ໃນວັນທີ 08 ເມສາ 2021 ທີ່ຜ່ານມານີ້ຢູ່ທີສະໂມສອນເມືອງ ຄູນຄໍາ ແຂວງ ຄໍາມ່ວນ ໄດ້ຈັດກອງປະຊຸມປຶກສາຫາລືກ່ຽວກັບການຫ້າງຫາກະກຽມຈັດງານສະເຫຼີມສະຫຼອງປະເພນີບຸນປີໃໝ່ລາວ ຢູ່ເມືອງຄູນຄໍາ ຂຶ້ນໂດຍພາຍໃຕ້ການເປັນປະທານຂອງ ທ່ານ ນ. ບຸນເກື້ອ ໃສມະນີ ກຳມະການພັກເມືອງ ປະທານແມ່ຍິງເມືອງ, ທ່ານ ນ. ສົມແຖວ ສີສຸກລາດ ກຳມະການພັກເມືອງ ເລຂາຄະນະບໍລິຫາງານຊາວໜຸ່ມເມືອງ, ເຊິ່ງມີຫົວໜ້າ ຮອງຫົວໜ້າຫ້ອງການ, ພະນັກງານວິຊາການສະມາຊິກຊາວໜຸ່ມ ແມ່ຍິງ ກຳມະບານ ພາຍໃນເມືອງເຂົ້າຮ່ວມຢ່າງພ້ອມພຽງ.

ສໍາລັບການປຶສາຫາລືກ່ຽວກັບການຫ້າງຫາກະກຽມຈັດງານສົ່ງທ້າຍປີເກົ່າ ພສ 2563 ແລະ ຕ້ອນຮັບປີໃໝ່ ພສ 2564 ທີ່ຈະມາເຖິງນີ້, ທ່ານ ແກ້ວເທພາ ໄຊທົງເດດ ຫົວໜ້າຫ້ອງການວິທະຍາສາດ ແລະ ເຕັກໂນໂລຊີ ເມືອງ ໄດ້ຂຶ້ນຜ່ານຂໍ້ຕົກລົງຂອງທ່ານ ປະທານແນວລາວສ້າງຊາດເມືອງ ສະບັບເລກທີ 05/ນສ.ຊມ ລົງວັນທີ 06 ເມສາ 2021 ວ່າດ້ວຍການແຕ່ງຕັ້ງຄະນະຊີ້ນຳ ແລະ ອານຸກຳມະການຮັບຜິດຊອບງານສູດຊຳລະ ແລະ ຮັບໂຊກໄຊ ປີຄສ 2021 ພສ 2564. ຈຸດປະສົງຂອງ ກອງປະຊຸມດັ່ງກ່າວກໍ່ເພື່ອມອບໝາຍຄວາມຮັບຜິດຊອບຂອງແຕ່ລະອານຸເຊັ່ນ : ອານຸຮັບຜິດຊອບສະຖານທີ່ ແສງສີສຽງ ແລະ ຕົບພະຊາຍ, ອານຸຮັບຜິດຊອບພາຂວັນໝາກເບັງ ແລະ ອານຸຮັບຜິດຊອບພາຈັງຫັນຮັບແຂກ. ທັງນີ້ກໍ່ເພື່ອເປັນການຮັດແໜ້ນຄວາມສາມັກຄີລະຫວ່າງການນຳຂອງເມືອງ ພະນັກງານທຸກທົ່ວໜ້າຕະຫຼອດຮອດການຈັດບ້ານໃຫ້ນັບມື້ນັບແໜ້ນແຟ້ນຂື້ນກວ່າເກົ່າ ໂດຍມີການຈັດແບບເບົາບາງກະທັດຮັດ ແລະ ຮັກສາໄດ້ຮີດຄອງປະເພນີທີ່ເຄີຍສືບທອດກັນມາແຕ່ບູຮານນະການ ແລະ ສືບຕໍ່ປະຕິບັດມາດຕະການປ້ອງກັນສະກັດກັ້ນການແຜ່ລະບາດພະຍາດໂຄວິດ19 ຢ່າງເຂັ້ນງວດ.ເຊິ່ງານດັ່ງຈະໄດ້ມີຂື້ນວັນທີ 12 ເມສາ 2021 ທີ່ຈະມາເຖິງນີ້.

ຂ່າວ/ພາບ: ລັດສະໝີ ຈູມໂພຄໍາ 030 944 4974