ມີເດຍລາວແຂວງບໍ່ແກ້ວ ວັນທີ 12 ພຶດສະພາ 2021ນີ້ ທ່ານ ຄໍາຈັນ ຈັນທະມາດ ຫົວໜ້າທະນາຄານການຄ້າຕ່າງປະເທດລາວ ສາຂາແຂວງບໍ່ແກ້ວ ມອບເງິນສົດ ຈຳນວນ 10 ລ້ານກີບ. ກ່າວຮັບຂອງ ທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ ພ້ອມຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ -19 ຂັ້ນແຂວງ ເຂົ້າຮ່ວມ.

ທ່ານ ຄໍາຈັນ ຈັນທະມາດ ກ່າວວ່າ: ການມອບເງິນຄັ້ງນີ້ ແມ່ນມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ -19 ຂັ້ນແຂວງຈໍານວນ 10 ລ້ານກີບ ເພື່ອນໍາໃຊ້ເຂົ້າໃນການເຄື່ອນໄຫວປະຕິບັດວຽກງານ ຂອງເຈົ້າໜ້າທີ່ ແລະ ພະ ນັກງານແພດໝໍ ໃນການຕ້ານ ແລະ ສະກັດກັ້ນພະຍາດໂຄວິດ -19 ຢູ່ພາຍໃນແຂວງ. ໃຫ້ມີຄວາມສະດວກ, ວ່ອງໄວ, ຮັບປະກັນຄວາມປອດໄພ ທາງດ້ານສຸຂະພາບ, ຊີວິດ, ຊັບສິນ ຂອງປະຊາຊົນຊາວແຂວງບໍ່ແກ້ວ.ໃຫ້ປອດໄພຈາກເຊື້ອພະຍາດໂຄວິດ -19.

ທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ, ສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈເປັນຢ່າງສູງ ທີ່ໄດ້ເຫັນຄວາມສໍາຄັນ ແລະ ເປັນຫ່ວງເປັນໄຍ ຕໍ່ຊີວິດ ແລະ ຊັບສິນ ຂອງປະຊາຊົນຊາວແຂວງບໍ່ແກ້ວ ທີ່ຖືກການຄຸກຄາມຂອງເຊື້ອພະຍາດໂຄວິດ -19 ໃນຄັ້ງນີ້ ຊຶ່ງເປັນການປະກອບສ່ວນອັນໃຫຍ່ຫຼວງ ໃນການຈັດຕັ້ງປະຕິບັດວຽກງານ ຂອງເຈົ້າໜ້າທີ່, ພະນັກງານແພດໝໍ ຢູ່ຕາມຈຸດກວດກາຕ່າງໆ ໃຫ້ໄດ້ຮັບຜົນດີ.