ໃນຕອນເຊົ້າມື້ນີ້ ວັນທີ 9 ກັນຍາ 2021 ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆ ຈຳປາສັກ ໄດ້ຖະແຫຼງຜ່ານສື່ມວນຊົນ ໂດຍອວຍພອນໄຊອັນປະເສີດມາຍັງຜູ້ນຳພັກ-ລັດ, ພະນັກງານທະຫານຕຳຫຼວດຕະຫຼອດຮອດປະຊາຊົນບັນດາເຜົ່າຊາວແຂວງຈຳປາສັກ ເນື່ອງໃນໂອກາດສົ່ງທ້າຍປີເກົ່າ ພສ 2563 ແລະ ຕ້ອນຮັບປີໃໝ່ລາວ ພສ 2564 ເຊິ່ງໃນບົດອວຍພອນທ່ານເຈົ້າແຂວງຈຳປາສັກ ໄດ້ສະແດງຄວາມຮູ້ບູນຄຸນມາຍັງຜູ້ນຳສູນກາງພັກ-ລັດຖະບານທີ່ໄດ້ເອົາໃຈໃສ່ຊີ້ນຳຢ່າງໃກ້ຊິດຕໍ່ຄະນະພັກ-ອົງການປົກຄອງແຂວງ, ສະແດງຄວາມຂອບໃຈມາຍັງພະນັກງານທະຫານຕຳຫຼວດປະຊາຊົນລາວບັນດາເຜົ່າຊາວແຂວງຈຳປາສັກ ທີ່ໄດ້ສາມັກຄີອັນເປັນປຶກແຜ່ນໃນການປະຕິບັດແຜນພັດທະນາເສດຖະກິດ-ສັງຄົມຂອງແຂວງຈຳປາສັກ ໃຫ້ສາມາດຜ່ານຜ່າຄວາມຫຍຸ້ງຍາກຕ່າງໆ ຢ່າງຕັ້ງໜ້າ ສືບຕໍ່ເຮັດໃຫ້ທົ່ວແຂວງຈຳປາສັກ ມີສະຖຽນນະພາບທາງດ້ານການເມືອງ, ເສດຖະກິດມີການຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ, ສັງຄົມມີຄວາມສະຫງົບໂດຍພື້ນຖານ.
ຊຶ່ງປີ 2020 ຜ່ານມາ ເສດຖະກິດກໍ່ຂະຫຍາຍຕົວໃນລະດັບ 3,63% ທຽບໃສ່ແຜນແມ່ນຫຼຸດ 0,87% (ມະຕິສະພາ 4,5%) ລວມຍອດພະລິດຕະພັນພາຍໃນ ປະຕິບັດໄດ້ 20.553,28 ຕື້ກີບ (ແຜນ 20.101,07 ຕື້ກີບ) ທຽບໃສ່ແຜນປີ ປະຕິບັດໄດ້ 102,25% ສະເລ່ຍຕໍ່ຫົວຄົນໄດ້ 3.054 ໂດລາສະຫະລັດຕໍ່ຄົນ ຫຼື ເທົ່າກັບ 27,62 ລ້ານກີບຕໍ່ຄົນ, ລາຍຮັບງົບປະມານທີ່ສະພາຮັບຮອງ ປະຕິບັດໄດ້ 1.317,04 ຕື້ກີບ, ທຽບໃສ່ແຜນດັດແກ້ ປະຕິບັດໄດ້ 90,43%, ການລົງທຶນພາຍໃນ ແລະຕ່າງປະເທດມີບັນຍາກາດໃໝ່, ການບໍລິການທ່ອງທ່ຽວ ໄດ້ຮັບການຍົກລະດັບຢ່າງຕໍ່ເນື່ອງ. ພາຍໃນແຂວງ ມີ 641 ບ້ານມີໄຟຟ້າໃຊ້ 100%, ໃນນັ້ນ ມີຫຼາຍກິດຈະການ ໄດ້ສຳເລັດການກໍ່ສ້າງ ແລະດຳເນີນການຜະລິດ-ການບໍລິການຢ່າງເປັນປົກກະຕິຕໍ່ເນື່ອງ, ດ້ານການທ່ອງທ່ຽວ ໄດ້ຮັບການປັບປຸງດີຂຶ້ນກວ່າເກົ່າ, ດ້ານການສຶກສາ, ສາທາລະນະສຸກ, ວັດທະນະທຳ-ສັງຄົມ ກໍ່ໄດ້ຮັບການພັດທະນາ ແລະສືບຕໍ່ຂະຫຍາຍຕົວດ້ວຍທ່ວງທ່າ ແລະບາດກ້າວໃໝ່ ໄປສູ່ທ້ອງຖິ່ນຮາກຖານຢ່າງທົ່ວເຖິງ.
ທ່ານ ປອ ວິໄລວົງ ບຸດດາຄຳ ເຈົ້າແຂວງໆຈຳປາສັກຍັງໄດ້ຮຽກຮ້ອງມາຍັງທຸກພາກສ່ວນໃນສັງຄົມສືບຕໍ່ປະກອບສ່ວນຢ່າງແຂງແຮງເຂົ້າໃນການປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງຈຳປາສັກໃຫ້ປະກົດຜົນເປັນຈິງກໍຄືປະຕິບັດໜ້າທີ່ຍຸດທະສາດປົກປັກຮັກສາ ແລະ ສ້າງສາພັດທະນາແຂວງຈຳປາສັກ ກໍ່ຄືປະເທດ ຊາດໃຫ້ຈະເລີນກ້າວໜ້າຢ່າງບໍ່ຢຸດຢັ້ງ .

ພາບ-ຂ່າວ: ເກດສະໜາ ແກ້ວສຸວັນນະແສງ