ມີເດຍລາວແຂວງເຊກອງ (ຂ່າວ-ພາບ : ສັນຍາ) ບັນດາອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ ແລະບໍລິສັດລັດວິສາຫະກິດຕ່າງໆໄດ້ນໍາເອົາເງິນ, ອຸປະກອນທີ່ຈໍາເປັນ ແລະເຄື່ອງອຸປະໂພກ-ບໍລິໂພກ ມອບໃຫ້ອົງການປົກຄອງແຂວງເຊກອງ ເພື່ອປະກອບສ່ວນຊຸກຍູ້ວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ລວມມູນຄ່າທັງໝົດ 35 ລ້ານກວ່າກີບ.

ພິທີມອບ-ຮັບໄດ້ມີຂຶ້ນໃນວັນທີ 10 ພຶດສະພາ 2021 ທີ່ຫ້ອງວ່າການແຂວງ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງເປັນຜູ້ກ່າວຮັບ ແລະບັນດາອໍານວຍການ-ຮອງອໍານວຍການບໍລິສັດ, ຕາງໜ້າບໍລິສັດເປັນຜູ້ກ່າວມອບ ໂດຍມີທ່ານຮອງເຈົ້າແຂວງ, ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ແລະພະນັກງານວິຊາການກ່ຽວຂ້ອງເຂົ້າຮ່ວມເປັນສັກຂີພິຍານ.

ບັນດາຫົວໜ່ວຍທີ່ໃຫ້ການຊ່ວຍເຫຼືອ ແລະສະໜັບສະໜູນຄັ້ງນີ້ ປະກອບມີ ບໍລິສັດ ກາດເກ້ລາວເຊກອງ ຈໍາກັດຜູ້ດຽວມອບເງິນສົດ 20 ລ້ານກີບ; ບໍລິສັດ ຮອນດາ ສາຂາແຂວງເຊກອງມອບນໍ້າດື່ມ 100 ແກັດ, ໝີ່ໄວໆ 5 ແກັດໃຫຍ່, ໄຂ່ 50 ແຕະ, ຜ້າອັດປາກ-ອັດດັງ 5 ແກັດໃຫຍ່ລວມມູນຄ່າ 11 ລ້ານກວ່າກີບ; ບໍລິສັດ ມິດສໍາພັນກໍ່ສ້າງ ແລະສ້ອມແປງເຄຫາສະຖານ ຈໍາກັດມອບເງິນສົດ 2 ລ້ານກີບ; ບໍລິສັດ ວຽງອໍາພອນກໍ່ສ້າງ ແລະສ້ອມແປງເຄຫາສະຖານ ຈໍາກັດມອບເງິນສົດ 2 ລ້ານກີບ ແລະສານປະຊາຊົນແຂວງມອບໝີ່, ນໍ້າດື່ມ, ຜ້າອັດປາກ-ອັດດັງ, ເຈວລ້າງມື

ໃນໂອກາດນີ້ ທ່ານ ເຫຼັກໄຫຼ ສີວິໄລ ກໍໄດ້ຍົກໃຫ້ສະພາບການລະບາດຂອງພະຍາດໂຄວິດ-19 ຢູ່ ສປປ ລາວ ທີ່ສົ່ງຜົນກະທົບໂດຍກົງຕໍ່ການພັດທະນາເສດຖະກິດ, ການດໍາລົງຊີວິດ, ການທໍາມາຫາກິນຂອງພໍ່ແມ່ປະຊາຊົນ ແລະການເຄື່ອນໄຫວຂອງບັນດາຫົວໜ່ວຍທຸລະກິດ; ພ້ອມນີ້ ທ່ານເຈົ້າແຂວງກໍໄດ້ສະແດງຄວາມຂອບໃຈມາຍັງພາກສ່ວນ ທີ່ໃຫ້ການຊ່ວຍເຫຼືອເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19, ການຊ່ວຍ ເຫຼືອດັ່ງກ່າວ ແມ່ນມີຄວາມໝາຍສໍາຄັນທີ່ສຸດ ເຊິ່ງໃນນາມຕາງໜ້າອົງການປົກຄອງແຂວງໃຫ້ສັນຍາວ່າ: ຈະນໍາໃຊ້ເຄື່ອງຊ່ວຍເຫຼືອດັ່ງກ່າວ ເຂົ້າໃນການເຄື່ອນໄຫວວຽກງານໃຫ້ມີປະສິດທິພາບ, ປະສິດທິຜົນ ແລະເກີດປະໂຫຍດສູງສຸດຕໍ່ວຽກງານ.