ຂປລ. ເຫດການຈັດງານບຸນບັ້ງໄຟ ຢູ່ບ້ານໂພນສິມ ນະຄອນໄກສອນພົມວິຫານ ໃນຄັ້ງວັນທີ 2 ພຶດສະພາ 2021 ທີ່ຜ່ານມານີ້ນັ້ນ ອຳນາດການປົກຄອງເປັນເອກະພາບກັນວ່າ ການຈັດງານບຸນບັ້ງໄຟຄັ້ງນີ້ແມ່ນການລັກເຮັດ ແລະ ເປັນການລະເມີດຕໍ່ຄຳສັ່ງຂອງຂັ້ນເທິງ ແລະ ບໍ່ໄດ້ຮັບອະນຸຍາດຈາກເຈົ້ານະຄອນໄກສອນແຕ່ຢ່າງໃດ ໃນຂະນະທີ່ນາຍບ້ານໆໂພນສິມ ກໍໄດ້ຖືກປົດຕຳແໜ່ງແລ້ວ ພ້ອມຈະດໍາເນີນການປະຕິບັດລະບຽບຕໍ່ຜູ້ມີສ່ວນຮ່ວມໃນການລະເມີດຄັ້ງນີ້ຕໍ່ໄປຕາມການຕົກລົງເຫັນດີ ຂອງຄະນະພັກ-ຄະນະປົກຄອງນະຄອນໄກສອນພົມວິຫານ.
ທ່ານ ແຖ່ນແກ້ວ ພົມບິດາ ຮອງເຈົ້ານະຄອນໄກສອນພົມວິຫານ ທັງເປັນປະທານຄະນະສະເພາະກິດປ້ອງກັນ ສະກັດກັ້ນ ຄວບຄຸມ ແລະ ແກ້ໄຂພະຍາດໂຄວິດ-19 ນະຄອນໄກສອນພົມວິຫານ ແຂວງສະຫວັນນະເຂດ ໄດ້ຖະແຫລງການກ່ຽວກັບເຫດການຈັດງານບຸນບັ້ງໄຟ ຢູ່ບ້ານໂພນສິມ, ນະຄອນໄກສອນພົມວິຫານ, ແຂວງສະຫວັນນະເຂດ ໃນວັນທີ 3 ພຶດສະພາ 2021 ນີ້ວ່າ: ຂ້າພະເຈົ້າຕາງໜ້າໃຫ້ແກ່ຄະນະພັກ-ຄະນະປົກຄອງນະຄອນໄກສອນພົມວິຫານ ຂໍອະໄພ ແລະ ສະແດງຄວາມຮັບຜິດຊອບຕໍ່ເຫດການຈັດງານບຸນບັ້ງໄຟ ຢູ່ບ້ານໂພນສິມ ໃນຄັ້ງວັນທີ 2 ພຶດສະພາ 2021 ທີ່ຜ່ານມານີ້ນັ້ນ ເຊິ່ງການຈັດງານບຸນບັ້ງໄຟ ຂອງອຳນາດການປົກຄອງບ້ານໂພນສິມໃນຄັ້ງນີ້ ໃນເບື້ອງຕົ້ນນາຍບ້ານໂພນສິມ ໄດ້ເຮັດໜັງສືສະເໜີມາຫາເຈົ້ານະຄອນໄກສອນພົມວິຫານ ໃນຄັ້ງວັນທີ 26 ມີນາ 2021 ແລະ ຄະນະປົກຄອງນະຄອນໄກສອນ ກໍໄດ້ມີຄຳເຫັນວ່າໃຫ້ຈັດຕາມປະເພນີຕາມຮີດຕາມຄອງ ສຳຄັນຕ້ອງມີການປ້ອງກັນພະຍາດໂຄວິດ-19 ຢ່າງເຂັ້ມງວດ, ໃນເວລານັ້ນການລະບາດຂອງພະຍາດໂຄວິດ-19 ຍັງບໍ່ມີການຕິດເຊື້ອ ແລະ ແຜ່ເຊື້ອຫລາຍ ແລະ ເຈົ້ານະຄອນ ກໍບໍ່ໄດ້ມີຄຳສັ່ງ ຫລື ຄຳແນະນຳໃຫ້ມີການເລື່ອນການຈັດງານຕາມທີ່ເຟດບຸກອອກທາງສື່ອອນລາຍນັ້ນ, ການເລື່ອນ ແລະ ການອະນຸມັດຈັດງານແມ່ນການຕົກລົງເຫັນດີຂອງອຳນາດການປົກຄອງບ້ານ ພ້ອມການຈັດຕັ້ງເຖົ້າແກ່ແນວໂຮມພາຍໃນບ້ານເທົ່ານັ້ນ.

ການຈັດງານບຸນບັ້ງໄຟທີ່ບ້ານໂພນສິມ ນະຄອນໄກສອນພົມວິຫານ ແມ່ນອຳນາດການປົກຄອງບ້ານເຖົ້າແກ່ແນວໂຮມ ໄດ້ມີການກະກຽມຫ້າງຫາມາແຕ່ຕອນເຊົ້າ ຂອງວັນທີ 2 ພຶດສະພາ 2021 ມາເຖິງເວລາປະມານ 12 ໂມງ ໄດ້ມີການເຕົ້າໂຮມກັນ ຈຸດປະສົງແມ່ນຈະຈັດແບບກະທັດຮັດຕາມຮີດຕາມຄອງ, ແຕ່ເມື່ອມີການເຕົ້າໂຮມກັນ ຈຶ່ງໄດ້ມີປະຊາຊົນໃນບ້ານແຮ່ກັນມາເຕົ້າໂຮມກັນຫລາຍຂຶ້ນ ແລະ ໄດ້ມີການແຮ່ອ້ອມສິມວັດໂພນສິມໜຶ່ງຮອບ, ມີການດື່ມເຫລົ້າເບຍ, ຫລິ້ນນ້ຳເປື້ອນ, ນ້ຳມັນ ແລະ ເສບແຮ່ ຕາມຮີດຄອງປະເພນີທີ່ເຄີຍປະຕິບັດຜ່ານມາ ຊຶ່ງມີຜູ້ເຂົ້າຮ່ວມປະມານ 200 ກວ່າຄົນ (ມີແຕ່ປະຊາຊົນພາຍໃນບ້ານ ເພາະທາງບ້ານໄດ້ສັ່ງປິດບ້ານບໍ່ໃຫ້ຜູ້ອື່ນເຂົ້າໄປຮ່ວມນຳ) ມາຮອດເວລາປະມານ 14:00 ໂມງ ທາງຄະນະນຳນະຄອນ ໄດ້ເຫັນເຫດການດັ່ງກ່າວໃນເຟດບຸກ ຈຶ່ງໄດ້ຊີ້ນຳໃຫ້ຄະນະສະເພາະກິດນະຄອນໄກສອນ ລົງກວດກາ ແລະ ສະຫລາຍການຈັດງານດັ່ງກ່າວ. ເວລາ 15:30 ໂມງ ຄະນະປົກຄອງນະຄອນ ກໍໄດ້ເອີ້ນຄະນະປົກຄອງບ້ານ ພ້ອມເຖົ້າແກ່ແນວໂຮມມາປະຊຸມກັນຢູ່ຫ້ອງການປົກຄອງບ້ານໂພນສິມ, ມີເຈົ້ານະຄອນ, ຮອງເຈົ້ານະຄອນ, ຜູ້ຊີ້ນຳກຸ່ມບ້ານ, ຫົວໜ້າ ປກສ ແຂວງ ຕາງໜ້າຄະນະສະເພາະກິດແຂວງ ພ້ອມດ້ວຍນາຍບ້ານ, ຮອງນາຍບ້ານ, ເຖົ້າແກ່ແນວໂຮມບ້ານເຂົ້າຮ່ວມ. ໃນກອງປະຊຸມໄດ້ຮັບຟັງການລາຍງານຂອງນາຍບ້ານ ແລະ ຄະນະປົກຄອງບ້ານ, ແນວໂຮມບ້ານ ກ່ຽວກັບການຈັດງານບຸນບັ້ງໄຟຂອງບ້ານໂພນສິມຄັ້ງນີ້ ອຳນາດການປົກຄອງກໍ່ເປັນເອກະພາບກັນວ່າ ການຈັດງານບຸນບັ້ງໄຟຄັ້ງນີ້ ແມ່ນການລັກເຮັດ ແລະ ເປັນການລະເມີດຕໍ່ຄຳສັ່ງ ຂອງຂັ້ນເທິງ ແລະ ບໍ່ໄດ້ຮັບອະນຸຍາດ ຈາກເຈົ້ານະຄອນໄກສອນແຕ່ຢ່າງໃດ ແລະ ຜ່ານມາກໍໄດ້ຮັບຮູ້ວ່າການຂໍສະເໜີຈັດງານນັ້ນ ແມ່ນໄດ້ຖືກລົບລ້າງໄປໃນໂຕແລ້ວ ເພາະໄດ້ມີຄຳສັ່ງຂອງນາຍົກລັດຖະມົນຕີ ເລກທີ 15/ນຍ, ລົງວັນທີ 21 ເມສາ 2021, ຄຳສັ່ງເພີ່ມເຕີມ ຂອງທ່ານເຈົ້າແຂວງ ເລກທີ 0776/ຈຂ.ສຂ, ລົງວັນທີ 24 ເມສາ 2021 ວ່າດ້ວຍການເຫັນດີໃຫ້ປິດແຂວງ ແລະ ຄຳສັ່ງຂອງເຈົ້ານະຄອນໄກສອນພົມວິຫານ ເລກທີ 21/ຈນ,ກສ, ລົງວັນທີ 25 ເມສາ 2021 ວ່າດ້ວຍການເຫັນດີປິດນະຄອນ ໃນຂໍ້ 6 ຊຶ່ງຫ້າມບໍ່ໃຫ້ມີການຈັດກອງປະຊຸມ, ການໂຮມຊຸມນຸມ, ງານດອງ, ງານບຸນປະເພນີ, ງານທາງສາສະໜາ, ງານລ້ຽງສ້າງສັນຕ່າງໆ ເປັນອັນລະອຽດຈະແຈ້ງແລ້ວ.


ຕໍ່ກັບການລະເມີດລະບຽບການ, ຄໍາສັ່ງ, ຄຳແນະນໍາຂັ້ນເທິງ ຂອງອຳດການປົກຄອງບ້ານໃນຄັ້ງນີ້ ຄະນະພັກ-ຄະນະປົກຄອງນະຄອນໄກສອນພົມວິຫານ ແມ່ນໄດ້ປະຊຸມຄົ້ນຄວ້າ ແລະ ເປັນເອກະພາບກັນປະຕິບັດວິໄນຕໍ່ຄະນະພັກ-ຄະນະປົກຄອງບ້ານຕາມລະບຽບການຢ່າງເຂັ້ມງວດ ຄືໄດ້ປົດຕໍາແໜ່ງຜູ້ເປັນເລຂາຄະນະພັກຮາກຖານ, ເລຂາໜ່ວຍພັກ ທັງເປັນນາຍບ້ານໆ ໂພນສິມ ແລ້ວໃນຕອນເຊົ້າວັນທີ 3 ພຶດສະພາ ນີ້ ແລະ ຈະດໍາເນີນການປະຕິບັດລະບຽບຕໍ່ຜູ້ມີສ່ວນຮ່ວມ ໃນການລະເມີດຄັ້ງນີ້ຕໍ່ໄປ ຕາມການຕົກລົງເຫັນດີ ຂອງຄະນະພັກ-ຄະນະປົກຄອງນະຄອນໄກສອນພົມວິຫານ.
ສໍາລັບການປ້ອງກັນຄວບຄຸມສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແມ່ນໄດ້ສັ່ງປິດການເຂົ້າອອກບ້ານໂພນສິມ ແຕ່ຕອນແລງວານນີ້ 2 ພຶດສະພາ 2021 ເປັນຕົ້ນມາບໍ່ໃຫ້ຄົນໃນອອກບ້ານ ແລະ ບໍ່ໃຫ້ຄົນນອກເຂົ້າໃນບ້ານ ເປັນເວລາ 14 ວັນ ແລະ ໃຫ້ພະນັກງານແພດໝໍໃນໂຮງໝໍນ້ອຍຂອງບ້ານ ຕິດຕາມເບິ່ງອາການຂອງປະຊາຊົນ ຖ້າມີອາການຜິດປົກກະຕິ ໃຫ້ກວດກາພະຍາດ ແລະ ກວດຫາເຊື້ອຕໍ່ໄປ. ຂ້າພະເຈົ້າຕາງໜ້າໃຫ້ຄະນະປົກຄອງນະຄອນ ແລະ ຕາງໜ້າໃຫ້ຄະນະສະເພາະກິດນະຄອນໄກສອນພົມວິຫານ ຂໍຮັບຜິດຊອບຕໍ່ເຫດການຄັ້ງນີ້ຕາມລະບຽບການ.