ກອງປະຊຸມພົບປະແລກປ່ຽນຄຳເຫັນ ແລະ ປຶກສາຫາລືກ່ຽວກັບການໂຄສະນາຂໍ້ມູນຂ່າວສານທາງດ່ວນວຽງຈັນ-ວັງວຽງ ລະຫວ່າງຄະນະສື່ມວນຊົນລາວ ແລະ ບໍລິສັດຮ່ວມທຶນພັດທະນາທາງດ່ວນລາວ-ຈີນ ຈຳກັດ ໄດ້ຈັດຂຶ້ນໃນວັນທີ 8 ເມສານີ້ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໂດຍການເຂົ້າຮ່ວມຂອງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ, ທ່ານ ມາຫົງຫວາງ ຮອງປະທານບໍລິສັດຮ່ວມທຶນພັດທະນາທາງດ່ວນລາວ-ຈີນ, ມີບັນດາຜູ້ອຳນວຍການ, ບັນນາທິການ ພ້ອມດ້ວຍສື່ມວນຊົນຈາກພາກສ່ວນຕ່າງໆ ເຂົ້າຮ່ວມ.

ທ່ານ ສົມສະຫວາດ ພົງສາ ກ່າວວ່າ: ຈຸດປະສົງໃນການພົບປະຄັ້ງນີ້ເພື່ອສ້າງຄວາມ ເຂົ້າໃຈກ່ຽວກັບການນຳໃຊ້ທາງດ່ວນ ເພື່ອໃຫ້ບັນດາສື່ມວນຊົນໄດ້ຮັບຮູ້ເຂົ້າໃຈ ເພື່ອນໍາເອົາຂໍ້ມູນດັ່ງກ່າວໄປເຜີຍແຜ່ໂຄສະນາໃຫ້ປະຊາຊົນ ແລະ ສັງຄົມໄດ້ຮັບຮູ້, ເຂົ້າໃຈຢ່າງກວ້າງຂວາງ ພ້ອມກັນນີ້ກໍເພື່ອໃຫ້ບັນດາສື່ຕ່າງໆ ອອກຂ່າວຖືກຕ້ອງຕາມຂໍ້ມູນຄວາມເປັນຈິງ, ສຳຄັນຂໍໃຫ້ປະຊາຊົນຕິດຕາມຂ່າວຈາກສື່ທາງການເທົ່ານັ້ນ. ທ່ານ ມາຫົງຫວາງ ໄດ້ລາຍງານໃຫ້ຮູ້ວ່າ: ທາງດ່ວນນະຄອນຫຼວງວຽງຈັນ – ວັງວຽງ ແມ່ນທາງດ່ວນເສັ້ນທໍາອິດຂອງລາວ ມີຄວາມຍາວປະມານ 111 ກິໂລແມັດ ແລະ ກໍ່ເປັນໂຄງການຍຸດທະສາດທີ່ສໍາຄັນເຊື່ອມໂຍງລະຫວ່າງຍຸດທະສາດ “ຫັນປ່ຽນປະເທດລາວຈາກປະເທດທີ່ບໍ່ມີທາງອອກສູ່ທະເລໃຫ້ກາຍເປັນປະເທດເຊື່ອມໂຍງເຊື່ອມຈອດ” ແລະ ຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ຂອງ ສປ ຈີນ ໂດຍໄດ້ຮັບການສະໜັບສະໜູນຈາກສອງພັກ – ລັດ.

ປັດຈຸບັນຍານພາຫະນະທີ່ເດີນທາງຈາກນະຄອນຫຼວງວຽງຈັນ – ວັງວຽງ ໂດຍນໍາໃຊ້ທາງດ່ວນແມ່ນໃຊ້ເວລາພຽງແຕ່ 1 ຊົ່ວໂມງກວ່າ, ເຮັດໃຫ້ສາມາດປະຢັດເວລາ ໄດ້ 2 ຊົ່ວໂມງຈາກເວລາເດີມແມ່ນ 3,5 ຊົ່ວໂມງ ຊຶ່ງບໍ່ພຽງແຕ່ເປັນການປະຢັດເວລາໃນການເດີນທາງເທົ່ານັ້ນ, ຍັງສ້າງຄວາມສະດວກສະບາຍໃນການເດີນທາງ, ປະຢັດນໍ້າມັນລົດ, ເຮັດໃຫ້ການຄ້າຂາຍ ແລະ ການສັນຈອນຂອງປະຊາຊົນທີ່ອາໄສຢູ່ເມືອງນາຊາຍທອງ ນະຄອນຫຼວງວຽງຈັນ, ເມືອງໂພນໂຮງ, ເມືອງຫີນເຫີບ ແລະ ເມືອງວັງວຽງ ແຂວງວຽງຈັນ ສະດວກສະບາຍຍິ່ງຂຶ້ນ. ໃນໂອກາດປີໃໝ່ລາວທີ່ຈະມາເຖິງນີ້ຮຽກຮ້ອງມາຍັງປະຊາຊົນລາວບັນດາເຜົ່າ ລວມເຖິງຜູ້ນຳໃຊ້ລົດໃຊ້ຖະໜົນເທິງທາງດ່ວນນະຄອນຫຼວງວຽງຈັນ-ວັງວຽງ ຈົ່ງພ້ອມກັນຂັບຂີ່ພາຫະນະຢ່າງມີສະຕິ, ປະຕິບັດກົດລະບຽບຈາລະຈອນກໍ່ຄືກົດລະບຽບຂອງທາງດ່ວນວາງອອກຢ່າງເຂັ້ມງວດເພື່ອຫຼີກລ່ຽງການເກີດອຸບັດ ເຫດ.

ຂ່າວ-ພາບ: ພູວັນ