງໃນທົ່ວແຂວງ ຈຳນວນເມືອງລະ 1 ພັນກວ່າໂດສ ເຊັ່ນ: ເມືອງເລົ່າງາມ, ວາປີ, ຄົງເຊໂດນ, ລະຄອນເພັງ, ຕຸ້ມລານ, ຕະໂອ້ຍ ແລະ ເມືອງສະໝ້ວຍ. ສ່ວນ ເມືອງສາລະວັນ, ພະແນກການ, ອົງການທຽບເທົ່າຕ່າງໆອ້ອມຂ້າງແຂວງ ໂຮງຮຽນພາຍໃນເທສະບານແຂວງ ແມ່ນໄດ້ກຳນົດເອົາ ໂຮງໝໍແຂວງສາລະວັນ ເປັນບ່ອນສັກວັກຊິນ.

ຂ່າວ-ພາບ: ວິໄລວອນ ສິດທິໄຊ