ທ່ານ ສະ​ຫວັນ​ຄອນ ຣາຊ​ມຸນ​ຕຣີ ຮອງ​ລັດຖະມົນຕີ​ກະຊວງຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ (ຖວທ) ພ້ອມ​ດ້ວຍ​ຄະນະ​ສະມາຄົມ​ນັກ​ຂ່າວ​ລາວ ຢ້ຽມຢາມ​ໂຄງການ​ເຂດ​ເສດຖະກິດ​ພິເສດ​ບຶງ​ທາດ ຫຼວງ ເມື່ອ​ບໍ່​ດົນຜ່ານ​ມາ ໂດຍ​ການ​ຕ້ອນຮັບ​ຂອງ​ທ່ານ ຟູ້​ຈ້ຽນ ແລະ ທ່ານ ນາງ ຫວງ ຊິ່ວ​ເຫ​ວິນ ຊຶ່ງ​ເປັນ​ຜູ້​ພັດທະນາ​ໂຄງການ​ດັ່ງ​ກ່າວ.
ທ່ານ ຟູ້​ຈ້ຽນ ໄດ້​ລາຍ​ງານ​ສະພາບ​ໂດຍ​ຫຍໍ້​ຂອງ​ໂຄງການ​ໃຫ້​ທ່ານ​ຮອງ​ລັດຖະມົນຕີ​ຮັບ​ຊາບວ່າ: ໂຄງການ​ເຂດ​ເສດຖະກິດ​ພິເສດ​ບຶງ​ທາດຫຼວງ ເປັນ​ໂຄງການ​ທີ່​ລັດຖະບານ​ລາວ ອະນຸຍາດ​ສຳ​ປະທານ​ໃຫ້ ບໍລິສັດ ອະສັງຫາລິມະ​ຊັບ ຫວ່ານ​ເຟີງ​ຊຽງ​ໄຮ້ ສປ ຈີນ ຈຳກັດ ລົງທຶນ​ພັດທະນາ ສ້າງ​ເປັນ​ຕົວ​ເມືອງ​ໃໝ່​ທັນ​ສະໄໝ ທີ່​ມີ​ການ​ພັດທະນາ​ຮອບດ້ານ ໂດຍ​ທີ່​ຕັ້ງ​ຢູ່​ໃຈກາງ​ນະຄອນຫຼວງ​ວຽງ​ຈັນ. ເຂດ​ເສດຖະກິດ​ພິເສດ​ບຶງ​ທາດຫຼວງ ມີ​ອາຍຸ​ການ​ສຳ​ປະທານ 99 ປີ ໄດ້​ອອກ​ແບບ​ການ​ພັດທະນາ ປະກອບ​ມີ ອາຄານ​ຫ້ອງການ, ຮ້ານ​ຊັບ​ພະ​ສິນຄ້າ, ໂຮງແຮມ, ສະຖານທີ່​ບັນເທີງ, ທີ່​ພັກອາ​ໄສ, ໂຮງໝໍ, ໂຮງຮຽນ, ວັດ​ວາ​ອາ​ຮາມ, ສະ​ຖາ​ບັນ​ການ​ເງິນ, ແລະ ອື່ນໆ ຕາມ​ອົງ​ປະກອບ​ຂອງ​ຕົວ​ເມືອງ​ໃໝ່​ສາກົນ​ທີ່​ທັນ​ສະ​ໄ​ໝ ທີ່​ກົມ​ກືນ​ກັບ​ວັດທະນະ​ທຳ​ທ້ອງ​ຖິ່ນ. ເນື້ອທີ່​ໃນ​ການ​ກໍ່ສ້າງ ມີ​ທັງ​ໝົດ 8 ລ້ານຕາລາງ​ແມັດ, ສາມາດ​ຮອງ​ຮັບ​ຄົນ​ເຂົ້າ​ມາ​ພັກອາ​ໄສ, ມາ​ເຮັດ​ວຽກ ແລະ ເຮັດ​ທຸລະ​ກິດ ຢູ່​ໃນ​ເຂດ​ເສດຖະກິດ​ພິເສດ​ບຶງ​ທາດຫຼວງ ແຫ່ງ​ນີ້ ໄດ້​ເຖິງ 3 ແສນ​ກວ່າ​ຄົນ, ພ້ອມ​ນີ້ ໃນ​ທຸກໆ​ປີ​ຍັງ​ສາມາດ​ດຶງ​ດູດ​ນັກ​ທ່ອງ​ທ່ຽວ ເຂົ້າ​ມາ​ທ່ຽວ​ຊົມ​ໂຄງການ ດັ່ງກ່າວ ຫຼາຍ​ກວ່າ 1 ລ້ານ​ຄົນ.

ໂຄງການ​ດັ່ງກ່າວ ແມ່ນ​ ຕັ້ງ​ຢູ່​ໃຈກາງ​​ນະຄອນຫຼວງ​ວຽງ​ຈັນ ຊຶ່ງ​ເປັນ​ທີ່​ຕັ້ງ​ທີ່​ໂດດ​ເດັ່ນ, ສາມາດ​ເອີ້ນ​ໄດ້​ວ່າ “ສູນ​ກາງ​ຕົວ​ເມືອງ​ນະຄອນຫຼວງ​ວຽງ​ຈັນ”, ຕັ້ງ​ຢູ່​ຫ່າງ​ຈາກ​ສະຖານີ​ລົດໄຟ​ລາວ​-​ຈີນ ນະຄອນຫຼວງ​ວຽງ​ຈັນ​ປະມານ 8 ກິໂລແມັດ, ຫ່າງ​ຈາກ​ສະໜາມ​ບິນ​ສາກົນ​ວັດ​ໄຕ 6 ກິໂລແມັດ, ແລະ ຫ່າງ​ຈາກ​ສຳນັກງານ​ນາຍົກລັດຖະມົນຕີ 2 ກິໂລ​ແມັດ. ຮູບ​ແບບ​​ການ​ພັດທະນາ ແລະ ການ​ວາງ​ແຜນ​ຂອງ​ເຂດ​ເສດຖະກິດ​ພິເສດ​ບຶງ​ທາດຫຼວງ ແມ່ນ​ໄດ້​ຖອດ​ຖອນ​ບົດຮຽນ​ການ​ພັດທະນາ ຂອງ ຫຼູ​ເຈ່ຍ​ຈູ໋ຍ ເຂດ​ພູ​ຕົງ​ໃໝ່ ນະຄອນ​ຊຽງ​ໄຮ້ ສປ ຈີນ. ຈຸດ​ສຳຄັນ​ແມ່ນ​ສຸມ​ໃສ່​ການ​ສ້າງ​ເປັນ​ສູນ​ກາງ: ຕຶກ​ຫ້ອງການ​ສຳນັກງານ ອົງການ​ຄຸ້ມ​ຄອງ​ບໍລິຫານ, ສະ​ຖາ​ບັນ​ການ​ເງິນ, ເຂດ​ເຕັກ​ໂນ​ໂລ​ຊີ​ທັນ​ສະໄໝ, ສູນ​ກາງ​ການ​ຄ້າ, ທີ່​ພັກອາໃສ​ຂອງ​ຄົນ​ຊົນ​ຊັ້ນ​ສູງ, ສູນ​ກາງ​ທ່ອງ​ທ່ຽວ ແລະ ວັດທະນະທຳ ພ້ອມ​ດ້ວຍ​ສະຖານທີ່ພັກຜ່ອນ ແລະ ອື່ນໆ. ຕາມ​ອົງ​ປະກອບ​ຕົວ​ເມືອງ​ໃໝ່ ທັນ​ສະໄໝ ຊຶ່ງ​ຈະ​ເປັນ​ສູນ​ກາງ​ຕົວ​ເມືອງ​ໃໝ່ ຂອງ​ນະຄອນຫຼວງ​ວຽງ​ຈັນ​ໃນ​ອະ​ນາ​ຄົດ..

ໂຄງການ​ເຂດ​ເສດຖະກິດ​ພິເສດ​ບຶງ​ທາດຫຼວງ ໃນ 8 ປີຜ່ານມາ​ໄດ້​ກໍ່ສ້າງ​ສຳເລັດ ຫຼາຍ​ຢ່າງເຊັ່ນ: ການ​ປັບ​ໜ້າດິນ​ພື້ນ​ທີ່​ໂຄງການ​ທັງ​ໝົດ, ການ​ກໍ່ສ້າງ​ເສັ້ນທາງ 30 ກິໂລແມັດ​ພາຍ​ໃນ​ເຂດ, ການ​ກໍ່ສ້າງ​ພື້ນຖານ​ໂຄງ​ລ່າງ​ໃຕ້​ດິນ​ທັງ​ໝົດ ແລະ ສຳເລັດ​ການ​ກໍ່ສ້າງ​ອາພາດ​ເມັ້ນ ບຶງ​ທາດຫຼວງ 200.000 ຕາລາງ​ແມັດ ແລະ ຕະຫຼາດ​ກະ​ສິ​ກໍາ, ຖະໜົນ​ການ​ຄ້າ ແລະ ອື່ນໆ. ກ່ອນ​ປີ 2022 ມີ​ການ​ວາງ​ແຜນ​ຈະ​ສ້າງ ຮູບ​ປັ້ນ​ພະ​ພຸດ​ທະ​ຮູບ ໃຫຍ່​ທີ່​ສູງ​ສຸດ​ໃນ​ໂລກ ຊຶ່ງ​ເປັນ​ທີ່​ເຊື່ອ​ຖື​ຂອງ​ຊາວ​ສາສະໜາ​ພຸດ​ທັງຫຼາຍ ເປັນຕົ້ນ​ປະເທດ​ອ້ອມ​ຂ້າງ ສປປ ລາວ ເຊັ່ນ: ໄທ, ກຳປູເຈຍ, ມຽນ​ມາ ແລະ ປະເທດ​ຫວຽດນາມ ຈະ​ເຂົ້າ​ມາ​ກາບ​ໄຫວ້ ພະ​ພຸດ​ທະ​ຮູບ​ດັ່ງ​ກ່າວ. ພາຍຫຼັງ​ຫາກ​ສ້າງ​ສຳເລັດ​ໃນ​ອະນາຄົດ ຈະ​ສາມາດ​ດຶງ​ດູດ​ຊາວ​ພຸດ​ຜູ້​ທີ່​ນັບຖື​ສາສະໜາ​ພຸດ​ຂອງ​ທົ່ວ​ໂລກ ແລະ ຊາວ​ພຸດ​ໃນ​ເຂດ​ປະເທດ​ອາ​ຊຽນ​ເຂົ້າ​ມາ​ນົບ​ໄຫວ້​ບູຊາ, ພ້ອມ​ດຽວ​ກັນ​ນັ້ນ​ກໍ່​ຍັງ​ສາມາດ​ດຶງ​ດູດ​ນັກ​ທ່ອງ​ທ່ຽວ​ເປັນ 10 ລ້ານ​ຄົນ ເພື່ອ​ເຂົ້າ​ມາ​ທ່ອງ​ທ່ຽວ​ໃນ​ນະຄອນຫຼວງ​ວຽງ​ຈັນ. ໃນ​ປີ 2021, ເຂດ​ເສດຖະກິດ​ພິເສດ​ບຶງ​ທາດຫຼວງ ມີ​ແຜນ​ຈະ​ດຶງ​ດູດ​ການ​ລົງທຶນ ເພື່ອ​ສ້າງ​ຖະໜົນ​ການ​ຄ້າ ອ້ອມ​ຮອບ​ບຶງ​ທາດຫຼວງ ແລະ ສິ່ງ​ອຳນວຍ​ຄວາມ​ສະດວກ​ດ້ານ​ການ​ຄ້າ ຊຶ່ງ​ຮູບ​ແບບ​ການ​ຄ້າ​ທີ່​ບຶງ​ທາດຫຼວງ​ໃນ​ອະນາຄົດ ແນ່ນອນ​ຈະ​ເປັນ​ການ​ພັດທະນາ​ເສດຖະກິດ​ຂອງ​ນະຄອນຫຼວງ​ວຽງ​ຈັນ ແລະ ກາຍເປັນ​ຈຸດ​ທ່ອງ​ທ່ຽວ​ແຫ່ງ​ໃໝ່​ໃນ ສປປ ລາວ. ສ່ວນ​ປີ 2021 ຫາ​ປີ 2025, ເຂດ​ເສດຖະກິດ​ພິເສດ​ບຶງ​ທາດຫຼວງ​ຈະ​ດຶງ​ດູດ​ການ​ລົງທຶນ ເພື່ອ​ສ້າງ​ຫໍ​ປະຊຸມ ແລະ ສູນ​ວາງສະແດງ​ແຫ່ງ​ຊາດ​ລາວ, ການ​ກໍ່ສ້າງ​ຫໍ​ປະຊຸມ​ແຫ່ງ​ຊາດ ຈະ​ເປັນ​ການ​ຍົກ​ລະດັບ ແລະ ຍົກ​ບົດບາດ ທາງ​ດ້ານ​ການເມືອງ ໃຫ້​ແກ່ ເຂດ​ເສດຖະກິດ​ພິເສດ​ບຶງ​ທາດຫຼວງ ລວມ​ໄປ​ເຖິງ​ປະເທດ​ລາວ​, ພາກ​ພື້ນ​ອາ​ຊຽນ. ປີ 2020 ຫາ​ປີ 2025, ແຜນ​ຈະ​ສຳເລັດ​ການ​ກໍ່ສ້າງ ສູນ​ກາງ​ການ​ຄ້າ​ບໍລິຫານ​ຄຸ້ມ​ຄອງ ບຶງ​ທາດຫຼວງ ໃນ​ເນື້ອທີ່ 500.000 ຕາລາງ​ແມັດ.