ມີເດຍລາວແຂວງຈຳປາສັກ ຂ່າວ: ທັດຊະນະ ວັນທີ 17 ມີນາ 2021, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ຕ້ອນຮັບ ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການເງິນ, ພ້ອມຄະນະ ໃນໂອກາດເຄື່ອນໄຫວຊີ້ນໍາວຽກງານ ຢູ່ແຂວງຈໍາປາສັກ.

ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະໄດ້ລາຍງານໃຫ້ທ່ານຮອງລັດຖະມົນຕີກະຊວງການເງິນ ພ້ອມຄະນະ ຮູ້ເຖິງ ທິດທາງແຜນການນຳພາ ປະຈໍາປີ 2021. ໃນຂົງເຂດເສດຖະກິດ ແມ່ນ ສືບຕໍ່ຊຸກຍູ້ສົ່ງເສີມການຜະລິດເປັນສິນຄ້າ ແລະການບໍລິການຢູ່ຂັ້ນຮາກຖານ, ຊຸກຍູ້ການສົ່ງເສີມຂຸດຄົ້ນທ່າແຮງຂອງບັນດາທຸລະກິດຂະໜາດນ້ອຍ ເພື່ອສ້າງຄວາມເຂັ້ມແຂງໃນວຽກງານການພັດທະນາເສດຖະກິດ-ສັງຄົມຂອງແຂວງ, ນຳພາແຜນການຈັດເກັບລາຍຮັບ-ລາຍຈ່າຍງົບປະມານ ໃຫ້ໄດ້ຕາມແຜນ; ເອົາໃຈໃສ່ປະຕິບັດ 18 ມາດຕະການ ແຜນຊຸກຍູ້ລາຍຮັບຂອງກະຊວງການເງີນ ກໍ່ຄືຂອງສ່ວຍສາອາກອນປະຈໍາແຂວງ ວາງອອກ ແລະ ກຳນົດຫົວໜ່ວຍເປົ້າໝາຍ, ສ່ວຍສາອາກອນປະຈຳນະຄອນ, ເມືອງ ເພື່ອສົມທົບກັບຄະນະກຳມະການຂອງພະແນກການເງິນແຂວງ ໃນການຊຸກຍູ້ການເກັບລາຍຮັບປີ 2021.


ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ສະແດງຄວາມຂອບໃຈ ທ່ານເຈົ້າແຂວງຈຳປາສັກ ພ້ອມຄະນະ ທີ່ໄດ້ໃຫ້ການຕ້ອນຮັບ ແລະທ່ານຮອງລັດຖະມົນຕີກະຊວງການເງິນ ໄດ້ແຈ້ງຈຸດປະສົງການມາເຄື່ອນໄຫວວຽກງານ ຢູ່ແຂວງຈຳປາສັກ ຄັ້ງນີ້ວ່າ: ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການເງິນ, ແລະໃຫ້ທິດຊີ້ນໍາ ການຈັດຕັ້ງປະຕິບັດການຈັດເກັບລາຍຮັບ, ການຄຸ້ມຄອງສ່ວຍສາອາກອນ, ພັດທະນາລະບົບຄຸ້ມຄອງຂໍ້ມູນຂ່າວສານການເງິນ-ງົບປະມານ ແລະ ການບໍລິຫານລັດດ້ວຍກົດໝາຍ ໃຫ້ມີຄວາມສັກສິດ, ເປັນທັນສະໄໝ ແລະ ກ້າວໄປສູ່ລະບົບດີຈີຕອນ ແລະຈະໄດ້ປັບປຸງລະບົບການຈັດຕັ້ງຂອງຂະແໜງການເງິນໃຫ້ ມີຄວາມກົມກຽວລະຫວ່າງການຄຸ້ມຄອງລວມສູນຕາມສາຍຕັ້ງ ແລະ ສາຍຂວາງ ຂອງກະຊວງການເງິນ ແລະ ອົງການປົກຄອງທ້ອງຖິ່ນແຕ່ລະຂັ້ນ.