ມີເດຍລາວແຂວງຈຳປາສັກ ຂ່າວ: ທັດຊະນະ. ວັນທີ 18 ມີນາ 2021, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ ພ້ອມດ້ວຍຄະນະ ໃນໂອກາດມາເຄື່ອນໄຫວຊີ້ນຳວຽກງານ ຢູ່ແຂວງຈຳປາສັກ.
ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະຕີລາຄາສູງ ໃນການມາເຄື່ອນໄຫວຊີ້ນຳ ວຽກງານ ຢູ່ແຂວງຈຳປາສັກ ຂອງທ່ານລັດຖະມົນຕີກະຊວງຍຸຕິທໍາ ແລະ ຄະນະ ໃນເທື່ອນີ້ ເຮັດໃຫ້ວຽກງານໃນຂະແໜງການດັ່ງກ່າວ ໄດ້ຮັບຜົນສໍາເລັດ ແລະໃນໄລຍະຜ່ານມາ ພະແນກຍຸຕິທຳແຂວງຈຳປາສັກ ແມ່ນໄດ້ເຮັດໜ້າທີ່ເປັນເສນາທິການ ດ້ານກົດໜາຍ ດ້ວຍຄວາມຮັບຜິດຊອບສູງ ຊຶ່ງເປັນການປະກອບສ່ວນ ໃນການສ້າງລັດ ໃຫ້ກາຍເປັນລັດປົກຄອງດ້ວຍກົດໝາຍ ແລະທ່ານເຈົ້າແຂວງຈຳປາສັກ ໄດ້ມີຄຳເຫັນສະເໜີ ຕໍ່ທ່ານລັດຖະມົນຕີກະຊວງ ຍຸຕິທໍາ ໃນການ ຍົກລະດັບຄວາມຮູ້, ຄວາມສາມາດ ໃຫ້ ຂະແໜງການ ອົງການປົກຄອງ ຂັ້ນທ້ອງຖິ່ນ, ພະນັກງານທີ່ຮັບຜິດຊອບວຽກງານດັ່ງກ່າວ ທີ່ເປັນເຈົ້າການໃນການປະຕິບັດໜ້າທີ່ວຽກງານ, ການຝຶກອົບຮົມ ວຽກງານຍຸຕິທໍາ ໂດຍສະເພາະ ແມ່ນວຽກງານຊ່ວຍເຫຼືອທາງດ້ານກົດໝາຍ.

ໂອກາດດຽວກັນ, ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ ໄດ້ສະແດງຄວາມຂອບໃຈ ແລະທ່ານໄດ້ແຈ້ງໃຫ້ຮູ້ເຖິງ ຈຸດປະສົງໃນການມາເຄື່ອນໄຫວວຽກງານ ຢູ່ແຂວງຈຳປາສັກ ຄັ້ງນີ້ວ່າ: ແມ່ນໄດ້ນຳເອົາເນື້ອໃນ ຈິດໃຈ ຜົນສຳເລັດ ກອງປະຊຸມໃຫຍ່ ຄັ້ງທີ XI ຂອງພັກ ແລະ ກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ຍຸຕິທຳ ແລະ ຈະໄດ້ໂອ້ລົມ ໃຫ້ທິດຊີ້ນໍາ ພະແນກຍຸຕິທຳ ແຂວງ, ເມືອງ, ພະນັກງານ-ລັດຖະກອນຂະແໜງການຍຸຕິທຳ, ພະນັກງານ ຄູອາຈານ ຂອງ ສະຖາບັນກົດໝາຍ ແລະ ຈະໄດ້ ອົບຮົມ ວຽກງານຊ່ວຍເຫລືອທາງດ້ານກົດໝາຍ ແລະ ວຽກງານແກ້ໄຂຂໍຂັດແຍ່ງຂັ້ນທ້ອງຖິ່ນ, ສ້າງຄວາມເຂັ້ມແຂງວຽກງານຊ່ວຍເຫຼືອລ້າທາງດ້ານກົດໝາຍ ແລະ ວຽກງານໄກ່ເກ່ຍຂໍ້ຂັດແຍ່ງຂັ້ນບ້ານໃຫ້ພະນັກງານຫຼັກແຫຼ່ງ ຢູ່ແຂວງຈຳປາສັກ ເພື່ອໃຫ້ການຈັດຕັ້ງປະຕິວັດວຽກງານວິຊາສະເພາະ ໄດ້ມີໝາກຜົນ ຜົນງານ ໃຫຍ່ຫຼວງ ກວ່າເກົ່າ.