ມີເດຍລາວແຂວງຈຳປາສັກ ຂ່າວ: ທັດຊະນະ ບໍລິສັດ ຮ່ວມປະເມີນຜົນ ແລະ ພັດທະນາການສຳຫລວດບໍ່ແຮ່ ຈຳກັດ JADE, ໄດ້ມອບເງິນຈຳນວນ 50.000.000 ກີບ ໃຫ້ອົງການປົກຄອງແຂວງ, ເພື່ອປະກອບສ່ວນເຂົ້າໃນວຽກງານ ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ຢູ່ ແຂວງຈໍາປາສັກ.

ພິທີມອບ-ຮັບດັ່ງກ່າວ, ໄດ້ມີຂຶ້ນໃນວັນທີ 3 ພຶດສະພາ 2021 ທີ່ຫ້ອງວ່າການແຂວງຈໍາປາສັກ, ມອບໂດຍ ທ່ານ ສຸລິຍາ ແວງຊັງ ຜູ້ອຳນວຍການ ບໍລິສັດຮ່ວມປະເມີນຜົນ ແລະ ພັດທະນາການສຳຫລວດບໍ່ແຮ່ ຈຳກັດ JADE ເປັນກຽດກ່າວຮັບ ໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ເປັນສັກຂີພິຍານ.

ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງຄວາມຂອບໃຈ ແລະ ຊົມເຊີມມາຍັງ ທ່ານຜູ້ອຳນວຍການ ບໍລິສັດຮ່ວມປະເມີນຜົນ ແລະ ພັດທະນາການສຳຫລວດບໍ່ແຮ່ ຈຳກັດ JADE ທີ່ເຫັນໄດ້ເຖິງຄວາມສຳຄັນຂອງວຽກງານສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ຢູ່ແຂວງ. ເນື່ອງຈາກສະພາບລວມການລະບາດຖືວ່າເປັນວົງກວ້າງ ແລະ ຍັງມີທ່າອ່ຽງທີ່ຈະເພີ່ມຂຶ້ນສູງ. ສະນັ້ນ, ການສະໜັບສະໜູນປະກອບສ່ວນຈາກພາກສ່ວນຕ່າງໆຂອງສັງຄົມ ຈຶ່ງເປັນທຶນ ຮອນທີ່ຈຳເປັນໃນວຽກງານດັ່ງກ່າວ ແລະ ອົງການປົກຄອງ ແຂວງຈຳປາສັກ ຈະນໍາໃຊ້ທຶນຮອນຈໍານວນດັ່ງກ່າວ ໃຫ້ຖືກຕ້ອງຕາມວັດຖຸປະສົງ ແລະ ໃຫ້ເກີດປະໂຫຍດສູງສຸດ.
ພ້ອມນີ້, ໃນວັນດຽວກັນ ທ່ານ ນາງ ອໍລະດີ ທອມສັນ ປະທານມູນນິທິຊ່ວຍເຫລືອຜູ້ດ້ອຍໂອກາດ ໄດ້ມອບຕູ້ຊັກຜ້າ TOSHIBA ລຸ້ນ 13 kg ເພື່ອປະກອບເຂົ້າໃສ່ໂຮງໝໍພາກສະໜາມ ປິ່ນປົວຜູ້ທີ່ຕິດເຊື້ອໂຄວິດ -19 ຢູ່ແຂວງຈໍາປາສັກ ອີກດ້ວຍ.