ເມືອງຫຼາ, ແຂວງອຸດົມໄຊ ກໍ່ເປັນເມືອງໜື່ງທີ່ມີກໍລະນີຕິດເຊື້ອພະຍາດໂຄວິດ-19 ແລະ ເປັນເຂດທີ່ມີຄວາມສ່ຽງໃນການດຳລົງຊີວິດຂອງປະຊາຊົນ. ດັ່ງນັ້ນ, ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ຂັ້ນເມືອງ ຈີ່ງໄດ້ອອກຄຳສັ່ງປິດການເດີນທາງລະຫວ່າງບ້ານຕໍ່ບ້ານໃນໄລຍະທີ່ມີການລະບາດ, ໂດຍອີງຕາມຄຳສັ່ງແນະນຳຂອງສູນກາງເປັນຫຼັກ ຈີ່ງເຮັດໃຫ້ການໄປ-ມາ, ຄ້າ-ຂາຍ ໄລຍະໂຄວິດ ຢຸດຊົ່ວຄາວ

ທ່ານ ຄຳທ່ຽງ ທໍ ຫົວໜ້າຫ້ອງການອຸດສາຫະກຳ ແລະ ການຄ້າເມືອງຫຼາ ໄດ້ໃຫ້ສຳພາດວ່າ: ໃນຊ່ວງທີ່ມີການລະບາດຂອງພະຍາດໂຄວິດ-19ຫ້ອງການໄດ້ອອກແຈ້ງການໄປເຖີງຄະນະຄຸ້ມຄອງຕະຫຼາດ ແລະ ປະກາດອອກທາງໂທລະໂຄ່ງ ພາຍໃນເທດສະບານເມືອງ ເພື່ອໃຫ້ຜູ້ປະກອບການໄດ້ຮັບຮູ້ ແລະ ພ້ອມກັນຈັດຕັ້ງປະຕິບັດ.

ທ່ານຍັງໄດ້ຮຽກຮ້ອງມາຍັງຫົວໜ່ວຍທຸລະກິດ, ຜູ້ປະກອບການທຸກພາກສ່ວນ ຂໍໃຫ້ເຫັນແກ່ຜົນປະໂຫຍດອັນລວມເປັນສຳຄັນ  ແລະ ຮຽກຮ້ອງໃຫ້ທຸກພາກສ່ວນພ້ອມກັນເປັນເຈົ້າການຕື່ນຕົວປະກອບສ່ວນເຂົ້າໃນການປະຕິບັດໜ້າທີ່ຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ໃຫ້ໄດ້ຄຸນນະພາບ.

ທ່ານຍັງໃຫ້ຮູ້ຕື່ມວ່າ: ຖ້າຫາກວ່າເຊື້ອພະຍາດຍັງລະບາດໄປຕື່ມອີກການສະໜອງອາຫານໃຫ້ແກ່ພໍ່ແມ່ປະຊາຊົນແມ່ນຈະບໍ່ພຽງພໍກັບຄວາມຕ້ອງການຂອງຜູ້ບໍລິໂພກ ໂດຍສະເພາະແມ່ນ ຊີ້ນງົວ, ຄວາຍ, ປາ ແລະ ອາຫານປະເພດອື່ນໆ ເພາະວ່າເມືອງຫຼາ ອາຫານສ່ວນຫຼາຍແມ່ນນຳເຂົ້າຈາກເມືອງໄຊເປັນຫຼັກ ສະນັ້ນຈີ່ງຮຽກຮ້ອງໃຫ້ປະຊາຊົນຈົ່ງໃຊ້ຈ່າຍຢ່າງປະຫຍັດ ແລະ ຫາວິທີກຸ້ມຕົນເອງໃຫ້ຫຼາຍທີ່ສຸດ.

ພາບ-ຂ່າວ: ແສງອາທິດ