ມີເດຍລາວແຂວງວຽງຈັນ ພ.ບົວທອງ ນັກຂ່າວ ແຂວງ ວຽງຈັນ. ພິທີມອບ – ຮັບ ຄົນເຈັບ ຕິດເຊື້ອພະຍາດໂຄວິດ-19 ທີ່ໄດ້ເຂົ້າຮັບການປີ່ນປົວຄົບກໍານົດ ແລະ ອາການດີ ໃຫ້ອອກໂຮງໝໍ ກັບໄປສືບຕໍ່ກັກກັນຕິດຕາມອາການຢູ່ບ້ານ ( ຊຸດທີສາມ ຂອງແຂວງວຽງຈັນ ຈຳນວນ 5 ຄົນ ) ໄດ້ຈັດຂື້ນຢູ່ທີ່ ໂຮງໝໍແຂວງ ວຽງຈັນ,ໂດຍເປັນກຽດເຂົ້າຮ່ວມຂອງທ່ານ ຄຳພັນ ສິດທິດຳພາ ເຈົ້າແຂວງ ວຽງຈັນ, ມີຄະນະສະເພາະກິດ ຕ້ານ ແລະ ສະກັດກັ້ນໂຄວິດ-19 ຂອງແຂວງ, ຄະນະອໍານວຍການໂຮງໝໍ ແຂວງ, ໂຮງໝໍເມືອງ ແລະ ຕາງໜ້າອົງການປົກຄອງບ້ານເຂົ້າຮ່ວມ.

ທ່ານ ດຣ ພັນນາລອນ ອຸໄທທິດ ຫົວໜ້າສາຍວິຊາການປີ່ນປົວໄດ້ຂື້ນຜ່ານການຕິດຕາມການປີ່ນປົວຄົນເຈັບທີ່ຕິດເຊື້ອພະຍາດໂຄວິດ-19 ຢູ່ສູນປີ່ນປົວຂອງແຂວງ ໃນໄລຍະຜ່ານມາວ່າ : ຕັ້ງແຕ່ວັນທີ 23 ເມສາ 2021 ມາຮອດປັດຈຸບັນ ມີຄົນເຈັບທີ່ຕິດເຊື້ອເຂົ້າມາປີ່ນປົວຢູ່ສູນ ທັງໝົດ 18 ກໍລະນີ, ເຊິ່ງທີມງານໄດ້ຕິດຕາມ ແລະ ປີ່ນປົວຄົນເຈັບຈົນຫາຍດີ ແລະ ກັບບ້ານ, ໄປແລ້ວ 7 ກໍລະນີ ( 2 ຊຸດ ). ແລະ ມາຮອດມື້ນີ້ ວັນທີ 14 ພຶດສະພາ 2021 ເຊິ່ງເປັນຊຸດທີ 03 ປີ່ນປົວອາການດີ ແລະ ອອກໂຮງໝໍ ຈຳນວນ 5 ກໍລະນີຄື : ເມືອງ ແກ້ວອຸດົມ 03 ກໍລະນີ ແລະ ເມືອງໂພນໂຮງ 02 ກໍລະນີ, ຈຳນວນນີ້ ແມ່ນຈະຕ້ອງໄດ້ສືບຕໍ່ກັກກັນຕົນເອງອີກ 14 ວັນ ແລ້ວກວດເຊື້ອຄືນອີກ ໂດຍທີມແພດຂອງເມືອງ ເປັນຜູ້ເກັບຕົວຢ່າງ ແລະ ອຳນາດການປົກຄອງບ້ານພ້ອມກັນຕິດຕາມການເຄື່ອນໄຫວພວກກ່ຽວ ບໍ່ໃຫ້ອອກນອກສະຖານທີ່ກັກໂຕ.

ມາຮອດປະຈຸບັນ ທົ່ວແຂວງວຽງຈັນ ມີຜູ້ຕິດເຊື້ອໄດ້ຮັບການປີ່ປົວດີແລ້ວທັງໝົດ12 ຄົນ ຍັງສືບຕໍ່ປີ່ນປົວຢູ່ສູນປີ່ນປົວໂຮງໝໍ່ແຂວງວຽງຈັນ ຈຳນວນ 6 ຄົນ ທຸກຄົນແມ່ນມີສຸຂະພາບແຂງແຮງດີ.

ໂອກາດດຽວກັນນີ້ ທ່ານເຈົ້າແຂວງ ຍັງໄດ້ໂອ້ລົມ ເຖິງຜົນຮ້າຍຂອງພະຍາດ ໂຄວິດ-19, ສະແດງຄວາມເປັນຫ່ວງເປັນໄຍຕໍ່ປະຊາຊົນ ໂດຍສະເພາະແມ່ນຜູ້ທີ່ໃກ້ຊິດກັບຄວາມສ່ຽງ ແລະ ການເຝົ້າລະວັງ ຈົ່ງສືບຕໍ່ຕິດຕາມ ແລະ ເປັນເຈົ້າການຮ່ວມກັນໃນການເຝົ້າລະວັງເຊື້ອພະຍາດດັ່ງກ່າວ ທີ່ຍັງແຜ່ລະບາດໃນທົ່ວໂລກ ກໍຄືປະເທດຂອງພວກເຮົາ. ແລະ ທ່ານ ຍັງໄດ້ມອບອຸປະກອນການແພດ ຈຳນວນໜື່ງໃຫ້ກັບໂຮງໝໍແຂວງ ເພື່ອນຳໄປໃຊ້ໃນການປີ່ນປົວຄົນເຈັບຕື່ມອີກ.