ໃນປີ 2020 ຫລື ພສ 2563 ຜ່ານມາ ສະພາບການຂອງໂລກມີຄວາມຜັນແປໄປຢ່າງສັບສົນ ແລະ ສະຫລັບສັບຊ້ອນ ຊຶ່ງມີທັງກາລະໂອກາດ ແລະ ສິ່ງທ້າທາຍຫລາຍຢ່າງ ເປັນຕົ້ນ: ບັນຫາຫຍຸ້ງຍາກທາງດ້ານເສດຖະກິດ-ການເງິນ, ບັນຫາໄພທໍາມະຊາດ ແລະ ບັນຫາການລະບາດຂອງພະຍາດໂຄວິດ-19 ທີ່ພວມກໍາລັງທໍາຮ້າຍຊິວິດຂອງຄົນໃນທົ່ວໂລກ ແລະ ສືບຕໍ່ເພີ່ມຂຶ້ນຢ່າງຕໍ່ເນື່ອງ.
ບັນຫາດັ່ງກ່າວຢູ່ປະເທດເຮົາ ກໍໄດ້ຮັບຜົນກະທົບບໍ່ໜ້ອຍ ໂດຍສະເພາະຢູ່ແຂວງອັດຕະປື, ແຕ່ຍ້ອນພາຍໃຕ້ການ ຊີ້ນໍາໆ ພາຂອງສູນກາງພັກ-ລັດຖະບານ ກໍຄືຄວາມຮັບຜິດ ຊອບສູງຂອງຄະນະນໍາແຂວງ ບວກກັບ ຄວາມຕື່ນຕົວເປັນເຈົ້າການຂອງປະຊາຊົນບັນດາເຜົ່າຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຈົນສາມາດຍາດໄດ້ຜົນງານກໍຄືສໍາເລັດໃນຫຼາຍດ້ານ.


ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ໃຫ້ສໍາພາດເມື່ອບໍ່ດົນຜ່ານມານີ້ວ່າ: ໃນປີ 2020 ຜ່ານມາ ໂດຍລວມແຂວງອັດຕະປື ຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງລະດັບ 4,6 %, ລາຍຮັບຂອງປະຊາຊົນບັນລຸໄດ້ 2011 ໂດລາ ຫລື ປະມານ 18 ລ້ານ 6 ແສນກີບຕໍ່ຄົນ, ອັນທີ່ພົ້ນເດັ່ນພວກເຮົາສາມາດຈັດເກັບລາຍຮັບເຂົ້າງົບປະມານໄດ້ 146 ຕື້ກວ່າກີບ, ລື່ນແຜນທີ່ສູນກາງວາງເພດານໄວ້ໃຫ້ ຈໍານວນ 25 ຕື້ກວ່າກີບ, ມູນຄ່າສົ່ງອອກປະຕິບັດໄດ້ 120 ລ້ານກວ່າໂດລາ, ລື່ນແຜນ 12%, ປະເພດ ສິນຄ້າສົ່ງອອກຕົ້ນຕໍມີ: ກະແສໄຟຟ້າ, ນໍ້າຕານຊາຍ, ຢາງພາລາແຫ້ງ, ໝາກກ້ວຍ, ໝາກມັງກອນ, ມັນຕົ້ນ ສໍາລັບນໍ້າຕານໂດຍສະເພາະແມ່ນນໍ້າຕານອໍແກນິກ ປັດຈຸບັນພວກເຮົາໄດ້ສົ່ງອອກໄປຈໍາໜ່າຍຢູ່ຕະຫລາດທະວີບເອີລົບ ຫລາຍກວ່າ 10 ປະເທດ ສ່ວນຂົງເຂດວັດທະນະທໍາ-ສັງຄົມ ແລະ ຂົງເຂດອື່ນໆ ກໍໄດ້ຮັບການບູລະນະ, ຊີວິດການເປັນຢູ່ຂອງສະມາຊິກພັກ-ພະນັກງານ, ລັດຖະກອນ, ກໍາລັງປະກອບອາວຸດ ແລະ ປະຊາຊົນບັນດາເຜົ່າທາງດ້ານວັດຖຸ ແລະ ຈິດໃຈກໍນັບມື້ນັບດີຂຶ້ນ ຄວາມທຸກຍາກນັບຖືກຕີຖອຍເປັນກ້າວໆ ຄວາມແຕກໂຕນລະຫວ່າງຕົວເມືອງ ແລະ ຊົນນະບົດກໍ່ນັບມື້ຫຍັບເຂົ້າໃກ້ກັນ.
ທ່ານ ເຈົ້າແຂວງອັດຕະປື ກ່າວຕື່ມວ່າ: ໃນປີ ພສ 2564 ເປັນປີທີ່ມີຄວາມໝາຍຄວາມສໍາຄັນ ເຊິ່ງເປັນປີທໍາອິດຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ XI ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງແຂວງ ຊຶ່ງເປັນປີໜຶ່ງທີ່ມີສິ່ງທ້າທາຍ ແລະ ທົດສອບຫລາຍດ້ານເປັນຕົ້ນ: ການຕ້ານ ແລະ ສະກັດກັ້ນພະຍາດລະບາດໂຄວິດ-19 ເຊິ່ງພວມແຜ່ລາມເປັນວົງກວ້າງໃນທົ່ວໂລກ, ວຽກງານປກຊ-ປກສ, ປະກົດການຫຍໍ້ທໍ້ໃນດ້ານຕ່າງໆ ທີ່ເກີດຂຶ້ນໃນສັງຄົມ, ຄວາມຫຍຸ້ງຍາກທາງດ້ານເສດຖະກິດ ແລະ ອື່ນໆ ຊິ່ງທັງໝົດມັນຮຽກຮ້ອງມາຍັງທຸກພາກສ່ວນຈົ່ງໄດ້ເພີ່ມທະວີຄວາມສາມັກຄີເປັນຈິດໜຶ່ງໃຈດຽວ, ມີຄວາມເປັນເອກະພາບ ດ້ວຍຄວາມຮັບຜິດຊອບສູງ ເພື່ອພ້ອມກັນຜ່ານຜ່າທຸກຄວາມຫຍຸ້ງຍາກ, ຕັ້ງໜ້າປະຕິບັດບັນດາຄາດໝາຍສູ້ຊົນທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ XI ຂອງແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ໃຫ້ປະກົດຜົນເປັນຈິງ ແລະ ກ້າວຂຶ້ນຢ່າງບໍ່ຢຸດຢັ້ງ.
ພາບ-ຂ່າວ: ວັດທະນາ