ມີເດຍລາວແຂວງຄຳມ່ວນ ຂ່າວ: ກັນຍາ ຊາວໜຸ່ມແຂວງ ເພື່ອເປັນການຊຸກຍູ້ສົ່ງເສີ່ມວິຊາຊີບ-ສ້າງວຽກເຮັດງານທໍາ ໃຫ້ແກ່ສະມາຊິກຊາວໜຸ່ມ-ໄວໜຸ່ມ ທົ່ວແຂວງຄໍາມ່ວນ ໃຫ້ມີອາຊີບທີ່ໝັ້ນຄົງ ບັນລຸໄດ້ຕາມເນື້ອໃນຂໍ້ແຂ່ງຂັນ 4 ບຸກ ຂອງຊາວໜຸ່ມລາວ ກໍ່ຄື ບຸກດ້ານວິຊາຊີບ-ສ້າງວຽກເຮັດງານທໍາ; ໃນວັນທີ 22 ມີນາ 2021 ທີ່ຜ່ານມາ ຄະນະຊາວໜຸ່ມ ປະຊາຊົນ ປະຕິວັດລາວ ກະຊວງສຶກສາທິການ ແລະ ກິລາ ໄດ້ລົງເຄື່ອນໄຫວພົບປະແລກປ່ຽນບົດຮຽນ ກໍ່ຄື ມອບອຸປະກອນຕັດຫຍິບ ໃຫ້ແກ່ ຄະນະບໍລິຫານງານຊາວໜຸ່ມແຂວງຄໍາມ່ວນ ນໍາໂດຍ ສະຫາຍ ປອ ສໍາລານ ພັນຄະວົງ ຄະນະປະຈໍາພັກ ກະຊວງສຶກສາທິການ ແລະ ກິລາ, ສະຫາຍ ປອ ຕຸດາວັນ ໜໍ່ເມືອງເສດ ຄະນະເລຂາທິການສູນກາງຊາວໜຸ່ມ ຄະນະພັກກະຊວງ ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະ ກິລາ ພ້ອມຄະນະ ໂດຍການເປັນກຽດຕ້ອນຮັບຂອງ ສະຫາຍ ສາຍຄໍາ ພະໄຊສິດທິເດດ ກໍາມະການພັກແຂວງ ກໍາມະການສູນກາງຊາວໜຸ່ມ ປປລ ເລຂາຄະນະບໍລິຫານງານຊາວໜຸ່ມແຂວງ ມີບັນດາສະຫາຍ ຫົວໜ້າຂະແໜງ-ຮອງຂະແໜງ ເຂົ້າຮ່ວມຕ້ອນຮັບຢ່າງອົບອຸ່ນ.

ສະຫາຍ ປອ ສໍາລານ ພັນຄະວົງ ຄະນະປະຈໍາພັກ ກະຊວງສຶກສາທິການ ແລະ ກິລາ ໄດ້ມີຄໍາເຫັນຕໍ່ຂະບວນການຄັ້ງນີ້ວ່າ: ຈຸດປະສົງ ໃນການລົງເຄື່ອນໄຫວຢ້ຽມຢາມ ພົບປະແລກປ່ຽນບົດຮຽນ ກັບ ຄະນະຊາວໜຸ່ມແຂວງຄໍາມ່ວນ ໃນເທື່ອນີ້ ກໍ່ເພື່ອນໍາພາບັນດາສະຫາຍ ໃນກະຊວງສຶກສາທິການ ແລະ ກິລາ ໄດ້ມາເຄື່ອນໄຫວ ສ້າງສາຍສໍາພັນ ຄວາມສາມັກຄີ ໂດຍສະເພາະ ໄດ້ນໍາເອົາຈັກຕັດຫຍິບ ຈໍານວນ 10 ເຄື່ອງ ມູນຄ່າ 25.000.000 ກີບ ມາມອບໃຫ້ ຄະນະຊາວໜຸ່ມແຂວງຄໍາມ່ວນ ເພື່ອເປັນການຊຸກຍູ້ສົ່ງເສີມວິຊາຊີບ ໃຫ້ແກ່ສະມາຊິກຊາວໜຸ່ມ-ໄວໜຸ່ມ ໃນທົ່ວແຂວງ ໄດ້ມີວິຊາຊີບ-ສ້າງວຽກເຮັດງານທໍາ ເຊິ່ງເປັນກຽດມອບໂດຍ ສະຫາຍ ປອ ຕຸດາວັນ ໜໍ່ເມືອງເສດ ຄະນະເລຂາທິການສູນກາງຊາວໜຸ່ມ ຄະນະພັກກະຊວງ ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະ ກິລາ ຮັບໂດຍ ສາຍຄໍາ ພະໄຊສິດທິເດດ ກໍາມະການພັກແຂວງ ກໍາມະການສູນກາງຊາວໜຸ່ມ ປປລ ເລຂາຄະນະບໍລິຫານງານຊາວໜຸ່ມແຂວງ.


ພາຍຫຼັງ ສໍາເລັດການພົບປະແລກປ່ຽນບົດຮຽນ ກໍ່ຄື ມອບ-ຮັບ ເຄື່ອງຊ່ວຍເຫຼືອ ສໍາເລັດແລ້ວ ຍັງໄດ້ສືບຕໍ່ສ້າງຂະບວນການແຂ່ງຂັນກິລາບານເຕະ ເພື່ອສ້າງສາຍສໍາພັນ ຄວາມສາມັກຄີ ໄມຕີຈິດມິດຕະພາບ ທີ່ດີຕໍ່ກັນ ລະຫວ່າງ ຄະນະຊາວໜຸ່ມທັງສອງຝ່າຍ.