ປີນີ້ເປັນອີກປີໜຶ່ງ ສຳລັບການຫຼີ້ນບຸນປີໃໝ່ລາວ ພສ 2564 ຢູ່ທີ່ແຫຼ່ງທ່ອງທ່ຽວອຸທິຍານຕາດເລາະແຂວງສາລະວັນ ທີ່ຢູ່ໃນໄລຍະການເຝົ້າລະວັງ, ປະຕິບັດມາດຕະການຜ່ອນຜັນ, ການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19, ແຕ່ແຫຼ່ງທ່ອງທ່ຽວອຸທິຍານຕາດເລາະ ກໍ່ຍັງຄົງຄອງເປັນແຫຼ່ງທ່ອງທ່ຽວຍອດນິຍົມ ໃນມື້ບຸນປີໃຫມ່ລາວຂອງທຸກໆ ປີ ທີ່ຄົນມາທ່ຽວຫຼາຍທີ່ສຸດໃນແຕ່ລະປີ, ພິເສດໃນມື້ວັນທີ 15 ເມສາ 2021 ກໍ່ມີຜູ້ມາທ່ຽວຢ່າງຫຼວງຫຼາຍ, ແຕ່ບໍ່ໄດ້ມີການຈັດການສ້າງສັນ, ການເສບງັນ ແລະອື່ນໆ ທີ່ເປັນການຊຸມນຸມຜູ້ຄົນທີ່ມີຈໍານວນຫຼວງຫຼາຍ, ຜູ້ມາທ່ຽວສ່ວນຫຼາຍແມ່ນມາຊົມຄວາມງາມຂອງນໍ້າຕົກຕາດເລາະ, ອາບນໍ້າ, ຖ່າຍຮູບ ແລະ ອື່ນໆ.

ທ່ານປໍ ຄ້າຍຄ່ຽມມະນີ ເຈົ້າຂອງເຮືອນພັກປາລະມີໃຫ້ສໍາພາດວ່າ: ປັດຈຸບັນໄດ້ສ້າງຂົວໄມ້ ຂ້າມຈຸດຕ່າງໆ, ຈຸດນ້ຳຕົກຕາດ, ສ້າງຕູບຈຳລອງຂອງຊົນເຜົ່າ, ຈັດສັນສະຖານທີ່ບ່ອນຂາຍອາຫານ, ເຄື່ອງດື່ມຂອງຜູ້ປະກອບການ ໃຫ້ເປັນລະບຽບຮຽບຮ້ອຍ, ປະດັບປະດາສະຖານທີ່ໃຫ້ມີຄວາມສວຍງາມ ແລະສ້າງຈຸດຖ່າຍຮູບ ແນໃສ່ສົ່ງເສີມ, ອະນຸລັກຮີດຄອງປະເພນີອັນດີງາມຂອງຊາດ ກໍ່ຄືຂອງທ້ອງຖີ່ນ, ເພື່ອດຶ່ງເອົານັກທ່ອງທ່ຽວມາທ່ຽວຫຼາຍຂື້ນ.

ພາບ-ຂ່າວ: ນັກຂ່າວໜັງສືພິມ ແຂວງສາລະວັນ