ວັນທີ 12 ເມສາ 2021 ທີ່ຫ້ອງປະຊຸມສະພາປະຊາຊົນ ເຂດເລືອກຕັ້ງທີ 6 ແຂວງຫຼວງພະບາງ ໄດ້ຈັດຖະແຫຼງຜົນສໍາເລັດກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງຫຼວງພະບາງ ຊຸດທີ II ໂດຍການໃຫ້ຄໍາຖະແຫຼງການຂອງ ທ່ານ ນາງ ແກ້ວລາ ມະນີຈິດ ຄະນະປະຈໍາສະພາປະຊາຊົນແຂວງ ເລຂາທິການປະຈໍາສະພາປະຊາຊົນ ແຂວງຫຼວງພະບາງ ຊຸດທີ II ໂດຍມີບັນດາສື່ມວນຊົນຫຼາຍພາກສ່ວນພາຍໃນແຂວງເຂົ້າຮ່ວມ.
ທ່ານ ນາງ ແກ້ວລາ ມະນີຈິດ ກ່າວວ່າ: ຂ້າພະເຈົ້າ ຕາງໜ້າຄະນະປະຈໍາສະພາປະຊາຊົນແຂວງຫຼວງພະບາງ ຂໍຖືເປັນກຽດ ໃນການຖະແຫຼງຂ່າວຕໍ່ສື່ມວນຊົນທຸກພາກສ່ວນ, ພະນັກງານ, ທະຫານ, ຕຳຫຼວດ, ນັກທຸລະກິດ,ປັນຍາຊົນ, ກໍາມະກອນຊາວ ຜູ່ອອກແຮງງານ ແລະປະຊາຊົນບັນດາເຜົ່າໃນທົ່ວແຂວງຫຼວງພະບາງຮັບຊາບ ກ່ຽວກັບຜົນສໍາເລັດຂອງກອງປະຊຸມຄັ້ງປະຖົມມະລຶກ ຂອງສະພາປະຊາຊົນ ແຂວງຫຼວງພະບາງ ຊຸດທີ II ໄດ້ໄຂຂຶ້ນລະຫວ່າງວັນທີ 7-8 ເມສາ 2021 ໂດຍມີການນໍາພັກ-ລັດຂັ້ນສູງຂອງແຂວງ, ເຈົ້ານະຄອນ, ເຈົ້າເມືອງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ແລະແຂກຖຶກເຊີນເຂົ້າຮ່ວມ. ກອງປະຊຸມຄັ້ງນີ້ ໄດ້ຄົ້ນຄ້ວາພິຈາລະນາຮັບຮອງເອົາການເລືອກຕັ້ງປະທານ-ຮອງປະທານສະພາປະຊາຊົນແຂວງ ຊຸດທີ II ແລະຄະນະປະຈໍາສະພາປະຊາຊົນຊຸດທີ II, ຮັບຮອງເອົາໂຄງປະກອບກົງຈັກການຈັດຕັ້ງ ຂອງສະພາປະຊາຊົນແຂວງ, ຮັບຮອງເອົາການເລືອກຕັ້ງປະທານຄະນະກໍາມະການ, ເລຂາທິການ ແລະຮອງປະທານຄະນະກໍາມະການສະພາປະຊາຊົນແຂວງ ແລະຮັບຮອງເອົາ ຮອງເຈົ້າແຂວງຫຼວງພະບາງ ເພີ່ມຕື່ມ 1 ທ່ານ, ຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະແຜນງົບປະມານ 5ປີ(2016-2020), ແຜນ 5ປີ (2021-2025) ຂອງແຂວງ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ 5 ປີ (2016-2020) ແລະແຜນ 5 ປີ (2021-2025) ຂອງອົງການໄອຍະການປະຊາຊົນແຂວງ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ຂອງສານປະຊາຊົນແຂວງໄລຍະ 5 ປີ ( 2016-2020) ແລະແຜນ 5 ປີ(2021-2025) ແລະ ຮັບຮອງເອົາທິດທາງການເຄື່ອນໄຫວວຽກງານ 5ປີ (2021-2025) ຂອງສະພາປະຊາຊົນແຂວງຊຸທີ II. ໄລຍະດໍາເນີນກອງປະຊຸມສະພາປະຊາຊົນແຂວງໄດ້ສະເໜີໃຫ້ 5 ພາກສ່ວນຂື້ນຊີ້ແຈງຕໍ່ຄໍາຊັກຖາມ ກ່ຽວກັບບາງບັນຫາທີ່ພົບເຫັນ ໃນການຈັດຕັ້ງປະຕິບັດແຜນການ 5 ປີຄັ້ງທີ VIII (2016-2020) ແລະທິດທາງແຜນ 5 ປີຄັ້ງທີ IX (2021-2025) ຂອງອົງການປົກຄອງແຂວງ, ບົດລາຍງານການຈັດຕັ້ງປະຕິບັດວຽກງານ 5 ປີ (2016-2020) ແລະທິດທາງແຜນການ 5ປີ(2021-2025) ຂອງອົງການໄອຍະການປະຊາຊົນແຂວງ ແລະສານປະຊາຊົນແຂວງ ທີ່ສະມາຊິກສະພາປະຊາຊົນແຂວງໄດ້ຍົກຂຶ້ນ ເຊິ່ງປະກອບມີ: ຮອງເຈົ້າແຂວງ, ພະແນກການເງິນແຂວງ, ອົງການໄອຍະການປະຊາຊົນແຂວງ,ສານປະຊາຊົນແຂວງ ແລະພະແນກພາຍໃນແຂວງ. ຄຽງຄູ່ກັບການພິຈາລະນາຮັບຮອງເອົາບັນຫາສໍາຄັນ ໃນໄລຍະການດໍາເນີນກອງປະຊຸມ ກໍໄດ້ມີປະຊາຊົນພາຍໃນແຂວງສົ່ງຄວາມຄິດເຫັນ, ຜ່ານສາຍດ່ວນ 165 ຈໍານວນ 1 ສາຍ,ຊຶ່ງພົວພັນເຖິງ ດໍາລັດ 272/ລບ ລົງວັນທີ 19 ກັນຍາ 2015 ວ່າດ້ວຍການປະຕິບັດນະໂຍບາຍ ຕໍ່ຜູ່ມີຜົນງານ ແລະຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ຕໍ່ກັບການສະເໜີນີ້, ກອງເລຂາກອງປະຊຸມໄດ້ມອບໝາຍໃຫ້ຄະນະກໍາມະການ ປະຈໍາສະພາປະຊາຊົນແຂວງ ເພື່ອສົມທົບກັບພາກສ່ວນທີ່ກ່ຽວຂ້ອງ ຄົ້ນຄ້ວາແກ້ໄຂໃຫ້ຖືກຕ້ອງ ແລະ ສອດຄ່ອງກັບລະບຽບກົດໝາຍ.
ທັງໝົດນັ້ນ ແມ່ນການຖະແຫຼງຂ່າວ ເພື່ອປະກາດຜົນຂອງກອງປະຊຸມສະພາປະຊາຊົນແຂວງຫລວງພະບາງ ຊຸດທີ II ຕໍ່ບັນດາສື່ມວນຊົນທຸກພາກສ່ວນ, ເພື່ອໃຫ້ພະນັກງານ, ທະຫານ, ຕໍາຫຼວດ, ຜູ້ປະກອບການທຸລະກິດ ແລະ ປະຊາຊົນບັນດາເຜົ່າ ທົ່ວແຂວງຫຼວງພະບາງ ໄດ້ຮັບຊາບທົ່ວເຖິງກັນຢ່າງເປັນທາງການ.
ຕອນທ້າຍຄໍາຖະແຫຼງການດັ່ງກ່າວ ທ່ານ ນາງ ແກ້ວລາ ມະນີຈິດ ເລຂາທິການສະພາປະຊາຊົນແຂວງ ກໍໄດ້ຖືໂອກາດ ຕາງໜ້າສະພາປະຊາຊົນແຂວງ ສະແດງຄວາມຂອບໃຈ ແລະ ອວຍພອນໄຊອັນປະເສີດ ໃນໂອກາດບຸນປີໃໝ່ລາວ ພສ 2564 ນີ້ ມາຍັງບັນດາທ່ານການນໍາພັກ, ລັດ ແລະ ຄະນະນຳທຸກຂັ້ນພາຍໃນແຂວງ ພະນັກ ງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ຕະຫຼອດຮອດປະຊາຊົນບັນດາເຜົ່າທົ່ວແຂວງຫຼວງພະບາງ ຈົ່ງມີສຸຂະພາບແຂງແຮງ, ມີຄວາມຜາສຸກສົມຫວັງໃນຊີວິດ, ສືບຕໍ່ປະສົບຜົນສຳເລັດໃນໜ້າທີ່ວຽກງານ ກໍ່ຄືການດໍາເນີນທຸລະກິດ, ການຜະລິດເປັນສິນຄ້າ, ພ້ອມກັນປະກອບສ່ວນເຂົ້າໃນການສ້າງສາ ພັດທະນາແຂວງຫຼວງພະບາງ ໃຫ້ນັບມື້ກ້າວຂຶ້ນຢ່າງບໍ່ຢຸດຢັ້ງ.
ພາບ-ຂ່າວ: ເພັດສາຄອນ ສິມມະວົງ