ດ້ວຍຄວາມເປັນຫ່ວງເປັນໄຍ ຂອງຂັ້ນເທິງ ທີ່ມີຕໍ່ສະມາຊິກກຳມະບານ ເວົ້າສະເພາະກໍ່ຄືພໍ່ແມ່ປະຊາຊົນ 5ແຂວງພາກກາງ-ພາກໃຕ້ທີ່ກຳລັງປະສົບບັນຫາໄພພິບັດນ້ຳຖ້ວມຢູ່ໃນຕອນນີ້ ດັ່ງນັ້ນ ໃນລະຫວ່າງວັນທີ 14-15 ກັນຍາ 2019 ຄະນະນຳຈາກສູນກາງສະຫະພັນກຳມະບານລາວ ນຳໂດຍທ່ານ ນາງ ອາລີ ວົງໜໍ່ບຸນທຳ ຮອງປະທານສູນກາງສະຫະພັນກຳມະບານລາວ ພ້ອມຄະນະຫົວໜ້າກົມຂະບວນການແຂ່ງຂັນຍ້ອງຍໍ ແລະພະນັກງານວິຊາການ ໄດ້ນຳເອົາເຄື່ອງບໍລິໂພກມາມອບໃຫ້ແກ່ແຂວງສະຫວັນນະເຂດ ເຊິ່ງເປັນກຽດກ່າວຮັບໂດຍແມ່ນທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ພ້ອມດ້ວຍຄະນະປະທານສະຫະພັນກຳມະບານແຂວງ ,ເຊິ່ງເຄື່ອງບໍລິໂພກທີ່ສູນກາງກຳມະບານລາວນຳມາມອບໃນຄັ້ງນີ້ ລວມມູນຄ່າທັງໝົດ 35 ລ້ານກີບ.

ວັນຕໍ່ມາ ທ່ານຮອງປະທານສູນກາງສະຫະພັນກຳມະບານລາວ ແລະ ຄະນະປະທານສະຫະພັນກຳມະບານແຂວງ ສະຫວັນນະເຂດ ກໍ່ໄດ້ພ້ອມກັນນຳເອົາວັດຖຸເຄື່ອງບໍລິໂພກດັ່ງກ່າວ ມູນຄ່າ 10 ລ້ານກີບ ນຳມາມອບຕໍ່ໃຫ້ແກ່ຜູ້ປະສົບໄພນ້ຳຖ້ວມ ທີ່ເມືອງຊົນນະບູລີ ເຊິ່ງກ່າວຮັບໂດຍແມ່ນທ່ານ ສຸວິໄລ ຫຼວງຊະລາດ ວ່າການເຈົ້າເມືອງຊົນນະບູລີ ເພື່ອຈະໄດ້ນຳໄປແຈກຢາຍໃຫ້ປະຊາຊົນ ໂດຍສະເພາະບ້ານທີ່ໄດ້ຮັບຜົນກະທົບຈາກໄພນ້ຳຖ້ວມໃນຫຼາຍໆບ້ານຂອງເມືອງຊົນນະບູລີໃຫ້ທົ່ວເຖິງ.

ຂ່າວ/ພາບ: ວຽງສະໄໝ ຊົມຊອບ
ນັກຂ່າວ: ສະຫະພັນກຳມະບານແຂວງ ສະຫວັນນະເຂດ .