ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ສະຫະພັນກຳມະບານແຂວງສາລະວັນ ສ້າງຂະບວນການຂ່ຳນັບຮັບຕ້ອນການສະເຫຼີມສະຫຼອງວັນກຳມະກອນສາກົນ ຄົບຮອບ 135 ປີ ແລະ ວັນສຳຄັນຕ່າງໆຂອງພັກຂອງຊາດ ໃຫ້ມີບັນຍາກາດຄືກຄື້ນ, ເບີກບານມ່ວນຊື່ນ ແລະ ໄດ້ຈັດງານແຂ່ງຂັນກິລາບານເຕະ ຊິງຂັນປະທານສະຫະພັນກຳມະບານແຂວງສາລະວັນ ເປັນຄັ້ງທຳອິດ, ຊິງເງິນລາງວັນ 7 ລ້ານກວ່າກີບ.

ທ່ານ ບຸນທະວີ ພິມມະສານ ປະທານສະຫະພັນກຳມະບານແຂວງສາລະວັນ ກໍ່ໄດ້ກ່າວຈຸດປະສົງ ໃນການຈັດງານຄັ້ງນີ້ວ່າ: ເພື່ອເປັນການສ້າງຂະບວນການສະເຫຼີມສະຫຼອງວັນສ້າງຕັ້ງສະຫະພັນກຳມະບານ ຄົບຮອບ 135 ປີ, ສ້າງຄວາມສາມັກຄີ, ຮັກແພງອັນແໜ້ນແຟ້ນ ລະຫວ່າງການຈັດຕັ້ງກຳມະບານ, ສະມາຊິກກຳມະບານພາຍໃນແຂວງສາລະວັນ ແລະ ພາກສ່ວນຕ່າງໆໃນສັງຄົມ, ຊຸກຍູ້, ສົ່ງເສີມ ແລະ ພັດທະນາວຽກງານກິລາໃຫ້ນັບມື້ນັບເປັນຂະບວນຟົດຟື້ນດີຂຶ້ນ. ສຳລັບການແຂ່ງຂັນຄັ້ງນີ້ ມີທິມເຂົ້າຮ່ວມທັງໝົດ 31 ທິມ ທີ່ມາຈາກພະແນກການອ້ອມຂ້າງແຂວງ, ເມືອງ, ບໍລິສັດ, ລັດວິສາຫະກິດ, ໂຮງຮຽນ ແລະ ບ້ານເຂົ້າຮ່ວມ. ໂດຍໄດ້ແບ່ງອອກເປັນ 8 ສາຍ ເພື່ອເຕະຄັດເລືອກເອົາທິມ ທີ່ໄດ້ທີ 1 ແລະ ທີ 2 ໃນຮອບແບ່ງກຸ່ມ ເພື່ອເຂົ້າຊິງໃນຮອບຕໍ່ໄປ, ເຊີ່ງຈະເຕະທັງໝົດ 61 ນັດ ແລະ ໃຊ້ເວລາແຂ່ງຂັນ 9 ວັນ ເລີ່ມແຕ່ວັນທີ 1 ເມສາ – 29 ເມສາ 2021 ເປັນຕົ້ນໄປ ແລະ ໄດ້ເລີ່ມເຕະໃນມື້ທຳອິດ 9 ຄູ່. ໂດຍມີຂັນລາງວັນທິມຊະນະເລີດ 1 ໜ່ວຍ, ເງິນລາງວັນທັງໝົດ 7 ລ້ານກວ່າກີບ, ໃນນັ້ນມີເງິນລາງວັນ ນັກເຕະດີເດັ່ນ(ຜູ້ທີ່ເຕະເຂົ້າປະຕູໄດ້ຫຼາຍ) 5 ແສນກີບ ແລະ ເກີບເຕະບານ 1 ຄູ່.

ພິທີເປີດງານແຂ່ງຂັນຄັ້ງນີ້ ໄດ້ຈັດຂຶ້ນໃນວັນທີ 1 ເມສາ 2021, ຢູ່ທີເດີ່ນເຕະບານຫຍ້າທຽມ ເພັດລັງສີ, ໂດຍໃຫ້ກຽດເຂົ້າຮ່ວມຂອງ ທ່ານ ບຸນທະວີ ພິມມະສານ ປະທານສະຫະພັນກຳມະບານແຂວງສາລະວັນ, ມີບັນດາຄະນະພະແນກການ, ອົງການທຽບເທົ່າອ້ອມຂ້າງ ຕະຫຼອດຮອດກຳມະການ, ຄູຝຶກ, ທິມນັກກິລາ ແລະພາກສ່ວນຕ່າງໆເຂົ້າຮ່ວມ.