ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ ກອງປະຊຸມ ທັດສະນະແລກປ່ຽນບົດຮຽນວຽກງານນໍ້າປະປາ ຂອງບັນດາແຂວງພາກກາງ ໃນນັ້ນ ມີແຂວງໄຊສົມບູນ, ແຂວງບໍລິຄຳໄຊ, ແຂວງວຽງຈັນ, ແຂວງຊຽງຂວາງ, ນະຄອນຫຼວງວຽງຈັນ ກັບສະມາຄົມນໍ້າປະປາລາວ ຢູ່ແຂວງໄຊສົມບູນ ໄດ້ຈັດຂຶ້ນໃນຕອນບ່າຍຂອງວັນທີ 12 ມີນາ 2021 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງ ໂດຍການເປັນປະທານຮ່ວມຂອງທ່ານ ຄຳເຜີຍ ວົງສາຄຳຜຸຍ, ປະທານສະມາຄົມນໍ້າປະປາລາວ, ຜູ້ອຳນວຍການໃຫຍ່ລັດວິສາຫະກິດນໍ້າປະປານະຄອນຫຼວງ, ມີທ່ານ ພູໂຂງ ພົມມະໄຊສີ, ຜູ້ອຳນວຍການລັດວິສາຫະກິດນ້ຳປະປາ ແຂວງໄຊສົມບູນ ແລະ ທ່ານ ຮົວຢ່າງ ຊາວາ, ຫົວໜ້າຂະແໜງເຄຫາຜັງເມືອງ-ພະແນກໂຍທາທິການ ແລະ ຂົນສົ່ງ ແຂວງ ພ້ອມດ້ວຍຕາງໜ້າລັດວິສາຫະກິດນໍ້າປະປາ ຈາກບັນດາແຂວງພາກກາງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ ທ່ານ ພູໂຂງ ພົມມະໄຊສີ, ຜູ້ອຳນວຍການລັດວິສາຫະກິດນ້ຳປະປາ ແຂວງໄຊສົມບູນ ໄດ້ລາຍງານໂດຍຫຍໍ້ກ່ຽວກັບການເຄື່ອນໄຫວ ຮອບດ້ານ ປະຈຳປີ 2020 ແລະ ແຜນການ ປະຈຳປີ 2021. ຕະຫຼອດໄລຍະຜ່ານມາ ລັດວິສາຫະກິດນໍ້າປະປາ ແຂວງໄຊສົມບູນ ໄດ້ສຸມໃສ່ບໍລິການ ແລະ ສະໜອງນໍ້າໃຫ້ແກ່ສັງຄົມ ໄດ້ໂດຍພື້ນຖານ ພ້ອມທັງຍົກລະດັບເພີ່ມກຳລັງການຜະລິດ ແລະ ສະໜອງນໍ້າປະປາ ໄດ້ຢ່າງກວ້າງຂວາງ ພໍສົມຄວນ ຊຶ່ງມີກຳລັງການຜະລິດ 1,500 ແມັດກ້ອນ ຕໍ່ມື້, ມີຄວາມຍາວຂອງສາຍທໍ່ ທັງໝົດ 20,283 ແມັດ, ກວມເອົາພື້ນທີ່ບໍລິການ ທັງໝົດ 63,71%, ຈຳນວນໝໍ້ແທກນໍ້າ ທັງໝົດ 1,010 ໜ່ວຍ ແລະ ບໍລິມາດນໍ້າຂາຍຕໍ່ເດືອນສະເລ່ຍ 26,000-30,000 ແມັດກ້ອນ ຕໍ່ເດືອນ. ພ້ອມນີ້ ຕາງໜ້າຈາກລັດວິສາຫະກິດນໍ້າປະປາ ບັນດາແຂວງພາກກາງ ທີ່ເຂົ້າຮ່ວມ ໄດ້ຜັດປ່ຽນກັນລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນ ຂອງຕົນ ໃນໄລຍະຜ່ານມາ ຕື່ມອີກ. ຂະນະດຽວກັນ ຜູ້ແທນກອງປະຊຸມແຕ່ລະທ່ານ ໄດ້ສຸມທຸກສະຕິປັນຍາຂອງຕົນ ເຂົ້າໃນການປະກອບຄຳຄິດ-ຄຳເຫັນ ດ້ວຍຄວາມຮັບຜິດຊອບສູງ ທັງນີ້ ກໍເພື່ອພ້ອມກັນແລກປ່ຽນບົດຮຽນ ຈາກການຈັດຕັ້ງປະຕິບັດຕົວຈິງ ພາຍໃນແຂວງຂອງຕົນ ຜ່ານມາ ໂດຍເນັ້ນໜັກການຊ່ວຍເຫຼືອ ດ້ານການພັດທະນາລັດວິສາຫະກິດນໍ້າປະປາ ແຂວງໄຊສົມບູນ ເປັນບັນຫາຕົ້ນຕໍ ຊຶ່ງເປັນແຂວງ ທີ່ຍັງມີຄວາມຫຍຸ້ງຍາກຫຼາຍອັນ ໂດຍສະເພາະ ດ້ານບຸກຄະລາກອນ, ງົບປະມານ ແລະ ອື່ນໆ ທີ່ຍັງມີຄວາມຮຽກຮ້ອງຕ້ອງການໃນປັດຈຸບັນ ເພື່ອຊອກວິທີທາງປັບປຸງແກ້ໄຂບັນຫາ ດັ່ງກ່າວ ໃຫ້ໄດ້ຮັບການພັດທະນາດີຂຶ້ນ ເທື່ອລະກ້າວ.

ທັງໝົດນັ້ນ ກໍເພື່ອຍົກລະດັບທາງດ້ານປະລິມານ ແລະ ຄຸນນະພາບ ການບໍລິການນໍ້າປະປາຮັບໃຊ້ສັງຄົມ ກໍຄືການດຳເນີນທຸລະກິດນໍ້າປະປາ ເພື່ອຮັບໃຊ້ຊາວແຂວງໄຊສົມບູນ ໃຫ້ຮັບປະກັນຄວາມສະດວກສະບາຍ, ສະອາດປອດໄພ ແລະ ຈິງໃຈໃຫ້ບໍລິການຕະຫຼອດ 24 ຊົ່ວໂມງ ເພື່ອປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງໄຊສົມບູນ ຕາມແນວທາງນະໂຍບາຍຂອງພັກ-ລັດ ທີ່ວາງອອກ ໃຫ້ມີບາດກ້າວເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ.