ພິທີເປີດຕະຫຼາດກະສິກຳ-ຫັດຖະກຳຊຸມຊົນ ຢູ່ບ້ານຫໍກອງ ເມືອງເລົ່າງາມ ແຂວງສາລະວັນ ໄດ້ຈັດຂຶ້ນໃນວັນທີ 31 ມີນາ 2021 ເຂົ້າຮ່ວມໂດຍທ່ານ ນາງ ບຸນທະວີ ດວງລາສີ ຮອງເຂລາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ, ທ່ານ ສົມສັກ ທົງຄໍາຫານ ກໍາມະການພັກແຂວງ ເຈົ້າເມືອງເລົ່າງາມ, ທ່ານ ນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີປະທານສະຫະພັນແມ່ຍິງແຂວງ, ແຂກທີ່ຖືກເຊີນຈາກພະແນກການອ້ອມຂ້າງແຂວງ, ເມືອງ, ຄະນະບໍລິຫານສະຫະພັນແມ່ຍິງເມືອງ ແລະກຸ່ມກະສິກຳ 5 ບ້ານເປົ້າໝາຍຂອງໂຄງການເຂົ້າຮ່ວມ.

ຕະຫຼາດກະສິກຳ-ຫັດຖະກຳຊຸມຊົນ ບ້ານຫໍກອງ ເມືອງເລົ່າງາມ ແຂວງສາລະວັນ ແມ່ນໄດ້ເລີ່ມລົງມືກໍ່ສ້າງອາຄານ ໃນປີ 2011 ແລະສໍາເລັດໃນປີ 2015 ຍ້ອນເງື່ອນໄຂສະພາບແວດລ້ອມບໍ່ອໍານວຍຄວາມສະດວກ ຕະຫຼາດກະສິກໍາແຫ່ງນີ້ຈື່ງບໍ່ສາມາດເປີດໃຫ້ບໍລິການໄດ້ໃນໄລຍະຜ່ານມາ, ມາໃນຕົ້ນປີ 2019 ໂຄງການສົ່ງເສີມບົດບາດຍິງ-ຊາຍ ຕິດພັນກັບການຜະລິດກະສິກໍາເປັນສິນຄ້າຂອງສູນກາງສະຫະພັນແມ່ຍິງລາວ ໄດ້ຮັບການສະໜັບສະໜູນຂອງອົງການສະຫະປະຊາຊາດເພື່ອການພັດທະນາ ໄດ້ເຂົ້າມາຊ່ວຍເຫຼືອພໍ່-ແມ່ ປະຊາຊົນໃນ 5 ບ້ານເປົ້າໝາຍ ຂອງໂຄງການຄື: ບ້ານຕະກີດ, ບ້ານເຕເມ, ບ້ານເລນ, ບ້ານດົງບັງ ແລະ ບ້ານຂະໜວນ.

ເພື່ອສົ່ງເສີມການຜະລິດກະສິກໍາເປັນສິນຄ້າ, ສົ່ງເສີມເອື້ອຍນ້ອງແມ່ຍິງ ແລະ ປະຊາຊົນໃຫ້ມີວຽກເຮັດງານທໍາທີ່ດີຂື້ນ, ແກ້ໄຂຄວາມທຸກຍາກ ທັງເຮັດໃຫ້ປະຊາຊົນໄດ້ມີຕະຫຼາດຈໍາໜ່າຍສິນຄ້າ ແລະ ຜົນຜະລິດຂອງປະຊາຊົນ ໂດຍສະເພາະແມ່ນຜະລິດຕະພັນກະສິກໍາ ເພື່ອຈະສ້າງເປັນຕະຫຼາດກະສິກໍາອິນຊີໃນອະນາຄົດ ທັງເປັນການໂຄສະນາໃຫ້ປະຊາຊົນຫັນມາຜະລິດ ແລະ ບໍລິໂພກກະສິກໍາທີ່ປອດສານເຄມີ ຕາມທິດພັດທະນາແບບຍືນຍົງ ກຸ້ມຕົນເອງ, ເພີ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນຫົວຂໍ້ “ປູກຫຼາຍ ລ້ຽງຫຼາຍ ໃຫ້ກາຍເປັນສິນຄ້າ” ຈາກນັ້ນໃນພິທີກໍ່ໄດ້ມີການຕັດແຖບຜ້າ ແລະ ລັ່ນຄ້ອງເປີດປ້າຍນໍາໃຊ້ຕະຫຼາດກະສິກໍາ ແລະ ຫັດຖະກໍາຊຸມຊົນຢ່າງເປັນທາງການ.

ນອກນັ້ນ ທ່ານ ນາງ ວາດສະໜາ ໂພໄຊຍະວົງ ປະທານສະຫະພັນແມ່ຍິງແຂວງ ໄດ້ນຳພາ ທ່ານ ນາງ ບົວຈັນ ຮອງປະທານສນກາງສະຫະພັນແມ່ຍິງລາວ ພ້ອມຄະນະ ເຄື່ອນໄຫວຢ້ຽມຢາມເຂດເຮັດການຜະລິດປູກພືດຜັກ ຢູ່ບ້ານຕະກີດ ແລະບ້ານເຕເມສັງທອງ ທີ່ເປັນບ້ານເປົ້າໝາຍຂອງໂຄງການຕື່ມອີກ.

ພາບ-ຂ່າວ: ທິດລານີ ໂຄດໂຍທາ