ຄິດໄປຄິດມາກໍ່ບໍ່ຢາກເວົ້າຄວາມເກົ່າເລື່ອງຜູ້ຕິດເຊື້ອ ແລະ ເສຍຊີວິດຈາກພະຍາດໂຄວິດ-19 ແຕ່ມັນກໍ່ຈຳເປັນຕ້ອງເວົ້າຕ້ອງເຕືອນນໍ!.

ເຫັນບໍ່? ເສຍຊີວິດຍ້ອນຖືເບົາບໍ່ເຂົ້າໄປປີ່ນປົວໂດຍໄວ; ບໍ່ໃຫ້ການຮ່ວມມືກັບແພດໝໍ; ດຽວນີ້ມີກະແສບໍ່ຢາກປະຕິບັດເຄັ່ງຄັດອີກ ສຳລັບກໍລະນີປີ່ນປົວຫາຍດີເພີ່ນໃຫ້ອອກໂຮງໝໍ; ຢ່າຟ້າວດີໃຈເຖີງແມ່ນວ່າຕົວເລກອອກໂຮງໝໍຫຼາຍຂື້ນ ບໍ່ວ່າຢູ່ນະຄອນຫຼວງວຽງຈັນ ກໍ່ຄືບັນດາແຂວງຕ່າງໆ ເນີ!.

ຕ້ອງປະຕິບັດຕາມຄຳສັ່ງຂອງແພດໝໍຢ່າງເຄັ່ງຄັດ ຄື: ສືບຕໍ່ກັກໂຕເອງຢູ່ເຮືອນອີກ 14 ວັນ, ໃສ່ຜ້າອັດປາກ (mask); ລ້າງມືທຸກຄັ້ງເມື່ອສຳຜັດ ແລະ ຮັກສາໄລຍະຫ່າງຢ່າງນ້ອຍ 1 ແມັດ ກັບຄົນໃນຄອບຄົວ, ວັດແທກອຸນຫະພູມຮ່າງກາຍເປັນປົກກະຕິໃນແຕ່ລະມື້; ຄົບ 14 ວັນ ແລ້ວກັບໄປກວດຫາເຊື້ອ ເມື່ອມີຜົນເປັນລົບຈື່ງອອກສູ່ສັງຄົມ; ເວລາອອກສູ່ສັງຄົມຍັງໃສ່ຜ້າອັດປາກ ຮັກສາໄລຍະຫ່າງ ແລະ ລ້າງມືທຸກຄັ້ງເມື່ອສຳຜັດ ເພາະນີ້ແມ່ນການດຳລົງຊີວິດແບບໃໝ່ ທ່າມກາງພະຍາດໂຄວິດ-19 ເພາະວ່າມັນຈະຢູ່ນຳເຮົາໄປອີກຫຼາຍປີ.

ເວົ້າເລື່ອງປີ່ນປົວນີ້ກໍ່ຕ້ອງຂໍຊົມເຊີຍແພດ-ໝໍ ເພີ່ນບໍ່ວ່າຈະຢູ່ນະຄອນຫຼວງວຽງຈັນ ໂດຍແມ່ນໂຮງໝໍໃຫຍ່ເພີ່ນເກັ່ງຫຼາຍເຊັ່ນ: ໂຮງໝໍມິດຕະພາບ 150 ຕຽງ, ໂຮງໝໍເຊດຖາທິລາດ, ໂຮງໝໍ 103 ກອງທັບ ສ່ວນຕ່າງແຂວງກໍ່ເຊັ່ນກັນມີຂ່າວຄົນປີ່ນປົວຫາຍດີອອກໂຮງໝໍໃນແຕ່ລະມື້ນໍ!.   

ຂໍຊົມເຊີຍ; ເປັນກຳລັງໃຈໃຫ້ແພດໝໍສູ້ຕໍ່ໄປ; ຜູ້ຕິດເຊື້ອ, ຜູ້ຢູ່ໃນກຸ່ມສ່ຽງ, ຜູ້ປີ່ນປົວຫາຍດີກໍ່ຕ້ອງຟັງຄວາມແພດໝໍທໍ່ນັ້ນເພາະນັ້ນຄືຊີວິດ.

ທິດດີ