ມີເດຍລາວແຂວງຄຳມ່ວນ ຂະບວນການສັກວັກຊິນກັນພະຍາດໂຄວິດ-19 ຮອບທີ 1 ໃຫ້ກຸ່ມເປົ້າໝາຍທີ່ມີຄວາມສ່ຽງ ຂອງແຂວງຄຳມ່ວນ ຈັດຂຶ້ນໃນວັນທີ 10 ມີນາ 2021 ໂດຍການເປັນກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີທ່ານ ດຣ ພາສຸກ ຄໍາມະນີທອງ ຮອງຫົວໜ້າພະແນກສາທາລະນະສຸກແຂວງ ທັງເປັນຫົວໜ້າກອງເລຂາສະເພາະກິດຄວບຄຸມ ແລະ ສະກັດກັ້ນພະຍາດໂຄວິດ-19 ແຂວງຄໍາມ່ວນ, ມີອໍານວຍການໂຮງໝໍແຂວງ, ພະນັກງານແພດ-ໝໍ ພ້ອມດ້ວຍພະນັກງານ-ວິຊາການໃນກຸ່ມເປົ້າໝາຍເຂົ້າຮ່ວມ.

ທ່ານ ດຣ ນາງ ພາສຸກ ຄຳມະນີທອງ ຮອງຫົວຫນ້າພະແນກສາທາລະນະສຸກ ທັງເປັນຫົວໜ້າກອງເລຂາສະເພາະກິດຄວບຄຸມ ແລະ ສະກັດກັ້ນພະຍາດໂຄວິດ-19 ແຂວງຄໍາມ່ວນ ໄດ້ກ່າວວ່າ: ແຂວງຄໍາມ່ວນ ໄດ້ຮັບວັກຊີນ ເພື່ອສ້າງພູມຄຸ້ມກັນຕ້ານການຕິດເຊື້ອພະຍາດ ໂຄວິດ-19 ຈຳນວນ 13.600 ໂດສ, ສາມາດສັກໄດ້ທັງໝົດ 6.800 ຄົນ ເຊິ່ງໃນຊຸດທໍາອິດແມ່ນຈະເລີ່ມສັກໃຫ້ແກ່ 03 ກຸ່ມເປົ້າໝາຍທີ່ມີຄວາມສ່ຽງສູງຕໍ່ການຕິດເຊື້ອເປັນຕົ້ນແມ່ນ: ບັນດາເຈົ້າໜ້າທີ່ ແລະ ພະນັກງານທີ່ປະຈຳຢູ່ແຕ່ລະດ່ານ, ພະນັກງານທີ່ປະຕິບັດໜ້າທີ່ຢູ່ບັນດາສູນກັກກັນ ແລະ ພະນັກງານ ແພດ-ໝໍ ທີ່ເຮັດໜ້າທີ່ປິ່ນປົວທີ່ໄດ້ສຳພັດກັບຄົນເຈັບ. ເຊິ່ງໃນການສັກວັກຊີນດັ່ງກ່າວ ໃນແຕ່ລະຄົນ ແມ່ນຈະໄດ້ສັກຈໍານວນ 02 ເຂັມ ເຊິ່ງການສັກເຂັມທີ 02 ແມ່ນມີໄລຍະຫ່າງ 28 ວັນ ນັບແຕ່ມື້ທີ່ໄດ້ຮັບການສັກເຂັມທຳອິດ. ສໍາລັບແຂວງຄໍາມ່ວນແມ່ນໄດ້ເລີ່ມສັກວັກຊີນໃຫ້ແກ່ 03 ກຸ່ມເປົ້າໝາຍດັ່ງກ່າວ ເຂັມທີ 01 ໃນວັນທີ 10 ມີນາ 2021 ແລະ ເຂັມທີ 02 ຈະໄດ້ເລີ່ມສັກໃນຕົ້ນເດືອນເມສາ. ສໍາລັບຜູ້ທີ່ຈະສັກວັນຊີນແມ່ນຈະຕ້ອງຈະຕ້ອງມີຄວາມພ້ອມທາງດ້ານຮ່າງກາຍ ແລະ ໄດ້ຜ່ານການກັ່ນກອງຈາກເຈົ້າໜ້າທີ່ແພດ-ໝໍຢ່າງລະອຽດ ແລະ ພາຍຫຼັງສັກແລ້ວກໍ່ຕ້ອງປະຕິບັດຕາມຄຳແນະນຳຂອງແພດ-ໝໍ. ສໍາລັບພະນັກງານ, ທະຫານ, ຕໍາຫຼວດ ແລະ ພໍ່ແມ່ປະຊາຊົນທົ່ວໄປ ແມ່ນຈະໄດ້ຮັບການສັກວັກຊີນໃນເປົ້າໝາຍຕໍ່ໄປ.