ໃນຕອນບ່າຍວັນທີ 22 ເມສາ 2021 ທີ່ຫ້ອງປະຊຸມສະພາປະຊາຊົນແຂວງເຊກອງ, ທ່ານ ນາງ ຄໍາໄພ ວິລະສານ ຕາງໜ້າຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງເຊກອງ ມີຄວາມຍິນດີ ແລະ ຖືເປັນກຽດແຈ້ງມາຍັງບັນດາທ່ານ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ ພໍ່ແມ່ພີ່ນ້ອງ ປະຊາຊົນບັນດາເຜົ່າຊາວແຂວງເຊກອງພວກເຮົາ ໄດ້ຮັບຊາບ ກ່ຽວກັບຜົນສໍາເລັດຂອງກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງເຊກອງ ຊຸດທີ II ດັ່ງນີ້: ກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນຕອນເຊົ້າ ວັນພຸດ ວັນທີ 7 ເມສາ 2021 ແລະ ໄດ້ດໍາເນີນມາຮອດຕອນເຊົ້າ ຂອງວັນພະຫັດ, ວັນທີ 8 ເມສາ 2021 ເຊິ່ງໄດ້ໃຊ້ເວລາດໍາເນີນກອງປະຊຸມ 01 ວັນເຄິ່ງ. ໃນກອງປະຊຸມຄັ້ງນີ້ ນອກຈາກການເຂົ້າຮ່ວມ ຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງແລ້ວ ຍັງມີການນໍາພັກ-ລັດ ຂັ້ນສູງຂອງແຂວງ, ມີອົງການຈັດຕັ້ງມະຫາຊົນ, ພະນັກງານບໍານານອາວຸໂສປະະຕິວັດ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງເຊກອງ ຊຸດທີ II ໃນຄັ້ງນີ້່ ແມ່ນໄດ້ສຸມໃສ່ຄົ້ນຄວ້າ, ພິຈາລະນາ ແລະ ຕົກລົງບາງບັນຫາສໍາຄັນພື້ນຖານຂອງທ້ອງຖິ່ນ ໂດຍໄດ້ອອກເປັນມະຕິກອງປະຊຸມ ດັ່ງນີ້:1) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາການເລືອກຕັ້ງປະທານສະພາປະຊາຊົນແຂວງ ຊຸດທີ II;
2) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາການເລືອກຕັ້ງຮອງປະທານສະພາປະຊາຊົນແຂວງ ຊຸດທີ II;
3) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາການເລືອກຕັ້ງ ກໍາມະການຄະນະປະຈໍາສະພາປະຊາຊົນແຂວງ ຊຸດທີ II;
4) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງການແຕ່ງຕັ້ງປະທານ, ຮອງປະທານກໍາມະການ ແລະ ເລຂາທິການສະພາສະພາປະຊາຊົນແຂວງ ຊຸດທີ II;
5) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 5 ປີ ຂັ້ນແຂວງ;
6) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາແຜນການເຄື່ອນໄຫວ 5 ປີ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ;
7) ມະຕິ ກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາແຜນການດໍາເນີນງານ 5 ປີ ຂອງສະພາປະຊາຊົນແຂວງ ຊຸດທີ II;
ຕາງໜ້າຄະນະປະຈຳສະພາປະຊາຊົນແຂວງ, ຂ້າພະເຈົ້າຂໍຂອບໃຈມາຍັງບັນດາທ່ານ ພະນັກ ງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າທຸກຊັ້ນຄົນ ໃນທົ່ວແຂວງເຊກອງ ທີ່ໄດ້ຕິດຕາມການດຳເນີນກອງປະຊຸມ ຄັ້ງປະຖົມມະລືກ ຂອງສະພາປະຊາຊົນແຂວງ ຊຸດທີ II ຄັ້ງນີ້.


ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງພາກສ່ວນສື່ມວນຊົນແຂວງເຊກອງ ໂດຍສະເພາະສື່ອອນລາຍສະພາປະຊາຊົນແຂວງ, ສື່ວິທະຍຸ-ໂທລະພາບ, ສື່ສິ່ງພິມ-ອອນລາຍ, ວິທະຍຸ-ໂທລະພາບ ກອງບັນຊາການທະຫານແຂວງ ແລະ ວິທະຍຸ-ໂທລະພາບ ກອງບັນຊາການ ປກສ ແຂວງ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການກ່ຽວກັບການ ດຳເນີນກອງປະຊຸມໃນຄັ້ງນີ້ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ.


ຂໍອວຍພອນໄຊອັນປະເສີດມາຍັງບັນດາທ່ານການນໍາພັກ-ລັດທຸກຂັ້ນ, ພະນັກງານ-ລັດຖະ ກອນ, ທະຫານ, ຕໍາຫຼວດ, ນັກຮຽນ, ນັກສຶກສາປັນຍາຊົນ, ກໍາມະກອນ, ພໍ່ຄ້າຊາວຂາຍ, ພໍ່ແມ່ພີ່ນ້ອງປະຊາຊົນບັນດາເຜົ່າແຂວງເຊກອງ ຈົ່ງມີສຸຂະພາບແຂງແຮງ, ມີຄວາມສຸກໃນຊີວິດສ່ວນຕົວ ແລະ ຄອບຄົວ ປະສົບຜົນສໍາເລັດໃນໜ້າທີ່ວຽກງານຂອງຕົນທຸກປະການ