ວັນທີ 21 ມິຖຸນາ 2020, ອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຄັ້ງທີ XI ຂອງພັກ.

ນຳພາໂດຍ ທ່ານ ປ້ານ ນ້ອຍມະນີ ກຳມະການສູນກາງພັກ, ປະທານສູນກາງສະຫະພັນກຳມະບານລາວ, ຮອງຫົວໜ້າໜ່ວຍງານຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ພ້ອມດ້ວຍ ທ່ານ ພົຈ. ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດ, ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມຄະນະ ສືບຕໍ່ລົງເຄື່ອນໄຫວເຮັັດວຽກງານ ພົບປະໂອ້ລົມ ແລະ ໃຫ້ທິດຊີ້ນຳ ຕໍ່ພະນັກງານຫຼັກແຫຼ່ງ ຕາງໜ້າຂະແໜງການຕ່າງໆ ທີ່ເມືອງຄຳເກີດ, ແຂວງບໍລິຄຳໄຊ.

ພ້ອມທັງໄດ້ຟັງການລາຍງານ ສະພາບການເຄື່ອນໄຫວວຽກງານຕ່າງໆຂອງເມືອງ ໂດຍການລາຍງານຂອງ ທ່ານ ກີ່ ຊົງລ່າຫວ່າງ, ຮອງເລຂາຄະນະບໍລິຫານງານພັກເມືອງ, ຕາງໜ້າໃຫ້ໜ່ວຍງານຂະບວນການຂອງເມືອງ, ທີ່ສຳນັກງານປົກຄອງ ເມືອງຄຳເກີດ ແຂວງບໍລິຄຳໄຊ.

ຜ່ານການຟັງບົດລາຍງານ ໃຫ້ຮູ້ວ່າ ເມືອງຄຳເກີດ ເປັນເມືອງທີ່ມີຊາຍແດນຕິດຈອດກັບ ສສ.ຫວຽດນາມ ແລະ ມີພູມສັນຖານ ສະພາບອາກາດທີ່ດີ ເປັນເມືອງທີ່ມີທ່າແຮງຫຼາຍດ້ານ ເປັນຕົ້ນແມ່ນ: ທ່າແຮງດ້ານການທ່ອງທ່ຽວ ທາງດ້ານປະຫວັດສາດ ດ້ານວັດທະນະທຳ ດ້ານທຳມະຊາດ, ທ່າແຮງດ້ານການຜະລິດກະສິກຳ ແລະ ອື່ນໆອີກ…ພ້ອມທັງ ມີການຂະຫຍາຍຕົວພັດທະນາຢ່າງຕໍ່ເນື່ອງ ເຊັ່ນວ່າ: ການຂະຫຍາຍພື້ນຖານໂຄງລ່າງ ໄຟຟ້າ, ນ້ຳປະປາ, ຖະໜົນຫົນທາງ ແລະ ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ມີຄອບຄົວຕົວແບບ ໂດຍການສ້າງເສດຖະກິດຄອບຄົວແບບກຸ່ມ ເພື່ອຫາລາຍຮັບເຂົ້າຊຸມຊົນ ແລະ ຄອບຄົວ ເຊັ່ນ: ປູກພືດຜັກ, ປູກໝາກກ້ຽງ ເປັນສິນຄ້າ ສົ່ງຕາມທ້ອງຕະຫຼາດ. ແຕ່ກໍມີສິ່ງທີ່ທ້າທາຍຍັງສືບຕໍ່ແກ້ໄຂ ເຊັ່ນ: ປະກົດການຫຍໍ້ທໍ້ໃນສັງຄົມ ແລະ ອື່ນໆ…ພ້ອມກັນນີ້, ເມືອງຄຳເກີດ ກໍໄດ້ເປັນເຈົ້າການເອົາໃຈໃສ່ປ້ອງກັນການລະບາດຂອງພະຍາດໂຄວິດ -19 ຕາມຈຸດຜ່ານແດນດ່ານສາກົນ ຢ່າງເຄັ່ງຄັດ.

ໃນຕອນທ້າຍ ກໍໄດ້ຟັງການໂອ້ລົມ ແລະ ທິດຊີ້ນຳ ຈາກທ່ານປະທານ ກ່ຽວກັບບັນຫາຕ່າງໆທີ່ຍັງຄົງຄ້າງ ແລະ ໄດ້ຮັບຍ້ອງຍໍຊົມເຊີຍຕໍ່ການນຳພາຂອງອົງຄະນະພັກເມືອງ ຊີ້ນຳ-ນຳພາ ການເຄື່ອນໄຫວວຽກງານຕ່າງໆພາຍໃນເມືອງ ແລະ ສາມາດແກ້ໄຂບັນຫາຕ່າງໆໄດ້ສຳເລັດ. ນອກຈາກນີ້, ທ່ານຍັງໄດ້ເນັ້ນ ກ່ຽວກັບທຳການຜະລິດກະສິກຳ ປູກຝັງ-ລ້ຽງສັດ ກາຍເປັນສິນຄ້າໃຫ້ຫຼາຍຂື້ນ ແລະ ໃຫ້ເປັນເຈົ້າການສືບຕໍ່ໂຄສະນາໃຫ້ແກ່ຂະບວນການກະກຽມກອງປະຊຸມໃຫຍ່ ຄັ້ງທີ XI ຂອງພັກ ແລະ ວັນສຳຄັນຂອງຊາດອີກດ້ວຍ.

Medialaos MMD