ຄະນະສະເພາະກິດແຈ້ງສະພາບ “ວັນນີ້ 03 ພຶດສະພາ 2021 ມື້ຜ່ານມາໄດ້ກວດວິເຄາະທັງໝົດ 1,810 ຕົວຢ່າງ ແລະ ຜົນພົບຜູ້ຕິດເຊື້ອ COVID-19 ຈຳນວນ + 33 ກໍລະນີ (ໃໝ່), ຜູ້ປິ່ນປົວຫາຍດີ + 09 (ໃໝ່) ລວມ 60 ກໍລະນີ ແລະ ຜູ້ຍັງຮັບການປິ່ນປົວ 906 ກໍລະນີ.”

  1. ນະຄອນຫຼວງວຽງຈັນ (+ 16 ) ກໍລະນີ (ໃໝ່),
  2. ແຂວງຈໍາປາສັກ (+ 04 ) ກໍລະນີ (ໃໝ່),
  3. ແຂວງສະຫວັນນະເຂດ (+ 03 ) ກໍລະນີ (ໃໝ່),
  4. ແຂວງບໍແກ້ວ (+ 07 ) ກໍລະນີ (ໃໝ່),
  5. ແຂວງອຸດົມໄຊ (+ 03 ) ກໍລະນີ (ໃໝ່).

ສຳລັບ ສປປລາວ ມາຮອດປະຈຸບັນ ມີລາຍງານຜູ້ຕິດເຊື້ອທັງໝົດ 966 ຄົນ (+ 33 ຄົນໃໝ່), ບໍ່ມີຜູ້ເສຍຊີວີດ, ໃນຈຳນວນຜູ້ຕິດເຊື້ອທັງໝົດ ແມ່ນໄດ້ຮັບການປິ່ນປົວຫາຍດີ 60 ຄົນ, ຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ ໃນຕ່ລະແຂວງ ຈຳນວນ 906 ຄົນ ເຊັ່ນ:

  1. ນະຄອນຫຼວງວຽງຈັນ 598 ຄົນ (ໃໝ່ 16),
  2. ແຂວງຈຳປາສັກ 121 ຄົນ (ໃໝ່ 04), ສຳລັບຄົນເຈັບແຂວງເຊກອງ ແມ່ນໄດ້ນອນປິ່ນປົວຢູ່ແຂວງຈຳປາສັກ,
  3. ແຂວງບໍ່ແກ້ວ 98 ຄົນ (ໃໝ່ 07),
  4. ແຂວງສະຫວັນນະເຂດ 31 ຄົນ (ໃໝ່ 03),
  5. ແຂວງຫຼວງພະບາງ 13 ຄົນ,
  6. ແຂວງວຽງຈັນ 13 ຄົນ,
  7. ແຂວງສາລະວັນ 07 ຄົນ,
  8. ແຂວງຫຼວງນ້ຳທາ 06 ຄົນ,
  9. ແຂວງອຸດົມໄຊ 08 ຄົນ (ໃໝ່ 03),
  10. ແຂວງຜົ້ງສາລີ 03 ຄົນ,
  11. ແຂວງໄຊຍະບູລີ 03 ຄົນ,
  12. ແຂວງບໍລິຄຳໄຊ 03 ຄົນ,
  13. ແຂວງຄຳມ່ວນ 01 ຄົນ,
  14. ແຂວງຊຽງຂວາງ 01 ຄົນ.

ຄົນເຈັບທຸກຄົນ ແມ່ນມີສຸຂະພາບຮ່າງກາຍ ແລະ ສຸຂະພາບຈິດສົມບູນປົກກະຕິ ແລະ ທຸກຄົນແຂງແຮງດີ.

ວຽກງານວິເຄາະ ກວດຊອກຫາເຊື້ອພະຍາດ ໂຄວິດ-19 ໃນວັນທີ 02 ພຶດສະພາ 2021:
(1). ໄດ້ເກັບຕົວຢ່າງມາກວດວິເຄາະທັງໝົດ 1,810 ຕົວຢ່າງ ຜົນກວດວິເຄາະແມ່ນພົບຜູ້ຕິດເຊື້ອໃໝ່ 33 ຄົນ;
(2). ທົ່ວປະເທດມີຜູ້ເດີນທາງເຂົ້າມາ ທັງໝົດ 552 ຄົນ:

  1. ຈຸດຜ່ານດ່ານ ລາວ – ໄທ ທັງໝົດ 437 ຄົນ;
  2. ຜ່ານດ່ານສະໜາມບີນວັດໄຕສາກົນ 115 ຄົນ
  3. ທຸກຄົນທີ່ເຂົ້າມາທາງຈຸດຜ່ານແດນ ໃນມື້ວານນີ້ ແມ່ນ ໄດ້ຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້, ໄດ້ເກັບຕົວຢ່າງທຸກໆຄົນມາກວດຫາເຊື້ອ COVID-19 ແລະ ນຳສົ່ງໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້.
  4. ວຽກງານການຈຳກັດບໍລິເວນ ຢູ່ສູນຈຳກັດບໍລິເວນປະຈຸບັນທົ່ວປະເທດ ມີສູນຈໍາກັດບໍລິເວນທີ່ເປີດນຳໃຊ້ຢູ່ ທັງໝົດ 57 ສູນ, ມີຜູ້ຈຳກັດບໍລິເວນທັງໝົດ 3,584 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19.

ລາຍລະອຽດ ຂອງຜູ້ຕິດເຊື້ອໃໝ່ + 33 ຄົນ, ກໍລະນີຢັ້ງຢືນທີ (934) – (966):

ສັງລວມປະຫວັດການເດີນທາງຂອງຄົນຫວຽດນາມທີ່ຕິດເຊື້ອ, ສະຖານທີ່ຕ່າງໆ ຄືດັ່ງນີ້:

  • ບ້ານທາດຫຼວງ ໄຊເສດຖາ, ບ້ານນາໄຊ, ເມືອງໄຊເສດຖາ, ບ້ານ ດອນກອຍ, ໄຊເສດຖາ,ບ້ານດອນຕິ້ວ, ເມືອງໄຊທານີ, ເຮັດຮ້ານກາເຟຢູ່ຫ້ອງແຖວ ບ້ານສີສັງວອນ, ຕະຫລາດດອນກອຍ;
  • ວັນທີ 14 ເມສາ 2021, ສະຖານທີ່ອອກກຳລັງກາຍຢູ່ເດີນທາດຫລວງ, ຫລີ້ນປີໃໝ່ຢູ່ຮ້ານຕັດຜົມ Star 2, ຮ້ານຄາຣາໂອເກະຫວຽດ ຕໍ່ໜ້າ ຮ້ານເອັມພ້ອຍ ທາດຫຼວງ;
  • ວັນທີ 11-13 ເມສາ 2021, ຮ້ານຂາຍເຄື່ອງຕະຫຼາດກາງຄືນ ແຄມຂອງ,
  • ຄົນຫວຽດນາມເລາະຕັດເລັບ ແລະ ທາສີເລັບບ້ານ ສີສັງວອນ ແລະ ບ້ານທາດຫຼວງ, ເມືອງ ໄຊເສດຖາ ນະຄອນຫຼວງວຽງຈັນ;
  • ຮ້ານຜົມຕັດຜົມຊາຍ-ຍິງ ຕໍ່ໜ້າຢູນີເທລນາໄຊ;
  • ວັນທີ 12 ເມສາ 2021 ເທັກ ແຄັດໂຮມ ແຖວທາດຫຼວງ;
  • ວັນທີ 14 ເມສາ 2021 ໄປຕະຫຼາດຫົວຂົວຕອນແລງ, ທະນາຄານ MB lao, ຖຸະໜົນໄກສອນ ບ້ານໂພນສະອາດ, ເມືອງ ຈັນທະບູລີ , ໂຮງໝໍຊີວິດໃໝ່ ບ້ານນາໄຊ, ສູນຄວາມງາມຈູລີບີວຕີ ຢູ່ດົງປ່າລານ, ອາຫານຕາມສັ່ງຢູ່ຕໍ່ໜ້າຮ້ານມານາເມ, ບ້ານດອນຕິ້ວ, ຮ້ານສະນຸກເກີ (ຮ້ານຕຳແດງ) ບ້ານດົງປ່າແລບ;
  • ຖ້ຽວບີນ ວັນທີ 21 ເມສາ 2021 ຈາກນະຄອນຫຼວງວຍງຈັນເດີນທາງໄປຫຼວງນ້ຳທາ ຖ້ຽວບີນ 603 ແຕ່ຍົນບໍ່ອະນຸຍາດໃຫ້ລົງແລ້ວກັບມາວຽງຈັນ (ຊ່າງຮັບເໝົາໄຟຟ້າຢູ່ບ້ານຫ້ວຍຫົງ, ເມືອງຈັນທະບູລີ).

ຂໍ້ສັງເກດລວມ ແລະ ຂໍ້ສະເໜີຈາກຄະນະສະເພາະກິດ:
(1). ສະຖານະການໃນປະຈຸບັນເຫັນວ່າ ສປປລາວ, ຍັງມີລາຍງານການຕິດ ເຊື້ອໃໝ່ເພີ້ມຂຶ້ນ ຢ່າງຕໍ່ເນື່ອງໃນແຕ່ລະມື ທັງຢູ່ນະຄອນຫຼວງ ແລະ ບັນດາແຂວງ ໃນທົ່ວປະເທດ ເຫັນໄດ້ວ່າ ເລີ້ມແຕ່ຕົ້ນປິ 2021 ເປັນຕົ້ນມາຮອດມື້ນີ້ ມີ ຜູ້ຕິດເຊື້ອ 925 ຄົນ(ໂດຍສະເພາະແຕ່ເດືອນເມສາ ມາແມ່ນມີຜູ້ຕິດເຊື້ອ ເຖີງ 917 ຄົນ) ຖ້າທຽບໃສ່ໃນປີ 2020 ໝົດປີ ມີຜູ້ຕິດເຊື້ອທັງໝົດ ພຽງແຕ່ 41 ຄົນ ແລະ ໃນໄລຍະດຽວກັນເດືອນພຶດສະພາ 2020 ຜູ້ຕິດເຊື້ອມີພຽງ 19 ຄົນ ເຫັນວ່າເປັນໂຕເລກທີ່ມີຄວາມແຕກຕ່າງກັນຫຼາຍເທົ່າ:

(2). ຕໍ່ກັບສະພາບດັ່ງກ່າວລັດຖະບານ, ຄະນະສະເພາະກິດຂັ້ນສູນກາງ ແລະ ທ້ອງຖິ່ນກໍໄດ້ມີຄຳສັ່ງ, ແຈ້ງການ ແລະ ຄຳແນະນຳຕ່າງໆ ກ່ຽວກັບມາດຕະການສະກັດກັ້ນ ແລະ ຄວບຄຸມການລະບາດຂອງພະຍາດອອກມາເປັນແຕ່ລະໄລຍະ ເຊິ່ງປະຈຸບັນກໍແມ່ນປະຕີບັດຕາມຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 15/ນຍ ລົງວັນທີ 21 ເມສາ 2021 ເຊິ່ງມີຜົນໃນການນຳໃຊ້ ຮອດວັນທີ 5 ພຶດສະພາ 2021 ແລະ ພ້ອມດຽວກັນ ອຳນາດການປົກຄອງທຸກຂັ້ນ ກໍໄດ້ເອົາໃຈໃສ່ຕິດຕາມການຈັດຕັ້ງປະຕິບັດມາດຕະການຂອງຄະນະສະເພາະກີດຢ່າງເຂັ້ມງວດ ໂດຍສະເພາະແມ່ນເອົາໃຈໃສ່ຕິດຕາມກວດກາຜູ້ທີ່ກັບມາຈາກປະເທດທີ່ມີການລະບາດຂອງພະຍາດ COVID-19 ຖ້າພົບເຫັນການເຂົ້າມາ ແບບບໍ່ຖືກຕ້ອງໃຫ້ຮີບຮ້ອນແຈ້ງຄະນະສະເພາະກິດໃນຂັ້ນຂອງຕົນຊາບໂດຍທັນທີ ເພື່ອນຳເອົາຜູ້ກ່ຽວໄປກວດຫາເຊື້ອພະຍາດ ແລະ ຈຳກັດບໍລິເວນຕາມລະບຽບການ.

(3). ໃນສະພາບປະຈຸບັນເຫັນວ່າມີປະຊາຊົນຈຳນວນຫຼາຍໃນສັງຄົມ ໄດ້ມາສະເໜີໂຕມາຂໍກວດຊອກຫາເຊື້ອພະຍາດ COVID-19 ຍ້ອນເຫັນວ່າຕົນເອງຜູ້ທີ່ໄດ້ສຳຜັດກັບກໍລະນີຕິດເຊື້ອ ຫຼື ເດີນທາງໄປສະຖານທີ່ສ່ຽງ ແລະ ອີກອັນໜື່ງທີ່ສຳຄັນ ສຳລັບຜູ້ທີ່ໄດ້ສຳຜັດກັບກໍລະນີຕິດເຊື້ອ ຫຼື ເດີນທາງໄປສະຖານທີ່ສ່ຽງແມ່ນຕ້ອງແຍກໂຕເອງອອກຈາກຄົນໃກ້ຊິດ ແລະ ຄົນໃນຄອບຄົວ ພ້ອມທັງຈຳກັດບໍລິເວນ ຢູ່ສະຖານທີ່ພັກເຊົາຂອງຕົນເອງ ພ້ອມທັງໃຫ້ໄປກວດຫາເຊື້ອພະຍາດ COVID-19 ໂດຍໄວຕາມຈຸດບໍລິການກວດທີ່ທີ່ທາງຄະນະສະເພາະກິດກຳນົດໄວ້ ໂດຍໃຫ້ໃສ່ຜ້າປິດປາກ-ດັງ, ຮັກສາມາລະຍາດ ໃນເວລາໄອ-ຈາມໃຫ້ອັດປາກ ແລະ ດັງດ້ວຍກົກແຂນ ແລະ ພາຍຫຼັງກວດແລ້ວໃຫ້ກັບທີ່ພັກຂອງຕົນເອງທັນທີໂດຍປະຕິບັດຮັກສາໄລຍະຫ່າງກັບບຸກຄົນອື່ນ ເປັນເວລາ 14 ວັນ ໂດຍໃຫ້ຕິດຕາມວັດແທກອຸນຫະພູມຮ່າງກາຍທຸກມື້.

(4). ຜູ້ທີ່ມາເກັບຕົວຢ່າງແລ້ວ ໃນລະຫ່ວາງລໍຖ້າຜົນກວດ ແມ່ນໃຫ້ຢູ່ແຕ່ສະຖານທີ່ພັກເຊົາຂອງຕົນເອງເທົ່ານັ້ນ ຫ້າມເດັດຂາດບໍ່ໃຫ້ເດີນທາງອອກໄປຂ້າງນອກ, ບໍ່ໃຫ້ໃກ້ຊິດກັບຄົນອື່ນ, ສຳລັບຜູ້ສົ່ງອາຫານ, ນ້ຳດື່ມແມ່ນໃຫ້ສົ່ງຢູ່ໜ້າຫ້ອງ ແລະ ອອກໄປທັນທີພາຍຫຼັງສົ່ງອາຫານ:

  1. ຖ້າຜົນກວດຂອງທ່ານພົບເຊື້ອ (+) ແມ່ນຈະມີພະນັກງານແພດໂທແຈ້ງຜົນກວດຫາທ່ານ ແລະ ຈະມີລົດແພດໄປຮັບທ່ານຢູ່ສະຖານທີ່ພັກເພື່ອໄປປີ່ນປົວຢູ່ຕາມໂຮງໝໍທີ່ໄດ້ກຳນົດໄວ້;
  2. ຖ້າບໍ່ມີພະນັກງານໂທແຈ້ງຜົນກວດກໍ່ໃຫ້ທ່ານສືບຕໍ່ຈຳກັດບໍລິເວນຕົນເອງຢູ່ສະຖານທີ່ພັກເຊົາ ແລະ ຮັກສາໄລຍະຫ່າງຈາກບຸກຄົນອື່ນຈົນກ່ວາຈະຄົບ 14 ວັນ (ເພາະໄລຍະບົ່ມເຊື້ອພະຍາດອາດຈະສະແດງອາການ ຫຼື ບໍ່ສະແດງອາການ) ພາຍຫຼັງຄົບກຳນົດການຈຳກັດບໍລິເວນ ຖ້າບໍ່ມີອາການຜິດປົກກະຕິຫຍັງ ຈຶ່ງສາມາດອອກໄປເຄື່ອນໄຫວດຳເນີນຊິວິດປະຈຳວັນຕາມປົກກະຕິ.

(5). ສຳລັບຈຸດບໍລິການເກັບຕົວຢ່າງ ທີ່ທາງຄະນະສະເພາະກິດກຳນົດໄວ້ໃນນະຄອນຫຼວງວຽງຈັນ ແມ່ນບໍລິການທຸກວັນ ແຕ່ ເວລາ 9 ໂມງ ຫາ 12 ໂມງ ມີຄື:

  1. ມສ ສີໂຄດ,
  2. ສະໝາມກິລາເຈົ້າອານຸາວົງ,
  3. ມສ ລາວຫວຽດ,
  4. ໂຮງໝໍ ເຊດຖາທິລາດ,
  5. ສຳລັບ ໂຮງໝໍພິດຕະພາບ ແມ່ນຈະໄດ້ຮັບກວດສະເພາະຜູ້ທີ່ສຳພັດໃກ້ຊິດ ແລະມີອາການ.

(6). ອີກວຽກງານນຶ່ງທີ່ບໍລິການຄຽງຄູ່ກັບການເກັບຕົວຢ່າງ ກໍຄືການໃຫ້ບໍລິການສັກວັກຊີນ ປ້ອງກັນໂຄວິດ-19 ກໍຂໍໃຫ້ພໍ່ແມ່ປະຊາຊົນ ແລະ ທຸກພາກສ່ວນ ທີ່ນອນໃນກຸ່ມເປົ້າໝາຍ ຈົ່ງພ້ອມໃຈກັນໄປຮັບການສັກຢາວັກຊີນຕາມສະຖານທີ່ບໍລິການທີ່ໄດ້ກຳນົດໄວ້ ເພື່ອປ້ອງກັນຕົວທ່ານເອງ, ຄອບຄົວຂອງທ່ານ ແລະ ເພື່ອເປັນວິທີທາງໜື່ງທີ່ຈະສະກັດກັ້ນການແຜ່ລະບາດຂອງພະຍາດ ໂຄວິດ-19 ໃນຊຸມຊົນໃນປະເທດເຮົາ.

(7). ຂໍການຮ່ວມມີມາຍັງທຸກທ່ານ ຈົ່ງໄດ້ສືບຕໍ່ຮ່ວມແຮງຮ່ວມໃຈ ເປັນຈິດໜື່ງໃຈດຽວກັນໃນການເອົາໃຈໃສ່ປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດເພື່ອພ້ອມໃຈກັນຕໍ່ສູ້ຕ້ານກັບ COVID-19 ແລະ ພວກເຮົາທຸກຄົນ ຈະພ້ອມກັນຜ່ານຜ່າວິກິດການສະພາບການລະບາດຂອງພະຍາດໃນຄັ້ງນີ້ ໄປພ້ອມໆ ກັນໃຫ້ໄດ້ ແລະ ອີກອັນໜື່ງ ຂໍສະແດງຄວາມຂອບໃຈ ແລະ ຮູ້ບຸນຄຸນມາຍັງພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມທີ່ໄດ້ໃຫ້ສະໜັບສະໜູນເຄື່ອງບໍລິໂພກ ອຸບປະໂພກ ແລະ ອາຫານເຂົ້າກ່ອງ ໃຫ້ແກ່ທີມງານແພດໝໍທີ່ປະຕິບັດໜ້າທີ່ຢູ່ໃນແຕ່ລະຂັ້ນ.