ມີເດຍລາວແຂວງເຊກອງ
ຂ່າວ: ບູ້ສຸວັນ. ( ວັນທີ 5 ເມສາ 2021 ) ນີ້; ສະຫະພັນກຳມະບານແຂວງເຊກອງ, ໄດ້ຈັດກອງປະຊຸມແຕ່ງຕັ້ງຄະນະກຳມະການ ແລະກອງເລຂາຊ່ວຍວຽກເພື່ອປົກປ້ອງແຮງງານໃນ ແລະນອກລະບົບຂັ້ນແຂວງ, ເຊິ່ງໄດ້ຈັດຂື້ນຢູ່ທີ່ຫ້ອງປະຊຸມຊັ້ນ III ຂອງຫ້ອງວ່າການແຂວງເຊກອງ, ໂດຍການເປັນປະທານຂອງທ່ານ ຄຳສອນ ກອນເຢີ ຄະນປະຈຳພັກແຂວງ ຮອງເຈົ້າແຂວງເຊກອງ, ມີທ່ານ ຄຳພາ ໄຊຍະແສງ ກຳມະການພັກແຂວງ, ປະທານສະຫະພັນກຳມະບານແຂວງ ແລະພ້ອມດ້ວຍບັນດາຄະນະກຳມະການ ແລະກອງເລຂາຊ່ວຍວຽກເພື່ອປົກປ້ອງແຮງງານໃນ ແລະນອກລະບົບຂັ້ນແຂວງ ທີ່ຖືແຕ່ງຕັ້ງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້; ກໍ່ໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງເຊກອງ, ສະບັບເລກທີ 41 / ຈຂ, ຊກ, ລົງວັນທີ 12 ມີນາ 2021 ວ່າດ້ວຍແຕ່ງຕັ້ງຄະນະກຳມະການ ແລະກອງເລຂາຊ່ວຍວຽກປົກປ້ອງແຮງງານໃນ ແລະນອກລະບົບຂັ້ນແຂວງໂດຍສະເພາະຄະນະຊີ້ນຳລວມມີຈຳນວນ 16 ທ່ານ ແລະກອງເລຂາຊ່ວຍວຽກຈຳນວນ 9 ທ່ານ, ເຊິ່ງຈະໄດ້ເປັນແກ່ນສານໃນການປະສານສົມທົບ, ພ້ອມກັນຈັດຕັ້ງປະຕິບັດວຽກງານໃນການປົກປ້ອງສິດຜົນປະໂຫຍດອັນຊອບທໍາຂອງພະນັກງານລັດຖະກອນ, ກໍາມະກອນ ແລະຊາວຜູ້ອອກແຮງານບັນດາເຜົ່າ, ເວົ້າລວມ ເວົ້າສະເພາະກໍ່ຄືຊາວແຂວງເຊກອງ.


ທ່ານ ຄໍໍາພາ ໄຊຍະແສງ ປະທານສະຫະພັນກໍາມະບານແຂວງເຊກອງ, ກໍ່ໄດ້ຂື້ນຜ່ານຮ່າງບົດສະຫຼຸບໃນການຈັດຕັ້ງປະຕິບັດວຽກງານສົ່ງເສີມການປົກປ້ອງທາງສັງຄົມໃຫ້ແກ່ແຮງງານໃນ ແລະນອກລະບົບ ໄລຍະ 5 ປີ ຜ່ານມາ (2017-2021) ແລະຜ່ານແຜ່ນດໍາເນີນງານ 5 ປີຕໍ່ໜ້າ (2021-2025) ເຊິ່ງຈະໄດ້ເອົາໃຈໃສ່ຈັດຕັ້ງປະຕິບັດໃນ 9 ໜ້າວຽກເປັນຕົ້ນ: ລົງໂຄສະນາເຜີຍແຜ່ກົດໝາຍການຄຸ້ມຄອງ-ປົກປ້ອງ ແລະຍຸດທະສາດປົກປ້ອງສັງຄົມແຫ່ງຊາດ, ເຜີຍແຜ່ນິຕິກໍາໃນການປຸກລະດົມຊາວຜູ້ອອກແຮງງານເຂົ້າຮ່ວມກຸ່ມແຮງງານ, ຕິດຕາມຜົນເຈລະຈາຕໍ່ລອງກັບພາກສ່ວນນໍາໃຊ້ແຮງງານ (ສ້າງສັນຍາແຮງງານລວມໝູ່, ບຸກຄົນ), ຕິດຕາມ-ຊຸກຍູ້ເກັບກຳສະພາບການສາຍກ່ຽວພັນແຮງງານ, ຊຸກຍູ້-ສົ່ງເສີມການປະຕິບັດນະໂຍບາຍຕໍ່ພະນັກງານ, ກຳມະກອບໃນການກວດສຸຂະພາບ, ໂຄສະນາເຜີຍແຜ່ຄວາມປອດໄຟໃນການອອກແຮງງານ ແລະການນຳສົ່ງແຮງງານ, ເກັບກຳຫາງສຽງຂອງສັງຄົມ ແລະໄກ່ເກ່ຍຂໍ້ຂັດແຍ່ງດ້ານແຮງງານ, ຕິດຕາມ-ຊຸກຍູ້ການໂຄສະນາປະກັນສັງຄົມ ແລະການປະກັນສຸຂະພາບ, ປັບປຸງຂອດການບໍລິການໃຫ້ມີຄວາມວ່ອງໄວ ແລະປະຕິບັດລະບອບການປະຊຸມຂອງຄະນະກໍາມະການປະຈໍາ 6 ເດືອນຢ່າງເປັນປົກກະຕິ.


ຕອນທ້າຍກອງປະຊຸມທ່ານ ຮອງເຈົ້າແຂວງເຊກອງ, ກໍ່້ໄດ້ໂອ້ລົມຕໍ່ກອງປະຊຸມເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດດ້ານຕ່າໆທີ່ຍາດມາໄດ້ໃນໄລຍະຜ່ານມາ ເປັນຕົ້ນການລົງໂຄສະນາ ຂໍ້ກໍານົດກົດໝາຍ ເພື່ອໃຫ້ຄວາມຮູ້ຂໍ້ມູນຂ່າວສານຕ່າງໆ ທີ່ເປັນປະໂຫຍດແກ່ຊາວຜູ້ອອກແຮງງານ ແລະທ່ານຍັງໄດ້ຮຽກຮ້ອງໃຫ້ສືບຕໍ່ປະຕິບັດວຽກງານດັ່ງກ່າວໃນຊຸມປີຕໍ່ໜ້າທີ່ກຳນົດໄວ້ໃນແຜນດຳເນີນງານໃຫ້ມີປະສິດທິຜົນສູງຂື້ນກວ່າເກົ່າ.