ມີເດຍລາວແຂວງເຊກອງ ຂ່າວ: ສັນຍາ
ບຸນປະເພນີຊ່ວງເຮືອແພ ແລະບຸນປະເພນີ 4 ເຜົ່າປະຈໍາປີ 2021 ທີ່ເມືອງດາກຈຶງແຂວງເຊກອງໄດ້ຈັດຂຶ້ນໃນລະຫວ່າງວັນທີ 27-28 ມີນາ 2021 ທີ່ອ່າງນໍ້າຫ້ວຍປຣິງບັນຍາກາດຄຶກຄື້ນພໍສົມຄວນ ເຊິ່ງມີເຮືອເຂົ້າຮ່ວມແຂ່ງຂັນທັງໝົດ 20 ລໍາ, ໃນນີ້ເຮືອແພ 13 ລໍາ ແລະເຮືອກາບ 7 ລໍາ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ທ່ານ ໄລສວນ ມິດສຸວັນ ເຈົ້າເມືອງດາກຈຶງ; ພ້ອມນີ້ ກໍມີການນໍາຂັ້ນແຂວງ-ເມືອງ, ແຂກຖືກເຊີນ, ຫົວໜ່ວຍບໍລິສັດລັດວິສາຫະກິດ ແລະປະຊາຊົນເຂົ້າຮ່ວມຊົມຮ່ວມເຊຍຢ່າງຫຼວງຫຫຼາຍ.
ທ່ານ ໄລສວນ ມິດສຸວັນ ກ່າວເປີດງານຄັ້ງນີ້ວ່າ: “ ແພ “ ເປັນພາຫະນະປະເພດໜຶ່ງ ເພື່ອນໍາໃຊ້ເຂົ້າໃນການທໍາມາ, ລໍາລຽງຂົນສົ່ງເຂົ້າ-ນໍ້າໃຫ້ແກ່ນັກລົບແນວໜ້າໃນສະໄໝສົງຄາມຂອງປະຊາຊົນເມືອງດາກຈຶງ, ສະນັ້ນ ເພື່ອເປັນການອະນຸລັກຮັກສາພູມປັນຍາຂອງບັນພະບູລຸດ, ວັດທະນະທໍາ, ຮີດຄອງປະເພນີອັນດີງາມຂອງບັນເຜົ່າ ແລະຕິດພັນກັບການທ່ອງທ່ຽວ ເພື່ອກະຕຸ້ນ ແລະປະກອບສ່ວນທາງດ້ານເສດຖະກິດທີ່ໄດ້ນໍາເອົາຜົນປະໂຫຍດໂດຍກົງໃຫ້ແກ່ພໍ່ແມ່ປະຊາຊົນ ແລະສັງຄົມ, ການນໍາເມືອງຈຶ່ງໄດ້ຈັດງານບຸນດັ່ງກ່າວນີ້ຂຶ້ນ.

ງານບຸນຊ່ວງເຮືອແພ ແລະບຸນປະເພນີ 4 ເຜົ່າຂອງເມືອງດາກຈຶງໄດ້ຈັດຂຶ້ນທຸກໆປີ ເຊິ່ງເລີ່ມແຕ່ປີ 2012 ເປັນ ຕົ້ນມາ ເຊິ່ງປີນີ້ກໍເປັນອີກປີໜຶ່ງທີ່ມີບັນຍາກາດຟົດຟື້ນບໍ່ໜ້ອຍໄປກວ່າປີຜ່ານໆມາ ມີນັກທ່ອງທ່ຽວພາຍໃນແຂວງ, ຕ່າງແຂວງ ແລະປະຊາຊົນພາຍໃນເມືອງເຂົ້າຮ່ວມຊົມຮ່ວມເຊຍ ແລະໃຫ້ກໍາລັງໃຈສີພາຍເຮືອຊ່ວງຢ່າງຫຼວງຫຼາຍ.
ທ່ານ ໄລສວນ ມິດສຸວັນ ກ່າວຕື່ມວ່າ: ໃນໄລຍະນີ້ ພວກເຮົາໄດ້ພົບຄວາມຫຍຸ້ງຍາກ, ປະເຊີນກັບການລະບາດຂອງພະຍາດໂຄວິດ-19 ດັ່ງນັ້ນ ຈຶ່ງຮຽກຮ້ອງມາຍັງ ນັກທ່ອງທ່ຽວ ແລະປະຊາຊົນບັນດາເຜົ່າເມືອງດາກຈຶງຈົ່ງພ້ອມກັນເປັນເຈົ້າການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19, ດ້ວຍການໃສຜ້າອັດປາກ, ເຈວລ້າງມື, ຮັກ ສາໄລຍະຫ່າງ ແລະຮັກສາຄວາມສະອາດອື່ນໆ.


ສໍາລັບຜົນການແຂ່ງຂັນ: ປະເພດເຮືອແພອັນດັບໜຶ່ງບ້ານດາກຈຶງ; ທີສອງເຜົ່າສາມັກຄີ ແລະທີສາມຫ້ອງການອົງການຈັດຕັ້ງມະຫາຊົນ; ປະເພດເຮືອກາບອັນດັບທີໜຶ່ງບ້ານພັກສຸພາພອນ; ທີສອງຫ້ອງການກະສິກໍາ-ປ່າໄມ້ເມືອງ ແລະທີສາມຫ້ອງການສຶກສາທິການ ແລະກິລາເມືອງ. ນອກນັ້ນ ຍັງມີລາງວັນເຮືອແພງາມ, ການແຂ່ງຂັນກິລາໜ້າເກັກ ແລະກິລາເຈັດເນັງ.