ມິເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ ພະແນກແຜນການ ແລະ ການລົງທຶນ ແຂວງໄຊສົມບູນ ຈັດກອງປະຊຸມສະຫລຸບປະຈຳປີ 2020 ແລະ ທິດທາງແຜນການ ປີ 2021
ກອງປະຊຸມສະຫລຸບປະຈຳປີ 2020 ແລະ ທິດທາງແຜນການ ປີ 2021 ຂອງພະແນກແຜນການ ແລະ ການລົງທຶນ ແຂວງໄຊສົມບູນ ໄລ້ຈັດຂຶ້ນໃນຕອນເຊົ້າຂອງວັນທີ 12 ມີນາ ນີ້ ທີສະໂມສອນເມືອງອະນຸວົງ ໂດຍການເຂົ້າຮ່ວມຂອງທ່ານ ປອ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ສຸກສະຫວາດ ວົງພູມເຫລັກ ຮອງເຈົ້າແຂວງໄຊສົມບູນ, ມີທິມງານຈາກກະຊວງແຜນການ ແລະ ການລົງທຶນ, ພະແນກການ, ອົງການ, ກົມກອງ ອ້ອມຂ້າງແຂວງ ແລະ ຫ້ອງການແຜນການ 5 ເມືອງ ພ້ອມດ້ວຍນັກທຸລະກິດປະກອບການ ເຂົ້າຮ່ວມ.

ໂອກາດນີ້ ທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນ ແຂວງໄຊສົມບູນ ໄດ້ຜ່ານບົດສະຫລຸບ ປະຈຳປີ 2020 ແລະ ທິດທາງແຜນການ ປີ 2021 ຕະຫລອດໄລຍະ 1 ປີຜ່ານມາ ສາມາດຍາດໄດ້ຜົນສຳເລັດວຽກງານທີ່ພົນເດັ່ນຫລາຍດ້ານ ເປັນຕົ້ນ ອັດຕາການເຕີບໂຕເສດຖະກິດ ຢູ່ໃນລະດັບ 5%, ລວມຍອດຜະລິດຕະພັນພາຍໃນ (GDP) ບັນລຸໄດ້ 1.097,63 ຕື້ກີບ, ສະເລ່ຍໃສ່ຫົວຄົນບັນລຸໄດ້11,38 ລ້ານກີບ/ຄົນ/ປີ, ສາມາດເກັບລາຍຮັບບັນລຸໄດ້ 375,38 ຕື້ກີບ ເທົ່າກັບ 117,10% ຂອງແຜນການ, ໄດ້ເອົາໃຈໃສ່ຄຸ້ມຄອງການປະຕິບັດຈ່າຍງົບປະມານໄດ້ 313,46 ຕື້ກີບ ເທົ່າກັບ 97,26% ຂອງແຜນການ, ທຽບໃສ່ປີ 2019ຫລຸດລົງ3,77 ຕື້ກີບ, ແຂວງມີລາຍຮັບເກີນດູນ 54,80 ຕື້ກີບ, ສາມາດສ້າງມູນຄ່າໃນການຜະລິດອຸດສາຫະກຳປຸງແຕ່ງ ແລະ ຫັດຖະກຳ ( ບໍ່ລວມແຮ່ທາດ) ບັນລຸໄດ້ 34,57 ຕື້ກີບ ເທົ່າກັບ 151,19% ຂອງແຜນການປີ, ມູນຄ່າການນຳເຂົ້າ ແລະ ສົ່ງອອກ ບັນລຸໄດ້ 96.652 ໂດລາສະຫະລັດ ເທົ່າກັບ 19,33% ຂອງແຜນການປີ, ຈຳໜ່າຍກະແສໄຟຟ້າ ບັນລຸໄດ້ 37,65 ລ້ານໂດລາ, ບໍລິສັດພູເບ້ຍມາຍນິງ (ບໍ່ພູຄຳ) ສາມາດຂຸດຄົ້ນໄດ້ 7,15 ລ້ານໂຕນ ເທົ່າກັບ 110%, ບໍ່ຫ້ວຍຊາຍ ຂຸດຄົ້ນໄດ້ 2,70 ລ້ານໂຕນ ເທົ່າກັບ 123%ຂອງແຜນການປີ, ມູນຄ່າຈໍລະຈອນສິນຄ້າ ບັນລຸໄດ້ 158,22 ຕື້ກີບ ນອກນີ້ ຍັງສຳເລັດໜ້າວຽກ 100% ແລະ ມອບຮັບໂຄງການກໍ່ສ້າງເສັ້ນທາງປູຢາງ 2 ຊັ້ນ ແຕ່ຂົວນຳ້ຍອນ ຫາບ້ານລ້ອງແຈ້ງ, ໂຄງການກໍ່ສ້າງທາງປູຢາງ ແລະ ປູແຮ່ ແຕ່ບ້ານຜາສະຫງົບ ຫາບ້ານວຽງທອງ ແລະ ໄດ້ສຳເລັດການກໍ່ສ້າງ ແລະ ມອບຮັບລະບົບນຳປະປາບ້ານອອມເມືອງອະນຸວົງ

ພ້ອມນີ້ ກໍສາມາດເກັບກ່ຽວເຂົ້າໃນເນື້ອທີ່ 11.389,43 ເຮັກຕ່າ, ຜົນຜະລິດໄດ້ 36.923,17 ໂຕນ ເທົ່າກັບ 92,58% ຂອງແຜນການການປີ ທົ່ວແຂວງມີສັດລ້ຽງທັງໝົດ 382.021 ໂຕ, ດ້ານການລົງທຶນຂອງລັດ ມີທັງໝົດ 183 ໂຄງການ, ມູນຄ່າ3.969,18 ຕື້ກີບ ແລະ ໄດ້ຮັບການທຶນອະນຸມັດທັງໝົດ 151,90 ຕື້ກີບ, ການລົງທຶນເອກະຊົນສາມາດຊຸກຍູ້ ແລະ ດຶງດູດການລົງທຶນເອກະຊົນ ລວມມີ 14 ໂຄງການ, ສາມາດຍາດແຍ່ງບັນດາໂຄງການຊ່ວຍເຫລືອທາງການ ເພື່ອພັດທະນາ 8 ໂຄງການ ສາມາດລຶບລ້າງຄອບຄົວທຸກຍາກ ໃຊ້ໄດ້ 842 ຄອບຄົວ, ລຶບລ້າງບ້ານທຸກຍາກໃຫ້ໄດ້ 7 ບ້ານ, ສ້າງຄອບຄົວຕົວແບບດ້ານກະສິກຳ ໃຫ້ໄດ້ 100 ຄອບຄົວ, ສ້າງຄອບຄົວພັດທະນາ ໃຫ້ໄດ້ 1.073 ຄອບຄົວ, ສ້າງບ້ານພັດທະນາໃຫ້ໄດ້ 3 ບ້ານ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ໃຫ້ໄດ້ 1 ແຫ່ງ ສ່ວນວຽກງານດ້ານອື່ນໆກໍ່ໄດ້ມີການຈັດຕັ້ງປະຕິບັດ ແລະ ມີຜົນສຳເລັດ. ຈາກນັ້ນ ທ່ານຮອງລັດຖມົນຕີ ແລະ ທ່ານຮອງເຈົ້າແຂວງ ໄດ້ຜັດປ່ຽນກັນມີຄຳເຫັນ ແລະ ຄຳຖາມເຈາະຈີ້ມ ໂດຍສະເພາະແມ່ນການຈັດຕັ້ງປະຕິບັດໂຄງການລົງທຶນຂອງລັດ ເພື່ອໃຫ້ດຳເນີນໄປຢ່າງຖືກຕ້ອງ,ມີປະສິດທິພາບ, ປະສິດທິຜົນ ແລະ ປະຕິບັດສຳເລັດຕາມໄລຍະເວລາທີກຳນົດໄວ້. ພ້ອມກັນນັ້ນ ຜູ້ເຂົ້າຮ່ວມກອງປະຊຸມໄດ້ຜັດປ່ຍນກັນປະກອບຄຳເຫັນ ດ້ວຍຄວາມຮັບຜິດຊອບສູງ.