ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານກ່ຽວກັບສະພາບ ຂອງພະຍາດໄຂ້ຍຸງລາຍ ທົ່ວປະເທດ ໃນວັນທີ 27 ສິງຫາ 2020 ນີ້ວ່າ:  ສປປ ລາວ ເຮົາ ມີຜູ້ຕິດເຊື້ອໄຂ້ຍຸງລາຍ ເພີ່ມອີກ 56 ກໍລະນີ ແລະ ມີຜູ້ເສຍຊີວິດເພີ່ມອີກ 1 ຄົນຢູ່ແຂວງສະຫວັນະເຂດ; ນັບແຕ່ວັນທີ 1 ມັງກອນ ຫາ 26 ສິງຫາ 2020 ມີຜູ້ຕິດເຊື້ອກໍລະນີສະສົມ ທັງໝົດ 5.537 ຄົນ ແລະ ເສຍຊີວິດ 9 ຄົນ ແລະ ມາຮອດ ວັນທີ 27 ສິງຫາ 2020 ມີຜູ້ຕິດເຊື້ອ ທັງໝົດ 5.593 ຄົນ ແລະ ເສຍຊີວິດ 10 ຄົນ ໃນນີ້, ແຂວງທີ່ມີການລາຍງານວ່າ ມີຜູ້ຕິດເຊື້ອໄຂ້ຍຸງລາຍ ຫລາຍກວ່າໝູ່ແມ່ນ ນະຄອນຫລວງວຽງຈັນ ເຊິ່ງມີເຖິງ 1.300 ຄົນ, ຖັດລົງມາແມ່ນ ບໍລິຄຳໄຊ 654 ຄົນ, ແຂວງວຽງຈັນ 597 ຄົນ, ບໍ່ແກ້ວ 544 ຄົນ ແລະ ສະຫວັນນະເຂດ 519 ຄົນ. ຈຳນວນຜູ້ເສຍຊີວິດມີນະຄອນຫລວງວຽງຈັນ 4 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ, ຊຽງຂວາງ 1 ຄົນ ແລະ ສະຫວັນນະເຂດ 1 ຄົນ.

ທ່ານ ນາງ ດຣ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມ ພະຍາດຕິດຕໍ່, ກະຊວງສາທາລະນະສຸກ ໄດ້ໃຫ້ຮູ້ວ່າ: ສຳລັບກໍລະນີທີ 10 ທີ່ເສຍຊີວິດ ຈາກພະຍາດໄຂ້ຍຸງລາຍ ແມ່ນ ເປັນເພດຍິງ, ອາຍຸ 32 ປີ, ບ້ານ ທ່າສາລາຄຳ, ເມືອງທ່າປາງທອງ, ແຂວງສະຫວັນນະເຂດ. ຜູ້ກ່ຽວ ມີອາການໄຂ້, ເຈັບຫົວ, ປວດຕົນໂຕ ຈຶ່ງໄດ້ມາກວດຢູ່ໂຮງໝໍເມືອງ ໃນວັນທີ 15 ສິງຫາ 2020 ໂດຍທ່ານໝໍໄດ້ ຕິດຕາມອາການ ແລະ ປິ່ນປົວ ແຕ່ອາການຂອງຜູ້ກ່ຽວ ບໍ່ດີຂຶ້ນ ມີຖ່າຍເປັນສີດຳ, ເມື່ອຍ, ກະວົນກະວາຍ, ຈາກນັ້ນແພດຈຶ່ງໄດ້ນຳສົ່ງໂຮງໝໍແຂວງ ແລະ ໄດ້ເສຍຊີວິດໃນເວລາຕໍ່ມາ. 

ໂອກາດນີ້, ທ່ານຮອງຫົວໜ້າກົມ ຄວບຄຸມພະຍາດຕິດຕໍ່ ກໍໄດ້ຮຽກຮ້ອງມາຍັງ ພໍ່ແມ່ປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈ ໃນການປະຕິບັດ 5ປ ຢ່າງເຄັ່ງຄັດ ໃຫ້ເປັນປະຈຳ ຈຶ່ງສາມາດທຳລາຍແຫລ່ງ ເພາະພັນຂອງຍຸງໄດ້ ໃຫ້ຖືວ່າແມ່ນໜ້າທີ່, ຄວາມຮັບຜິດ ຊອບຂອງໝົດທຸກຄົນ. ຖ້າທ່ານເປັນໄຂ້ ໃຫ້ຮີບຮ້ອນໄປພົບແພດໝໍ ບໍ່ໃຫ້ຊື້ຢາມາກິນເອງ ເພື່ອຈະໄດ້ຮັບການ ປິ່ນປົວຢ່າງທັນການ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)