ມີເດຍລາວແຂວງເຊກອງ ໃນວັນທີ 13 ມີນາ 2021 ຜ່ານມາ ທີ່ເດີ່ນຟຸດຊໍໂປຍຊຽນ ໄດ້ມີພິທີເປີດການແຂ່ງຂັນບານເຕະ (ຟຸດຊໍ) ມິດຕະພາບ ລະຫວ່າງ ພະແນກໄປສະນີໂທລະຄົມມະນາຄົມ ແລະການສື່ສານ (ປທສ), ລັດວິສາຫະກິດລາວໂທລະຄົມມະນາຄົມ, ລັດວິສາຫະກິດອີທີແອວ ມະຫາຊົນ ແລະບໍລິສັດສະຕາໂທລະຄົມ ສາຂາແຂວງເຊກອງ ເພື່ອເປັນການສະເຫຼີມສະຫຼອງວັນໂທລະຄົມມະນາຄົມແຫ່ງຊາດ ຄົບຮອບ 56 ປີ (13 ມີນາ 1965-13 ມີນາ 2021) ໂດຍການເຂົ້າຮ່ວມຂອງທ່ານ ສຸພັນ ສາຍເຊກອງ ຫົວໜ້າພະແນກ ປທສ ແຂວງ, ພ້ອມດ້ວຍພະນັກງານຈາກພະແນກ ປທສ ແລະລັດວິສາຫະກິດເຂົ້າຮ່ວມຢ່າງຫຼວງຫຼາຍ.

ກ່ອນການແຂ່ງຂັນກິລາ ທ່ານ ພົດສະໜາ ນິນທະນົນ ຮອງຫົວໜ້າພະແນກ ປທສ ໄດ້ເລົ່າຄືນມູນເຊື້ອປະຫວັດຄວາມເປັນມາຂອງວຽກງານໄປສະນີໂທລະຄົມມະນາຄົມໂດຍຫຍໍ້ ຊຶ່ງທ່ານໄດ້ຍົກໃຫ້ເຫັນໄລຍະເວລາແຫ່ງການເຕີບໃຫ່ຍຂະຫຍາຍຕົວຂອງລະບົບການສື່ສານຂອງລາວເຮົາ ເຊິ່ງໄລຍະທີ1 ເລີ່ມແຕ່ກ່ອນປີ 1975 ໂດຍກອງສື່ສານເປັນກໍາລັງໜຶ່ງທີ່ສໍາຄັນທີ່ຮັບໃຊ້ວຽກງານເຄື່ອນໄຫວຕໍ່ສູ້ປົດປ່ອຍຊາດ, ມາຮອດວັນທີ 13 ມີນາ 1965 ໄດ້ສ້າງຕັ້ງພະແນກໄປສະນີ ແລະໂທລະເລກຢູ່ເຂດທີ່ໝັ້ນແຂວງຫົວພັນ ໂດຍການແຍກອອກຈາກກອງສື່ສານ ແລະໄດ້ກໍານົດເອົາເປັນວັນໄປສະນີໂທລະຄົມມານາຄົມແຫ່ງຊາດ; ໄລຍະທີ2 ແຕ່ປີ 1975-1987 ພາຍຫຼັງປະເທດຊາດໄດ້ຮັບການປົດປ່ອຍ, ສູນກາງໄດ້ປັບປຸງໂຄງປະກອບການຈັດຕັ້ງ ແລະບູລະນະລະບົບໂຄງລ່າງສ່ື່ສານທີ່ມີແລ້ວ ໂດຍໄດ້ຈັດຕັ້ງກົມສື່ສານຂຶ້ນກັບກະຊວງຂົນສົ່ງ ແລະໄປສະນີ, ຈາກນັ້ນໃນປີ 1990 ໄດ້ປ່ຽນເປັນກະຊວງຄົມມະນາຄົມ, ຂົນສົ່ງ, ໄປສະນີ ແລະກໍ່ສ້າງ; ໄລຍະທີ3 ແຕ່ປີ 1987-1996 ຂະແໜງໂທລະຄົມມະນາຄົມ ໄດ້ແຍກບໍລິສັດໄປສະນີໂທລະຄົມມະນາຄົມລາວ ອອກເປັນ 2 ບໍລິສັດຄື: ບໍລິສັດລັດວິສາຫະກິດໄປສະນີລາວ ແລະລັດວິສາຫະກິດໂທລະຄົມມະນາຄົມລາວ; ໄລຍະທີ4 ໄປສະນີໂທລະຄົມມະນາຄົມໃນຂອບເຂດທົ່ວປະເທດໄດ້ມີການຂະຫຍາຍຕົວໄວ ຮອດປີ 2010 ມີຕົວເລກການນໍາໃຊ້ໂທລະສັບຕັ້ງໂຕະ ແລະມີຖື 3.366.760 ຄົນ ແລະໄລຍະທີ5 ແມ່ນໄລຍະແຫ່ງການສ້າງຕັ້ງກະຊວງໄປສະນີໂທລະຄົມມະນາຄົມ ແລະການສື່ສານ ເຊິ່ງເປັນໄລຍະແຫ່ງການພັດທະນາລະບົບເຕັກໂນໂລຊີການສື່ສານໄດ້ຂະຫຍາຍຕົວໄວ ກາຍເປັນເຕັກໂນໂລຊີຂໍ້ມູນຂ່າວສານ ຫຼື ICT ອັນເຮັດໃຫ້ການສື່ສານເພີ່ມທະວີດ້ວຍຄວາມໄວສູງຢ່າງບໍ່ມີພົມແດນ.


ຈາກນັ້ນ ກໍໄດ້ເລີ່ມແຂ່ງຂັນກິລາບານເຕະ (ຟຸດຊໍ) ເຊິ່ງມີທັງໝົດ 4 ທີມຄື: ທີມພະແນກ ປທສ, ລັດວິສາຫະກິດລາວໂທລະຄົມມະນາຄົມ, ລັດວິສາຫະກິດອີທີແອວ ມະຫາຊົນ ແລະບໍລິສັດສະຕາໂທລະຄົມ; ເປຕັງ(ຊາຍ) ມີ 4 ທີມ, ເປຕັງ(ຍິງ) ມີ 4 ທີມ; ຜົນຈາກການແຂ່ງຂັນ ຜູ້ຊະນະເລີດ ບານເຕະ ໄດ້ແກ່ທີມ ລັດວິສາຫະກິດອີທີແອວ ສາມາດເອົາຂະນະ ທີມລັດວິສາຫະກິດລາວໂທລະຄົມມະນາຄົມ ດ້ວຍການຍິງຈຸດໂທດ ຊະນະ 5 ປະຕູຕໍ່ 4; ສ່ວນເປຕັງ(ຊາຍ) ທີມຊະນະເລີດໄດ້ແກ່ທີມ ພະແນກ ປທສ ສາມາດເອົາຊະນະ ທີມລັດວິສາຫະກິດລາວໂທລະຄົມມະນາຄົມ ດ້ວຍຄະແນນ 13 ຕໍ່ 4; ເປຕັງ(ຍິງ) ທີມຊະນະເລີດໄດ້ແກ່ທີມ ລັດວິສາຫະກິດອີທີແອວ ສາມາດເອົາຊະນະ ທີມບໍລິສັດສະຕາໂທລະຄົມ ດ້ວຍຄະແນນ 13 ຕໍ່ 12 ; ເຊິ່ງຜູ້ຊະນະເລີດໄດ້ຮັບຂັນລາງວັນຜູ້ລະ 1 ໜ່ວຍ ເປັນກຽດກ່າວມອບຂັນ ໂດຍແມ່ນຄະນະພັກ-ພະນະະແນກ ປທສ.