ມີເດຍລາວແຂວງສາລະວັນ ໂດຍນາງທິດລານີ ໂຄດໂຍທາ
ການຈັດງານສັບປະດາຄວາມປອດໄພທາງຫຼວງ ປີ 2021 ແມ່ນເປັນຄັ້ງທຳອິດທີ່ແຂວງສາລະວັນ, ພາຍໃຕ້ຄຳຂັວນ:” ຂັບຂີ່ປອດໄພ ຕ້ອງໃສ່ສາຍຮັດນິລະໄພ”,ເພື່ອເຮັດໃຫ້ມວນຊົນໄດ້ຮັບຮູ້, ເຂົ້າໃຈເຖິງການນຳໃຊ້ເສັ້ນທາງໃຫ້ຖືກກົດຈາລະຈອນ, ການຂັບຂີ່ໃຫ້ມີຄວາມປອດໄພ ຕາມກົດລະບຽບຈາລະຈອນຄື: ຕ້ອງໃສ່ສາຍຮັດນິລະໄພ, ໝວກກັນນັອກ, ຮູ້ຈັກປ້າຍສັນຍານຈາລະຈອນ ແລະປະຕິບັດໄດ້ກົດລະບຽບຕ່າງໆໃຫ້ຖືກຕ້ອງ.

ໃນໄລຍະຜ່ານມາ ແຂວງສາລະວັນໄດ້ເຄື່ອນໄຫວຈັດຕັ້ງສອບເສັງໃບຂັບຂີ່ໄດ້9 ຄັ້ງ, ສາມາດອອກໃບຂັບຂີ່ໄດ້3 ພັນກວ່າໃບ, ໄດ້ເອົາໃຈໃສ່ໃນການໂຄສະນາ, ປະຕິບັດກົດລະບຽບຈາລະຈອນດ້ວຍຫຼາຍຮູບການ, ແຕ່ຍັງມີອຸບັດຕິເຫດເກີດຂື້ນຕາມສາຍທາງຕ່າງໆໃນທົ່ວແຂວງສາລະວັນ, ເປັນຕົ້ນໃນປີຜ່ານມາມີ200 ກວ່າຄັ້ງ, ພາຫະນະເປ້ເພເກືອບ 300 ຄັ້ງ, ມີຜູ້ບາດເຈັບ 300 ກວ່າກໍລະນີ, ເສຍຊີວິດ 50 ກວ່າກໍລະນີ, ມູນຄ່າເສຍຫາຍທັງໝົດ 2 ຕື້ກວ່າກີບ.

ຈາກນັ້ນໃນພິທີກໍ່ໄດ້ມີການຖາມ-ຕອບ ຄວາມຮູ້ກ່ຽວກັບກົດລະບຽບຈາລະຈອນ ແລະ ມີການຕັດແຜ່ນຜ້າ, ປ່ອຍປຸມເປົ້າເປີດງານຢ່າງເປັນທາງການ. ຫຼັງຈາກນັ້ນກໍ່ໄດ້ແຫ່ຂະບວນຂັບຂີ່ປອດໄພເລີ່ມຕົ້ນແຫ່ຈາກສະໂມສອນແຂວງ ຕາມເສັ້ນທາງເລກທີ 15 ຮອດອະນຸສາວະລີອົງແກ້ວ ແລ້ວກັບຄືນມາໃສ່ເສັ້ນທາງເລກທີ 20. ການຈັດງານສັບປະດາຄວາມປອດໄພທາງຫຼວງ ປີ 2021 ໄດ້ຈັດຂື້ນໃນວັນທີ 3 ເມສາ 2021, ທີ່ສະໂມສອນແຂວງ, ໂດຍການເຂົ້າຮ່ວມຂອງ ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ ພ້ອມຄະນະ, ພາກສ່ວນທີ່ກ່ຽວຂ້ອງເຂົ້າຮ່ວມ.