ມີເດຍລາວແຂວງໄຊຍະບູລີ ຂ່າວ: ພຸດທະສອນ ເວດສະວົງ
ບໍລິສັດ ເຊິງຊ່າງ ບໍ່ແຮ່ອຸດົມໄຊ ຈຳກັດ, ບໍລິສັດເບຍລາວ ແລະ ບໍລິສັດ ເຊິນຫລົງ ກໍ່ສ້າງ ຈຳກັດຜູ້ດຽວ ໄດ້ມອບເງິນຊ່ວຍເຫລືອ ເພື່ອນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດພະຍາດຂອງໂຄວິດ 19 ໃຫ້ແກ່ແຂວງໄຊສົມບູນ ໃນວັນທີ 11 ພຶດສະພາ ນີ້ ທີ່ພະແນກ ຖວທ ແຂວງ ຕາງໜ້າກ່າວມອບໂດຍ ທ່ານ ຢ່າງຈ້ຽນ ຫົວໜ້າພາກສະໜາມ ບໍລິສັດ ເຊິງຊ່າງ ບໍ່ແຮ່ອຸດົມໄຊ ຈຳກັດ, ທ່ານ ເຊຍຢ່າງ ເຍ່ຍຈົ່ງ ຕາງໜ້າບໍລິສັດເບຍລາວ ປະຈຳແຂວງໄຊສົມບູນ, ທ່ານ ອາຫລົງ ປະທານບໍລິສັດ ເຊິນຫລົງກໍ່ສ້າງ ຈຳກັດຜູ້ດຽວ ແລະ ກ່າວຮັບໂດຍທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ຫົວໜ້າຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນແຂວງ, ມີພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພີຍານ.

ເງິນທີ່ບັນດາບໍລິສັດນຳມາມອບໃຫ້ແກ່ ແຂວງໄຊສົມບູນ ໃນຄັ້ງນີ້ ມີທັງໝົດ ຈຳນວນ 380.000.000 ກີບ ໃນນີ້ ບໍລິສັດ ເຊິງຊ່າງ ບໍ່ແຮ່ອຸດົມໄຊ ຈຳກັດ ໄດ້ມອບເງິນໃຫ້ຈຳນວນ 260.000.000 ກີບ, ບໍລິສັດເບຍລາວ ມອບເງິນຈຳນວນ 100.000.000 ກີບ ແລະ ບໍລິສັດ ເຊິນຫລົງກໍ່ສ້າງ ຈຳກັດຜູ້ດຽວ ມອບເງິນຈຳນວນ 20.000.000 ກີບ. ຊຶ່ງເປັນການປະກອບສ່ວນທີ່ສຳຄັນໃຫ້ແກ່ແຂວງໄຊສົມບູນ ເພື່ອໝູນໃຊ້ເຂົ້າໃນວຽກງານປ້ອງກັນຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ19 ພາຍໃນແຂວງໄຊສົມບູນ.
ໂອກາດນີ້ ທ່ານ ຕົ່ງມົວ ຊົວໂກ້ ກໍໄດ້ສະແດງຄວາມຮູ້ບຸນຄຸນ ແລະ ຂອບໃຈ ມາຍັງບັນດາບໍລິສັດ ທີ່ໄດ້ມີຄວາມເປັນຫ່ວງເປັນໄຍ ແລະ ໄດ້ມອບເງິນຊ່ວຍເຫລືອໃຫ້ແກ່ ແຂວງໄຊສົມບູນໃນຄັ້ນີ້ ພ້ອມທັງໃຫ້ຄຳໝັ້ນສັນຍາວ່າຈະນຳເງິນຈຳນວນນີ້ ເຂົ້າໃນວຽກງານຕ້ານ ແລະ ສະກດກັ້ນການແຜ່ລະບາດຂອງພະຍາດໂຄວິດ 19 ໃຫ້ມີປະສິດທິຜົນສູງ ເພື່ອຮັບປະກັນໃຫ້ແຂວງໄຊສົມບູນ ຫລຸດພົ້ນວິກິດນີ້ ແລະ ກ້າວເຂົ້າສູ່ສະພາບປົກກະຕິໂດຍໄວ.