ໃນວັນທີ 15 ມີນາ 2021 ສະພາແຫ່ງຊາດ ໄດ້ຈັດກອງປະຊຸມສະຫລຸບຖອດຖອນບົດຮຽນ ກ່ຽວກັບການກະກຽມ ແລະ ການດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ໃຫ້ກຽດເຂົ້າຮ່ວມ ມີ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ມີບັນດາທ່ານ ຮອງປະທານຄະນະກໍາມະການເລືອກຕັ້ງລະດັບຊາດ, ຄະນະກໍາມະການເລືອກຕັ້ງລະດັບຊາດ, ຄະນະກໍາມະການເລືອກຕັ້ງແຂວງ, ນະຄອນຫລວງວຽງຈັນ ເຂົ້າຮ່ວມ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ປະກອບຄຳຄິດເຫັນ, ແລກປ່ຽນບົດຮຽນ ເຊິ່ງກັນ ແລະ ກັນ ພ້ອມທັງສະຫລຸບຕີລາຄາ ກ່ຽວກັບການກະກຽມ ແລະ ການດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ທີ່ຢູ່ໃນຂອບເຂດຄວາມຮັບຜິດຊອບຂອງແຕ່ລະພາກສ່ວນ, ເຊິ່ງບັນດາຄໍາຄິດຄຳເຫັນ ທີ່ນຳມາປຶກສາຫາລືກັນໃນຄັ້ງນີ້, ແມ່ນຈະເປັນຂໍ້ມູນໃຫ້ແກ່ການປັບປຸງບົດສະຫລຸບຕີລາຄາ ໃຫ້ມີເນື້ອໃນຄົບຖ້ວນ, ຊັດເຈນ ແລະ ເປັນບົດຮຽນ ໃຫ້ແກ່ການປັບປຸງກົດໝາຍ, ນິຕິກໍາໃຕ້ກົດໝາຍ ກ່ຽວກັບການກະກຽມ ແລະ ດໍາເນີນການເລືອກຕັ້ງ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃນຕໍ່ໜ້າ.

ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ມີຄຳເຫັນໃນກອງປະຊຸມ ໂດຍທ່ານ ໄດ້ສະແດງຄວາມຂອບໃຈ ແລະ ຊົມເຊີຍ ທຸກພາກສ່ວນ ທີ່ໄດ້ຮ່ວມກັນກະກຽມ ແລະ ດໍາເນີນການເລືອກຕັ້ງ ຈົນໄດ້ຮັບຜົນສໍາເລັດຕາມຄາດໝາຍ, ພ້ອມທັງຮຽກຮ້ອງໃຫ້ຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບການເມືອງຂອງຕົນ ເຂົ້າໃນການຄົ້ນຄວ້າ ແລະ ປະກອບຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີ, ດ້ານຄົງຄ້າງ ກໍຄື ບັນດາສາເຫດທີ່ພາໃຫ້ມີດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນແຕ່ລະບັນຫາ ພ້ອມທັງສະເໜີມາດຕະການ ແລະ ວິທີການແກ້ໄຂ ເພື່ອເປັນບົດຮຽນທີ່ດີໃຫ້ແກ່ ການກະກຽມການເລືອກຕັ້ງໃນຊຸດຕໍ່ໄປ ເປັນຕົ້ນ ການເພີ່ມທະວີການຊີ້ນໍາ-ນໍາພາຂອງຄະນະພັກ, ອົງການປົກຄອງແຕ່ລະຂັ້ນ ຕໍ່ກັບວຽກງານການເລືອກຕັ້ງ, ການອອກນິຕິກໍາ ເພື່ອເປັນບ່ອນອີງໃນການປະຕິບັດໜ້າທີ່ ຂອງຄະນະກໍາມະການເລືອກຕັ້ງແຕ່ລະຂັ້ນ; ຄວາມຮັບຜິດຊອບຂອງຄະນະພັກ, ອົງການປົກຄອງ ແລະ ຄະນະກໍາມະການເລືອກຕັ້ງ ໃນການຄັດເລືອກເປົ້າໝາຍຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ; ການປະສານສົມທົບ ລະຫວ່າງຄະນະກໍາມະການເລືອກຕັ້ງ ຕາມສາຍຕັ້ງ, ສາຍຂວາງຂອງຕົນ; ການໂຄສະນາບຸກລະດົມຂະບວນການ; ການໂຄສະນາພົບປະກັບຜູ້ມີສິດປ່ອນບັດເລືອກຕັ້ງ; ການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ການນໍາໃຊ້ງົບປະມານ ແລະ ວຽກງານອື່ນໆ ທີ່ກ່ຽວກັບການກະກຽມ ແລະ ດໍາເນີນການເລືກກຕັ້ງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)