ໃນວັນທີ 4 ພຶດສະພາ 2021 ທີ່ຫໍວັດທະນະທໍາແຫ່ງຊາດ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ສືບຕໍ່ຈັດຂະບວນການສັກຢາວັກຊິນປ້ອງກັນພະຍາດໂຄວິດ-19 ໃຫ້ພະນັກງານ, ລັດຖະກອນ ທົ່ວກະຊວງ ພ້ອມດ້ວຍຄອບຄົວພະນັກງານ ຈຳນວນ 500 ກວ່າຄົນ. ການສັກວັກຊິນໃນຄັ້ງນີ້, ເປັນຄັ້ງທີ 3 ເພື່ອໃຫ້ພະນັກງານ-ລັດຖະກອນ ແລະ ປະຊາຊົນໄດ້ຮັບວັກຊິນປ້ອງກັນພະຍາດໂຄວິດ-19 ຢ່າງທົ່ວເຖິງ ເນື່ອງຈາກວັກຊິນຈະຊ່ວຍສ້າງພູມຕ້ານທານໃນຮ່າງກາຍ ຫລຸດຜ່ອນຄວາມຮຸນແຮງໃນການຕິດເຊື້ອພະຍາດໂຄວິດ.

ແຕ່ເຖິງຢ່າງໃດກໍຕາມ ທຸກຄົນກໍຕ້ອງໄດ້ເອົາໃຈໃສ່ໃນການປະຕິບັດຄຳສັ່ງເລກທີ 15 ລົງວັນທີ 21 ເມສາ 2021 ຂອງນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຢ່າງເຄັ່ງຄັດ ໃນການເຮັດວຽກ, ໂດຍໃຊ້ອຸປະກອນສື່ສານ ແລະ ອຸປະກອນເອເລັກໂຕຣນິກ ແລະ ອິນເຕີເນັດ ເພື່ອເວັ້ນໄລຍະຫ່າງໃນການເຮັດວຽກ ແລະ ຄວບຄຸມການແຜ່ລະບາດຂອງພະຍາດໂຄວິດ-19.

ໂອກາດດຽວກັນນີ້, ທາງຮ້ານເບ່ປີ້ງແບ້ສະຫວັນ ແລະ ເດີ່ນເຕະບານເຟີ້ລາລີ້ ກໍໄດ້ອຸປະຖຳ ເຂົ້າກ່ອງ ຈຳນວນ 100 ກ່ອງ, ນ້ຳດື່ມຈຳນວນ 30 ແພັກ ແລະ M150 ຈໍານວນໜຶ່ງ