ຫົວຂໍ້ບົດນີ້ແມ່ນຄັດມາຈາກເນື້ອໃນ ຂອງເອກະສານນຳພາແນວຄິດ ເລກທີ 16/ຄອສພ ລົງວັນທີ 11/5/2021 ວ່າດ້ວຍ: ເພີ່ມທະວີການຊີ້ນຳວຽກງານການເມືອງ-ແນວຄິດ ໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ຂອງຄະນະໂຄສະນາອົບຮົມສູນກາງພັກ ທີ່ສົ່ງເຖີງ: ຄະນະປະຈຳພັກກະຊວງ-ອົງການ; ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ; ຄະນະປະຈຳພັກນະຄອນຫຼວງວຽງຈັນ ແລະ ແຂວງທົ່ວປະເທດ; ຄະນະໂຄສະນາອົບຮົມນະຄອນຫຼວງວຽງຈັນ ແລະ ຄະນະໂຄສະນາອົບຮົມແຂວງໃນທົ່ວປະເທດ.

ເນື້ອໃນເອກະສານທີ່ຕ້ອງໄດ້ກຳແໜ້ນເພື່ອຜັນຂະຫຍາຍຈຸດສຳຄັນແມ່ນໃນຫົວຂໍ້ທີສາມໃຫຍ່ດັ່ງນີ້:

  • ເພີ່ມທະວີການຊີ້ນຳວຽກງານການເມືອງ-ແນວຄິດໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.

ປັດຈຸບັນຜູ້ຕິດເຊື້ອພະຍາດໂຄວິດ-19 ຍັງສືບຕໍ່ມີທ່າອ່ຽງເພີ່ມຂື້ນທຸກໆ ມື້ ເຊີ່ງຈະນຳໄປສູ່ການສ້າງຄວາມສູນເສຍດ້ານຊີວິດ, ສຸຂະພາບ ກໍ່ຄືຜົນກະທົບຢ່າງໜັກໜ່ວງທາງດ້ານເສດຖະກິດ,  ວັດທະນະທຳ-ສັງຄົມ, ການເຄື່ອນໄຫວວຽກງານຕ່າງໆ ຂອງພັກ ແລະ ລັດ.

ເພື່ອສືບຕໍ່ການຈັດຕັ້ງປະຕິບັດຄຳສັ່ງ ເລກທີ 15/ນຍ ແລະ ຄຳສັ່ງແນະນຳ ເລກທີ 87/ຄລສພ; ​ຄະນະພັກແຕ່ລະຂັ້ນຕ້ອງໄດ້ເພີ່ມທະວີວຽກງານອົບຮົມສຶກສາການເມືອງ-ແນວຄິດ, ໂຄສະນາປຸກລະດົມ, ຊຸກຍູ້ໃຫ້ພະນັກງານ, ລັດຖະກອນ, ທະຫານ, ຕຳຫຼວດ, ປະຊາຊົນ ແລະ ຊັ້ນຄົນໃນສັງຄົມ ສືບຕໍ່ປະຕິບັດທິດຊີ້ນຳ ຂອງກົມການເມືອງສູນກາງພັກ ທີ່ວ່າ: ຖືເອົາການຕ້ານ ສະກັດກັ້ນ ຄວບຄຸມ ແລະ ປ້ອງກັນພະຍາດໂຄວິດ-19 ເປັນໜ້າທີ່ຍຸດທະສາດສຳຄັນ ແລະ ຮີບດ່ວນໃນການນຳພາຊີ້ນຳ ແລະ ບັນຊາຕົວຈີງຄືໃນສະພາວະສົງຄາມ; ຖືເປັນປັດໃຈສຳຄັນຕັດສິນກ່ວາໝູ່ ທີ່ຈະຮັບປະກັນໃຫ້ປະເທດເຮົາ ສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19, ຕ້ອງຮັບປະກັນບໍ່ໃຫ້ມີການລະບາດຄັ້ງໃໝ່ ແລະ ລະບາດຮອບໃໝ່ທີ່ທະວີຄູນຂື້ນກ່ວາເກົ່າ. ສະນັ້ນ ຄະນະພັກແຕ່ລະຂັ້ນຕ້ອງຖືເອົາວຽກງານໂຄສະນາສຶກສາອົບຮົມເປັນວຽກກົກ, ເປັນວຽກແຖວໜ້າ ແລະ ເປັນວຽກຮີບດ່ວນຂອງທົ່ວພັກ, ທົ່ວລັດ ແລະ ທົ່ວປວງຊົນທັງຊາດ, ຢ່າງຕັ້ງໜ້າ ເຂົ້າຮ່ວມໃນພາລະກິດໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ເຊີ່ງເປັນທິດຊີ້ນຳເປັນເອກະພາບໃນການຈັດຕັ້ງປະຕິບັດ ແຕ່ສູນກາງຮອດທ້ອງຖີ່ນດ້ວຍຈິດໃຈທີ່ວ່າ: “ສະໜາມຮົບຕ້ານພະຍາດກໍ່ຄືກັນກັບສະໜາມຮົບຕີສັດຕູ” ເຊີ່ງຄະນະພັກແຕ່ລະຂັ້ນ ຕ້ອງເພີ່ມທະວີຊີ້ນຳ-ນຳພາວຽກງານໂຄສະນາສຶກສາອົບຮົມການເມືອງແນວ ຄິດດັ່ງນີ້:

  1. ໂຄສະນາສຶກສາອົບຮົມການເມືອງແນວຄິດ ກ່ຽວກັບການຍົກສູງສະຕິຄວາມຕື່ນຕົວ, ເປັນເຈົ້າການປະກອບສ່ວນທາງດ້ານສະຕິປັນຍາ ແລະ ກຳລັງແຮງທາງດ້ານວັດຖຸຂອງປວງຊົນ, ຂອງທົ່ວຊັ້ນຄົນໃນສັງຄົມໃນການຈັດຕັ້ງປະຕິບັດຄຳສັ່ງ ເລກທີ 15/ນຍ ແລະ ຄຳແນະນຳເລກທີ 87/ຄລສພ ກໍ່ຄືບັນດາແຈ້ງການຂອງຫ້ອງວ່າການສຳນັກງານນາຍົກ, ຂອງຄະນະສະເພາະກິດລະດັບຊາດ, ຄະນະສະເພາະກິດຂອງພາກສ່ວນຕ່າງໆ ທັງສູນກາງ ແລະ ທ້ອງຖີ່ນຢ່າງເຂັ້ມງວດ ແລະ ມີປະສິດທິຜົນສູງ.
  2. ໂຄສະນາສຶກສາອົບຮົມ ແລະ ປຸກລະດົມໃຫ້ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ກຳມະກອນ, ປະຊາຊົນບັນດາເຜົ່າ ແລະ ຊັ້ນຄົນໃນສັງຄົມ ຍົກສູງສະຕິຕື່ນຕົວ ແລະ ເປັນເຈົ້າການໃນການຕໍ່ສູ້ຕ້ານກັບການໂຄສະນາບິດເບືອນໃສ່ຮ້າຍປ້າຍສີ, ສ້າງຂ່າວປອມ, ຂ່າວທີ່ບໍ່ມີມູນຄວມຈີງ ທີ່ອອກຜ່ານທາງສື່ອອນລາຍ, ເຟດບຸກ, ສື່ອິນເຕີເນັດ… ເພື່ອສ້າງຄວາມປັ່ນປ່ວນ,  ສ້າງຄວາມບໍ່ສະຫົງບຢູ່ໃນສັງຄົມ; ປຸກລະດົມຂົນຂວາຍປະຊາຊົນ,​ ຊັ້ນຄົນ, ທຸກພາກສ່ວນ, ທຸກກຳລັງແຮງຢູ່ໃນສັງຄົມ ພ້ອມກັນປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫົງບ ເພື່ອຕ້ານພະຍາດໂຄວິດ-19.
  3. ໂຄສະນາສຶກສາອົບຮົມ ກ່ຽວກັບນໍ້າໃຈຮັກຊາດ, ຈິດໃຈເອກະລາດ, ເປັນເຈົ້າຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ສົ່ງເສີມມູນເຊື້ອດຸໝັ່ນ, ອົດທົນ ແລະ ປະດິດສ້າງໃນການອອກແຮງງານຂອງປະຊາຊົນເຮົາ; ຊຸກຍູ້ຂະບວນການອອກແຮງງານເພີ່ມພູນຜະລິດຜົນ ເປັນຕົ້ນແມ່ນການປູກຝັງ, ລ້ຽງສັດ; ນໍ້າໃຈປະຢັດມັດທະຍັດ ເພື່ອປັບປຸງການດຳລົງຊີວິດຂອງພະນັກງານ, ທະຫານ, ຕຳຫຼວດ ແລະ ປະຊາຊົນເຮົາ ໃນໄລຍະທີ່ພວກເຮົາປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
  4. ໂຄສະນາສຶກສາອົບຮົມ ກ່ຽວກັບມູນເຊື້ອຄວາມສາມັກຄີເປັນເອກະພາບໃນທົ່ວພັກ, ທົ່ວລັດ ແລະ ປວງຊົນທັງຊາດ ເພື່ອເປັນກຳລັງແຮງສັງລວມຮ່ວມແຮງ, ຮ່ວມໃຈໃນການຕ້ານ, ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
  5. ໂຄສະນາສຶກສາອົບຮົມ ກ່ຽວກັບເພີ່ມທະວີຄວາມສາມັກຄີ, ການພົວພັນຮ່ວມມືຮອບດ້ານ ກັບບັນດາປະເທດເພື່ອນມິດຍຸດທະສາດ, ເພີ່ມພູນຄູນສ້າງມູນເຊື້ອສາມັກຄີພິເສດ ແລະ ການຮ່ວມມືຮອບດ້ານ ກັບ ສສ ຫວຽດນາມ; ຂະຫຍາຍການພົວພັນຮ່ວມມືທີ່ເປັນມູນເຊື້ອກັບ ສປ ຈີນ ບົນຈິດໃຈຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານ, ການພົວພັນຮ່ວມມືກັບປະເທດເພື່ອນບ້ານໃກ້ຄຽງ, ບັນດາປະເທດໃນອາຊຽນ ແລະ ປະເທດເພື່ອນມິດ, ອົງການຈັດຕັ້ງສາກົນ, ອົງການຈັດຕັ້ງສັງຄົມ ເພື່ອພ້ອມກັນສະກັດກັ້ນ, ປ້ອງກັນ ແລະ  ຄວບຄຸມການແຜ່ລະບາດຂອງພະຍາດໂຄວິດ-19.
  6. ໂຄສະນາປຸກລະດົມພະນັກງານ, ລັດຖະກອນ, ທະຫານ, ຕຳຫຼວດ, ກຳມະກອນ, ນັກສຶກສາ ແລະ ປະຊາຊົນ, ຊັ້ນຄົນໃນສັງຄົມ ເຂົ້າຮ່ວມຂະບວນການສັກຢາວັກຊິນ ເພື່ອຊ່ວຍປ້ອງກັນການເຈັບເປັນ ແລະ ເສຍຊີວິດຈາກການຕິດເຊື້ອພະຍາດໂຄວິດ-19 ທັງເປັນການປະກອບສ່ວນຊ່ວຍໃນການຕ້ານ, ສະກັດກັ້ນ, ປ້ອງກັນ, ຄວບຄຸມການແຜ່ລະບາດຂອງພະຍາດໂຄວິດ-19.

!ຕ້ອງຖືຈິດໃຈທີ່ວ່າ: ສະໜາມຮົບຕ້ານພະຍາດກໍ່ຄືກັນກັບສະໜາມຮົບຕີສັດຕູ!

ໂດຍ: ທິດດີ