ມີເດຍລາວແຂວງຄຳມ່ວນ ວັນທີ 10 ພຶດສະພາ 2021 ທ່ານ ປ.ອ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ໄດ້ໂອ້ລົມຕໍ່ວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ. ໂດຍມີການນຳຂອງພະແນກ, ບັນດາຄະນະຂະແໜງການ, ກອງວິຊາການອ້ອມຂ້າງ ຕະຫລອດເຖິງພະນັກງານຫລັກແຫລ່ງພາຍໃນພະແນກ ຖວທ ແຂວງເຂົ້າຮ່ວມຮັບຟັງ.

ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ກໍ່ໄດ້ລາຍງານສະພາບການຈັດຕັ້ງປະຕິບັດວຽກງານໃນຂົງເຂດ ຖວທ ໃນໄລຍະຜ່ານມາ ໂດຍສະເພາະແມ່ນການສຸມໃສ່ໂຄສະນາໃຫ້ແກ່ວຽກງານການຄວບຄຸມ, ປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ-19. ເຊິ່ງພະແນກ ຖວທ ແມ່ນໄດ້ເຮັດໜ້າທີ່ໃນການໂຄສະນາບັນດາມາດຕະການ, ຄຳສັ່ງຕ່າງໆທີ່ຂັ້ນເທິງວາງອອກ ຜ່ານທາງສື່ໂທລະພາບ, ໜັງສືພິມ, ສື່ວິທະຍຸຂອງແຂວງ, ຂອງເມືອງ ແລະ ຜ່ານລະບົບໂທລະໂຄ່ງຂັ້ນບ້ານ, ໄດ້ມີການເຄື່ອນໄຫວຕິດຕາມການນຳຂອງແຂວງ, ຂອງເມືອງ ທີ່ລົງຊຸກຍູ້ບັນດາເມືອງ, ບ້ານ ຕໍ່ວຽກງານການປ້ອງກັນການແຜ່ລະບາດຂອງພະຍາດ ໂຄວິດ-19 ຢ່າງເປັນປົກກະຕິ, ໄດ້ຜະລິດສະປອດ ເພື່ອໂຄສະນາເຖິງຜົນຮ້າຍ ແລະ ໄພອັນຕະລາຍຂອງພະຍາດ ໂຄວິດ-19 ພ້ອມທັງຖືເອົາວຽກງານດັ່ງກ່າວແຊກຊ້ອນເຂົ້າໃນແຕ່ລະລາຍການຂອງສະຖານີວິທະຍຸຂອງແຂວງ ເພື່ອໂຄສະນາໃຫ້ພໍ່ແມ່ປະຊານຊົນໄດ້ຮັບຮູ້ຢ່າງກວ້າງຂວາງ ແນໃສ່ເຮັດໃຫ້ເຂົາເຈົ້າເອົາໃຈໃສ່ຈັດຕັ້ງປະຕິບັດບັນດາມາດຕະການຕ່າງໆ ທີ່ຂັ້ນເທິງວາງອອກຢ່າງເຂັ້ມງວດ.

ໂອກາດດຽວກັນທ່ານຮອງເຈົ້າແຂວງຄຳມ່ວນ ກໍ່ໄດ້ໂອ້ລົມ ເຊິ່ງທ່ານໄດ້ເນັ້ນໃຫ້ຄະນະນຳຂົງເຂດ ຖວທ ຈົ່ງໄດ້ປັບປຸງທາງດ້ານແບບແຜນວິທີການເຮັດວຽກໃຫ້ມີຄວາມໜັກແໜ້ນ, ຖືກຕ້ອງ ແລະ ສອດຄ່ອງ ເຊິ່ງແມ່ນບັນຫາທີ່ສຳຄັນໃນການຕັດສິນບັນດາໜ້າວຽກຕ່າງໃຫ້ບັນລຸຕາມຄາດໝາຍ, ສືບຕໍ່ປັບປຸງດ້ານບຸກຄະລາກອນ, ມີການຊັບຊ້ອນ, ຈັດວາງບຸກຄະລາກອນທີ່ມີຄວາມຮູ້, ຄວາມສາມາດເຂົ້າໃນແຕ່ລະວຽກງານຢ່າງເໝາະສົມ, ສືບຕໍ່ປັບປຸງເນື້ອໃນຂ່າວໃຫ້ມີຄວາມສົມບູນ, ຖືກຕ້ອງ, ຊັດເຈນ ແລະ ວ່ອງໄວ ທັນກັບສະພາບການຕົວຈິງ, ເອົາໃຈໃສ່ປະສານງານກັບພາກສ່ວນທີ່ກ່ຽວຂ້ອງ ລະຫວ່າງຂັ້ນແຂວງກັບຂັ້ນສູນກາງ ແລະ ຂັ້ນແຂວງກັບຂັ້ນເມືອງ ເພື່ອເຮັດໃຫ້ຂ່າວຂອງແຂວງໄດ້ຮັບການເຜີຍແຜ່ຢ່າງປົກກະຕິ ແລະ ຕໍ່ເນື່ອງ.