ມີເດຍລາວແຂວງບໍ່ແກ້ວ ວັນທີ 12 ພຶດສະພາ 2021ນີ້ ທີມງານຊ່ຽວຊານການແພດຈີນທີ່ຈະມາຊ່ວຍແກ້ໄຂ ແລະ ສະກັດກັ້ນຕ້ານໂຄວິດ-19 ຢູ່ແຂວງບໍ່ແກ້ວ ໄດ້ພົບປະປຶກສາຫາລືກັບທີມງານວິຊາພະແນກສາທາລະນະສຸກແຂວງບໍ່ແກ້ວ ເຂົ້າຮ່ວມມີທ່ານ ດຣ ບຸນຍາເວດ ວົງຄໍາຊາວ ຫົວໜ້າພະແນກສາທາລະນະສຸກແຂວງ, ມີບັນດາພະນັກງານວິຊາການທັງສອງຝ່າຍເຂົ້າຮ່ວມ.

ໃນກອງປະຊຸມໄດ້ຮັບຟັງການລາຍງານສະພາບການແຜ່ລະບາດຢູ່ແຂວງບໍ່ແກ້ວ ແລະ ເຂດເສດຖະກິດພິເສດ 3 ຫຼ່ຽມຄໍາ. ປະຈຸບັນທົ່ວແຂວງມີຜູ້ຕິດເຊື້ອທັງໝົດ 329 ຄົນ ໃນນັ້ນ ຢູ່ເຂດເສດຖະກິດພິເສດ 3 ຫຼ່ຽມຄໍາ 284 ຄົນ ໃນນີ້ ໃນຈີນ 81 ຄົນ, ສະເພາະຢູ່ເທດສະບານແຂວງ (ເມືອງຫ້ວຍຊາຍ ມີ 40 ຄົນ ປິ່ນປົວດີ 13 ຄົນ, ຍັງ 27 ຄົນ, ເມືອງຕົ້ນເຜິ້ງ 4 ຄົນ, ເມືອງປາກທາ 1 ຄົນ) ໄດ້ສັກວັກຊິນແລ້ວ 64.800 ໂດສ, ເຂດພິເສດ 3 ຫຼ່ຽມຄໍາ 80.000 ໂດສ, ສະຖານທີ່ແຍກປ່ຽວ ຫຼື ສູນປິ່ນປົວມີ 02 ສູນຄື: ໂຮງໝໍແຂວງບໍ່ແກ້ວ, ໂຮງໝໍພາກສະໜາມ (ສະໂມສອນແຂວງ); ຕຽງປິ່ນປົວ ໂຄວິດ-19 ມີ 55 ຕຽງ (ICU COVID 5 ຕຽງ); ເຄື່ອງຊ່ວຍຫາຍໃຈມີ 02 ເຄື່ອງ, ເຄື່ອງ High flow oxygen therapy ມີ 03 ເຄື່ອງ, ເຄື່ອງ Monitoring 03 ເຄື່ອງ ແລະ ການຄຸ້ມຄອງກໍລະນີຂອງຄົນເຈັບ ແລະ ອື່ນໆ ພ້ອມນີ້ຍັງໄດ້ປຶກສາຫາລືກ່ຽວກັບການຂົນສົ່ງຄົນເຈັບແຕ່ເມືອງຫາແຂວງ, ການຕິດຕາມທໍາລາຍຂອງຜູ້ຕິດເຊື້ອ, ການລົງພາກສະໜາມ ແລະ ອື່ນໆ.