ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ເຊື່ອມຊຶມຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ( 2012-2025 ) ຂອງແຂວງຫຼວງພະບາງ ໄດ້ຈັດຂື້ນໃນວັນທີ 21 ເມສາ 2021 ທີ່ຫ້ອງວ່າການແຂວງ ໂດຍການເປັນປະທານຂອງສະຫາຍ ນາງ ປານີ ຢ່າທໍ່ຕູ້ ຮອງປະທານປະເທດແຫ່ງ ສປປ ລາວ,ມີສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງເຈົ້າແຂວງຫຼວງພະບາງ ພ້ອມດ້ວຍຄະນະປະຈໍາພັກແຂວງ,ກໍາມະການພັກແຂວງ,ເຈົ້າເມືອງ,ຫົວໜ້າພະແນກການ ແລະ ພະນັກງານຫຼັກແຫຼ່ງອ້ອມຂ້າງແຂວງເຂົ້າຮ່ວມ.

ກອງປະຊຸມຄັ້ງນີ້ ເຊິ່ງເປັນຊຸດທີ I ເປັນການເຊຶ່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ແລະ ເຊື່ອມຊຶມແຜນພັດທະນາເສດຖະກິດ-ສັງຄົມ 5 ປີ( 2021-2025 ) ຂອງແຂວງຫຼວງພະບາງ ເພື່ອໃຫ້ພະນັກງານນໍາພາ-ຄຸ້ມຄອງ,ພະນັກງານຫຼັກແຫຼ່ງຂັ້ນແຂວງ,ເມືອງ-ນະຄອນ ຊຸດທີ I ໄດ້ກໍາແໜ້ນບັນຫາສໍາຄັນ ທີ່ພົວພັນເຖິງວຽກງານ,ການກໍານົດເປັນແຜນວຽກ,ເປັນໂຄງການ,ເປັນກິດຈະກໍາລະອຽດຂອງຄະນະພັກຂັ້ນຕ່າງໆ,ຂະແໜງການຕ່າງໆຢູ່ພາຍໃນແຂວງ ເພື່ອນໍາພາ-ຊີ້ນໍາບັນຊາຕົວຈິງໃຫ້ມີຜົນສໍາເລັດຕາມຄາດໝາຍທີ່ມະຕິ XI ວາງໄວ້.ຈາກນັ້ນຍັງຈະໄດ້ຈັດຕັ້ງຜັນຂະຫຍາຍມະຕິດັ່ງກ່າວ ເປັນຊຸດທີ II ຢູ່ບັນດາຂະແໜງການອ້ອມຂ້າງແຂວງ,ເມືອງ-ນະຄອນ ຢູພາຍໃນແຂວງຫຼວງພະບາງ ເພື່ອລົງເລິກຄົ້ນຄວ້າແຜນວຽກ,ໂຄງການ,ກິດຈະກໍາລະອຽດຕົວຈິງທີ່ຈະນໍາພາ-ຊີ້ນໍາຈັດຕັ້ງປະຕິບັດວຽກງານຢູ່ແຕ່ລະຂະແໜງການບັນດາເມືອງ-ນະຄອນ ຕື່ມອີກ.


ວາລະກອງປະຊຸມສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງເຈົ້າແຂວງຫຼວງພະບາງ ກໍໄດ້ຂື້ນຜ່ານບົດມະຕິ XI ເຊິ່ງມີບາງຕອນວ່າ: ການຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ເຂົ້າສູ່ຊີວິດສັງຄົມຕົວຈິງ,ແນໃສ່ໃຫ້ການນໍາແຕ່ລະຂັ້ນຮັບຮູ້ເຂົ້າໃຈຢ່າງເລິດເຊິ່ງ ແລະ ກໍາແໜ້ນເນື້ອໃນຂອງມະຕິດັ່ງກ່າວ,ໂດຍສະເພາະແມ່ນເນື້ອໃນສໍາຄັນເປັນຕົ້ນຕໍ ແລະວຽກງານຈຸດສຸມທີ່ຕ້ອງເອົາໃຈໃສ່ນໍາພາ-ຊີ້ນໍາ ໃນແຕ່ລະຂົງເຂດວຽກງານ ຕາມຄວາມຮັບຜິດຊອບຂອງຕົນ ຕິດພັນກັບການເສີມຂະຫຍາຍຄວາມເປັນເຈົ້າການ ຂອງບັນດາກະຊວງ-ອົງການ,ບັນດາແຂວງ,ນະຄອນຫຼວງ ກໍຄືຂະແໜງການ ແລະທ້ອງຖິ່ນຕ່າງໆ ໃນການຫັນມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ໃຫ້ເປັນແຜນງານ,ໂຄງການ ແລະ ກິດຈະກໍາລະອຽດຂອງຕົນ ແລະສາມາດສ້າງໄດ້ຜົຮສໍາເລັດໃໝ່ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ໃນໄລຍະໃໝ່.