ມີເດຍລາວແຂວງສາລະວັນ ໂດຍທິດລານີ ໂຄດໂຍທາ. ວັນທີ 12 ພຶດສະພາ 2021 ທີ່ຫ້ອງວ່າການແຂວງສາລະວັນ, ບໍລິສັດ ວີເອັສ ເຕັກໂນໂລຢີ ຈຳກັດຜູ້ດຽວ ໄດ້ປະກອບສ່ວນຊ່ວຍເຫຼືອມອບອຸປະກອນທາງການແພດ ໃຫ້ແຂວງສາລະວັນ ເພື່ອເປັນການປະກອບສ່ວນເຂົ້າໃນວຽກງານປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19.

ສຳລັບເຄື່ອງທີ່ນຳມາມອບໃນຄັ້ງນີ້ ປະກອບມີ: ຊຸດ PPE ຈຳນວນ 60 ຊຸດ ແລະ ຜ້າອັດປາກ-ດັງ 1 ແກັດ ຈຳນວນ 50 ກັບ, ລວມມູນຄ່າ 15.000.000 ກີບ. ໂດຍການມອບຂອງ ທ່ານ ໄຊນະຄອນ ບັນຈົງພານິດ ປະທານບໍລິສັດ ວີເອັສ ເຕັກໂນໂລຢີ ຈຳກັດຜູ້ດຽວ, ໃຫ້ກຽດຮັບໂດຍ ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ.

ໂອກາດດຽວກັນນີ້ ທ່ານ ປອ ໂພໄຊ ໄຊຍະສອນ ກໍ່ໄດ້ກ່າວສະແດງຂອບໃຈ ແລະຍ້ອງຍໍຄວາມຊົມເຊີຍ ມາຍັງບໍລິສັດດັ່ງກ່າວ ທີ່ເຫັນໄດ້ຄວາມສຳຄັນຂອງວຽກງານສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ແຂວງສາລະວັນ.