ຈາກການລະບາດຂອງພະຍາດໂຄວິດ -19 ທີ່ນັບມື້ຮ້າຍແຮງ ຫາງສຽງອອນລາຍໄດ້ຕັ້ງບັນຫາເລື່ອງຜູ້ນຳເຊື້ອມາແຜ່ ແລະ ຜູ້ອຳນວຍຄວາມສະດວກໃຫ້ແກ່ຊາຍໄທ ນ້ຳເບີ 50 ທີ່ຂ້າມຈາກທ່າບໍ່ມາຫາດກັນຊາ ນະຄອນຫຼວງວຽງຈັນ ກໍ່ຄືຜູ້ຕິດເຊື້ອ ເບີ 59 ທີ່ພົວພັນກັບຊາຍໄທສອງຄົນທີ່ຂ້າມຈາກມຸກດາຫານ ມາ ສະຫວັນນະເຂດ…ຜູ້ກ່ຽວຂ້ອງທັງໝົດນັ້ນເຈົ້າໜ້າທີ່ເພິ່ນສາມາດສອບສວນເຫັນໝົດແລ້ວ.

ຜູ້ຂຽນຄິດວ່າ: ຫຼັງຈາກປິ່ນປົ່ວຫາຍດີຂອງເບີ 50 ແລະ 59 ແລ້ວຕ້ອງເຂົ້າສູ່ຂະບວນການຍຸຕິທຳແນ່ນອນ, ດັ່ງນັ້ນ ກະແສສັງຄົມຕ້ອງທຸ່ນທ່ຽງ ເພາະຢູ່ປະເທດເຮົາບໍ່ມີໃຜຢູ່ນອກເໜືອກົດໝາຍໄດ້. ຕ້ອງທຳໃຈດີປະໃຫ້ຂະບວນການຍຸຕິທຳເພິ່ນດຳເນີນຕາມຂັ້ນຕອນເຖິງວ່າ ມັນຈະບໍ່ທັນໃຈເຮົາ ກໍບໍ່ໝາຍຄວາມວ່າຈະມີການປ່ອຍປະລະເລີຍ.

ຫາກເປີດເບິ່ງກົດໝາຍ ແລະ ນິຕິກຳທີ່ກ່ຽວຂ້ອງຈະເຫັນວ່າຜູ້ຕິດເຊື້ອໂຄວິດນ້ຳເບີ 50 ແລະ 59 ມີການລະເມີດກົດໝາຍ ກໍ່ຄືນິຕິກຳກ່ຽວຂ້ອງເຊັ່ນ: ລະເມີດດຳລັດເລກທີ 21/ລບ ລົງວັນທີ 20-01-2021 ຂອງລັດຖະບານ  ວ່າດ້ວຍ ການປັບໃໝ ແລະ ນຳໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມຄອງຄົນຕ່າງປະເທດຢູ່ ສປປ ລາວ, ເຊັນໂດຍທ່ານນາຍົກລັດຖະມົນຕີ ທອງລຸນ ສີສຸລິດ. ເຊິ່ງໃນນັ້ນ ລະເມີດໂຈ່ງແຈ້ງ ມາດຕາ 12: ການຫຼົບຫຼີກການກວດກາ ຫຼື ບໍ່ປະທັບຕາແຈ້ງເຂົ້າ-ອອກຈາກເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງປະຈຳຊາຍແດນ ແລະ ສະໜາມບິນສາກົນ, ມາດຕາ 13: ການອຳນວຍຄວາມສະດວກ ຫຼື ຊ່ວຍເຫຼືອຄົນເຂົ້າ-ອອກ ສປປ ລາວ ໂດຍບໍ່ຖືກຕ້ອງ.

ສຳລັບກົດໝາຍແມ່ນລະເມີດຕໍ່ປະມວນກົດໝາຍອາຍາ ເລກທີ 013/ສພຊ ລົງວັນທີ 17/05/2017 ໂດຍສະເພາະ ມາດຕາ 199: ການແຜ່ເຊື້ອພະຍາດທີ່ຮ້າຍແຮງ. ບໍ່ແມ່ນແຕ່ເບີ 50 ແລະ ເບີ 59 ທີ່ຕ້ອງເຂົ້າສູ່ຂະບວນການຍຸຕິທຳ… ພວກອຳນວຍຄວາມສະດວກໃຫ້ພວກກ່ຽວທັງໝົດກໍ່ຕ້ອງເຂົ້າສູ່ຂະບວນການຍຸຕິທຳເຊັ່ນກັນ.

ສະຫຼຸບແລ້ວ ກໍລະນີນີ້ຍັງຄົງຕ້ອງໃຊ້ເວລາສືບສວນ-ສອບສວນ ແລະ ດຳເນີນຄະດີຢ່າງເດັດຂາດໃນຂັ້ນຕໍ່ໄປ. ຂໍໃຫ້ສັງຄົມອຸ່ນອ່ຽນ ແລະ ເຊື່ອໝັ້ນຕໍ່ການຈັດຕັ້ງ.

Medialaos MMD (ແຫຼ່ງຂໍ້ມູນຈາກ: ທິດດີ)