ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 12 ພຶດສະພາ 2021 ການນໍາແຂວງຈໍາປາສັກ ນໍາໂດຍ ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ, ພ້ອມຄະນະ ໄດ້ວາງພວງມາລາ ສະແດງຄວາມອາໄລແດ່ດວງວິນຍານ ຂອງ ທ່ານ ພົຈວ ຄຳບຸ່ນ ເຍື່ອມລາດຊະວົງ ອະດີດຄະນະພັກກະຊວງປ້ອງກັນປະເທດ, ອະດີດຫົວໜ້າກອງພົນທະຫານຮາບທີ V, ອະດີດປະທານສະຫະພັນນັກຮົບເກົ່າ ແຂວງຈຳປາສັກ ທີ່ໄດ້ເຖິງແກ່ກຳ ໃນວັນທີ 10 ພຶດສະພາ 2021, ຍ້ອນໂລກປະຈຳຕົວຂອງທ່ານເອງ.

ຄະນະພັກ-ອົງການປົກຄອງແຂວງຈໍາປາສັກ ສຸດທີ່ມີຄວາມເສົ້າສະຫລົດໃຈ ດ້ວຍຄວາມອາໄລ ອາວອນຢ່າງສຸດຊຶ້ງ ທີ່ໄດ້ຮັບຂ່າວເສົ້າ ຈາກຄອບຄົວ ເຍື່ອມລາດຊະວົງ, ກອງພົນທະຫານຮາບທີ 5 ແລະ ອົງການຈັດຕັ້ງສະຫະພັນນັກຮົບເກົ່າ ແຂວງຈຳປາສັກ, ເພື່ອຈາລຶກຄຸນງາມຄວາມດີຂອງທ່ານ ພົຈວ ຄຳບຸ່ນ ເຍື່ອມລາດຊະວົງ ທີ່ໄດ້ອຸທິດຕົນຕໍ່ປະເທດຊາດ ແລະ ການປະຕິວັດ ດ້ວຍຄວາມອາໄລ ອາວອນຢ່າງສຸດຊຶ່ງ ຕໍ່ ສະຫາຍ; ຄະນະພັກ- ອົງການປົກຄອງ ແຂວງຈໍາປາສັກ ນໍາໂດຍທ່ານ ວິໄລວົງ ບຸດດາຄໍາ ຕາງໜ້າໃຫ້ ອົງຄະນະພັກ-ອົງການປົກຄອງແຂວງ ແລະ ປະຊາຊົນ ບັນດາເຜົ່າຊາວແຂວງຈໍາປາສັກ ຈຶ່ງໄດ້ຮ່ວມວາງພວງມາລາ ສະແດງຄວາມອາໄລ, ຂໍໃຫ້ດວງວິນຍານຂອງທ່ານ ຈົ່ງໄປສູ່ສຸຂະຕິເຖີດ.

ປະຈຸບັນ, ສົບຂອງທ່ານ ແມ່ນບຳເພັນກຸສົນໄວ້ທີ່ເຮືອນຂອງເພີ່ນເອງ ຢູ່ບ້ານ ພູສຳລີ ເມືອງ ໂພນທອງ ແຂວງຈຳປາສັກ, ສ່ວນວັນຊາປະນະກິດສົບ ກົງກັບວັນເສົາ ວັນທີ 15 ພຶດສະພາ 2021, ເວລາ 13:30 ໂມງ.