ໃນວັນທີ 08 ເມສາ 2021 ທີ່ຜ່ານມານີ້ ຢູ່ທີ່ ໂຮງຮຽນ ມຕ ຄູນຄໍາ ຈັດພິທີແຂ່ງຂັນ ສິລະປະວັນນະຄະດີ ປະຈໍາປີ 2021ຂຶ້ນ ໂດຍການໃຫ້ກຽດເຂົ້າຮ່ວມ ຂອງທ່ານ ກິລຳພັນ ພິມມະຈັກ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ທ່ານ ແສງຄໍາ ພອນວິໄຊ ຄະນະພັດທະນາ ເຂດຄຸນຄໍາ, ທ່ານ ນ.ຂວັນໃຈ ຄໍາປະເສີດ ຜູ້ອໍານວຍການ ໂຮງຮຽນ ມຕ ຄູນຄໍາ, ມີບັນດາທ່ານໃນຄະນະກໍາມະການພັກເມືອງ, ຫົວໜ້າ – ຮອງຫົວໜ້າຫ້ອງການ,ຄະນະອໍານວຍການໂຮງຮຽນ,ຄະນະປົກຄອງບ້ານເທສະບານ,ພະນັກງານຫ້ອງການສຶກສາເມືອງ, ພະນັກງານຄູອາຈານ, ນັກສະແດງແຕ່ລະຫ້ອງ, ແຕ່ລະຊັ້ນຮຽນ ຂອງໂຮງຮຽນ ມຕຄູນຄໍາ ຕະຫຼອດຮອດພໍ່ແມ່ນັກຮຽນເຂົ້າຮ່ວມ.
ການຈັດພິທີການແຂ່ງຂັນສິລະປະວັນນະຄະດີໃນຄັ້ງນີ້ກໍເພື່ອເປັນການປະຕິບັດຕາມຫ້າຫຼັກມູນຂອງການຈັດຕັ້ງປະຕິບັດຫຼັກສູດໃນການຮຽນ – ການສອນ ຂອງຫ້ອງການສຶກສາທິການ ແລະ ກິລາເມືອງວາງອອກແຕ່ລະໄລຍະຄື : ປັນຍາສຶກສາ, ຄຸນສົມບັດສຶກສາ, ແຮງງານສຶກສາ, ພາລະສຶກສາ ແລະ ສິລະປະສຶກສາ, ສ້າງໃຫ້ເຂົາມີຫົວຄິດປະດິດສ້າງ, ກ້າຄິດກ້າເຮັດ ແລະ ກ້າສະແດງອອກ ເປັນຕົ້ນໄດ້ນໍາເອົາ 03 ລາຍການຄື : ລາຍການຟ້ອນ, ລາຍການຮ້ອງເພງ ແລະ ການລຳ ໃນຈໍານວນ 07 ຫ້ອງຮຽນ ເຂົ້າຮ່ວມແຂ່ງຂັນ, ເຊິ່ງແຕ່ລະຫ້ອງໄດ້ເອົາໃຈໃສ່ໃນການແຂ່ງຂັນດ້ວຍສະຕິປັນຍາ ທີ່ໄດ້ປະດິດຄິດແຕ່ງ ແລະ ຝຶກຊ້ອມມາດ້ວຍບັນຍາກາດອັນເບີກບານມ່ວນຊື່ນ. ຜົນການແຂ່ງຂັນສິລະປະວັນນະຄະດີລະຫ່ວາງຫ້ອງຕໍ່ຫ້ອງຂອງໂຮງຮຽນ ມຕ ຄູນຄໍາໃນປີນີ້ຄື :


ລາຍການຮ້ອງເພງ :
ໄດ້ຮັບລາງອັນດັບທີ 1 : ຫ້ອງມໍ 04 ໄດ້ຮັບເງິນສົດ 100,000 ກີບ.
ອັນດັບທີ 2 : ຫ້ອງ ມໍ 3ຂໍ ໄດ້ຮັບເງິນ ສົດ 80,000 ກີບ.
ທີ 3 : ຫ້ອງ ມໍ3ກ ຮັບເງິນລາງວັນ 50,000 ກີບ.
ແລະ ລາງວັນຊົມເຊີຍມີ 04 ລາງວັນ ລາງວັນລະ 30,000 ກີບ.
ລາຍການຮ້ອງລໍາ :
ໄດ້ຮັບລາງອັນດັບທີ 1 : ຫ້ອງມໍ 04 ໄດ້ຮັບເງິນສົດ 100,000 ກີບ.
ອັນດັບທີ 2 : ຫ້ອງ ມໍ 3ຂໍ ໄດ້ຮັບເງິນ ສົດ 80,000 ກີບ.
ທີ 3 : ຫ້ອງ ມໍ2ຂໍ ຮັບເງິນລາງວັນ 50,000 ກີບ.
ແລະ ລາງວັນຊົມເຊີຍມີ 04 ລາງວັນ ລາງວັນລະ 30,000 ກີບ.
ແລະ ລາຍການຟ້ອນ :
ໄດ້ຮັບລາງອັນດັບທີ 1 : ຫ້ອງມໍ 04 ໄດ້ຮັບເງິນສົດ 200,000 ກີບ.
ອັນດັບທີ 2 : ຫ້ອງ ມໍ2ຂໍ ໄດ້ຮັບເງິນ ສົດ 150,000 ກີບ.
ທີ 3 : ຫ້ອງ ມໍ2ກ ຮັບເງິນລາງວັນ 100,000 ກີບ.
ແລະ ລາງວັນຊົມເຊີຍມີ 04 ລາງວັນ ລາງວັນລະ 50,000 ກີບ.
ໃນຕອນທ້າຍ ທ່ານ ກິລຳພັນ ພິມມະຈັກ ຮອງຫົວໜ້າຫ້ອງການສຶກສາທິການ ແລະ ກິລາເມືອງໄດ້ມີຄໍາເຫັນຊີ້ນໍາ ເຊິ່ງທ່ານໄດ້ຍ້ອງຍໍຊົມເຊີຍຄະນະອໍານວຍການໂຮງຮຽນພ້ອມດ້ວຍຄູອາຈານ ແລະ ນ້ອງນັກຮຽນ ໂຮງຮຽນດັ່ງກ່າວ ທີ່ເອົາໃຈໃສ່ໃນການຈັດຕັ້ງປະຕິບັດຕາມແຜນການຮຽນ – ການສອນ, ພ້ອມນັ້ນທ່ານຍັງໄດ້ຮຽກຮ້ອງມາຍັງຄະນະພັກ,ອົງການປົຄອງເມືອງ, ບ້ານຕະຫຼອດຮອດພໍ່ແມ່ນັກຮຽນໃຫ້ການຊຸກຍູ້ໃຫ້ມີຜູ້ເຂົ້າຮ່ວມຢ່າງເປັນຂະບວນຟົດຟື້ນກ່ວາເກົ່າ, ຮຽກຮ້ອງມາຍັງຄະນະອໍານວຍການໂຮງຮຽນທີ່ໄດ້ວາງແຜນ,ຄັດເລືອກ ແລະ ຝຶກຊ້ອມເອົານັກສະແດງໃຫ້ມີຫຼາກຫຼາຍລາຍການ ແລະ ຫຼາຍປະເພດກ່ວາເກົ່າ ໂດຍສະເພາະການຟ້ອນ, ການຮ້ອງ ແລະ ການລຳຕ້ອງໃຫ້ຖືກຕ້ອງຕາມຫຼັກໄວຍະກອນ, ກ້າສະແດງອອກໃຫ້ຫຼາຍກວ່າເກົ່າພ້ອມນັ້ນຕ້ອງໄດ້ພື້ນຟູ, ປົກປັກຮັກສາວັດທະນະທໍາຮີດຄອງປະເພນີອັນດີງາມ ຂອງຊາດກໍຄື ຂອງທ້ອງຖິ່ນໃຫ້ຍືນຍົງຕະຫຼອດໄປ.

ພາບ : ຂ່າວ ລັດສະໝີ
ໂທຣ : 030 9444 974