ໃນວັນທີ 17 ກັນຍາ 2019 ນີ້ ຢູ່ທີ່ຫ້ອງປະຊຸມ ພະແນກຖະແຫຼງຂ່າວ,ວັດທະນະທຳ ແລະ ທອງທ່ຽວ ທາງພະແນກຖະແຫຼງຂ່າວ,ວັດທະນະທຳ ແລະ ທອງທ່ຽວແຂວງ ຮ່ວມກັບສະມາຄົມນັກປະພັນລາວ ສາຂາແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່ກ່ຽວກັບການອະນຸລັກຮັກສາສິ່ງແວດລ້ອມ ພາຍໃຕ້ໂຄງການສົ່ງເສີມຄວາມຮູ້,ຄວາມສາມາດກ່ຽວກັບການຂຽນບົດວັນນະກໍາ ຊຸກຍູ້ໂຄສະນາການປູກຈິດສຳນຶກກ່ຽວກັບສິ່ງແວດລ້ອມ. ໂດຍການເຂົ້າຮ່ວມຂອງທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທອງທ່ຽວແຂວງ,ທ່ານ ທອງສວຍ ຂັນຕິວົງ ປະທາສະມາຄົມນັກປະພັນແຂວງສະຫວັນນະເຂດ,ມີຜູ້ຕາງໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມນະຄອນໄກສອນ ພົມວິຫານ ພ້ອມດ້ວຍບັນດານັກປະພັນພາຍໃນແຂວງເຂົ້າຮ່ວມນຳ.

ທ່ານ ທອງສວຍ ຂັນຕິວົງ ປະທາສະມາຄົມນັກປະພັນແຂວງ ໄດ້ໃຫ້ຮູວ່າ: ໂຄງການສົ່ງເສີມຄວາມຮູ້,ຄວາມສາມາດກ່ຽວກັບການຂຽນບົດວັນນະກໍາ ຊຸກຍູ້ໂຄສະນາການປູກຈິດສຳນຶກກ່ຽວກັບສິ່ງແວດລ້ອມຂອງນະຄອນໄກສອນ ພົມວິຫານ ແມ່ນເປັນໂຄງທຳອິດທີ່ສະມາຄົມນັກປະພັນແຂວງຍາດມາໄດ້ ຈຸດປະສົງຂອງໂຄງການແມ່ນເພື່ອສ້າງນັກຂຽນ,ນັກປະພັນ,ນັກກະວີ ແລະ ຈະກ້າວໄປເຖິງການຂັດເລືອກບົດຈັດພິມປຶ້ມ ເພື່ອເປັນການໂຄສະນາປະຊາສຳພັນຢູ່ໃນເປົ້າໝາຍຂອງຈຳນວນ 17 ບ້ານພາຍໃນນະຄອນໄກສອນ ພົມວິຫານ ລວມທັງສະຖາບັນການສຶກສາ ສິ່ງສຳຄັນແມ່ນເປັນການຫັນແນວທາງນະໂຍບາຍຂອງພັກ – ລັດກ່ຽວກັບການປົກປັກຮັກສາ,ສົ່ງເສີມ ແລະ ແກ້ໄຂຜົນກະທົບຂອງສິ່ງແວດລ້ອມທີ່ເກີດຂຶ້ນໃນປັດຈຸບັນ ໂດຍການໂຄສະນາແບບວັນນະກຳ,ວັນນະຄະດີ,ເປັນບົດເລື່ອງສັ້ນ ແລະ ກາບກອນ

ໂອກາດເຂົ້າຮ່ວມກອງປະຊຸມຄັ້ງນີ້ ທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທອງທ່ຽວແຂວງ ກໍ່ໄດ້ມີຄຳເຫັນວ່າ: ໂຄງການສົ່ງເສີມຄວາມຮູ້,ຄວາມສາມາດກ່ຽວກັບການຂຽນບົດວັນນະກໍາ ຊຸກຍູ້ໂຄສະນາການປູກຈິດສຳນຶກກ່ຽວກັບສິ່ງແວດລ້ອມແມ່ນຖືເອົາໂຄງການຂຽນເປັນຫຼັກ ເພື່ອເປັນການໂຄສະນາການປົກປັກຮັກສາສິ່ງແວດລ້ອມ ຜ່ານສື່ຕ່າງໆ ດ້ວຍຮູບແບບບົດປະພັນ,ບົດເລື່ອງສັ້ນ,ບົດເພງ,ບົດລຳ ແລະ ອື່ນໆ

ພາບ – ຂ່າວ: ອັກສອນສິນ ພົມມະຈັນ