ປະຈຸບັນການແຜ່ລະບາດຂອງພະຍາດໂຄວິດ-19 ຮອບ 2 (2021) ໄລຍະທີ 2 ແມ່ນແຜ່ລະບາດໃນບໍລິເວນກ້ວາງ; ດັ່ງ ນັ້ນ, ລັດຖະບານຈຶ່ງອອກຄໍາສັ່ງ ເລກທີ 15/ນຍ, ລົງວັນທີ 21.04.2021 ວ່າດ້ວຍການປິດ (Lockdown) ນະຄອນຫຼວງວຽງຈັນ (ນວ) ນັບແຕ່ວັນທີ 22.04 ຫາ ວັນທີ 05.05.2021 ແລະ ໄດ້ຂະຫຍາຍເວລາການປິດ ນວ ຕື່ມອີກຈົນເຖິງວັນທີ 20.05.2021; ສໍາລັບການລະບາດ ໄລຍະທີ 2 ມີຄວາມຮ້າຍແຮງທີ່ສຸດ, ຂະນະນີ້ມີຜູ້ເສຍຊີວິດ ຈໍານວນ 2 ຄົນ ເປັນການສູນເສຍ ທີ່ບໍ່ເຄີຍເກີດຂຶ້ນ ຢູ່ດິນແດນ ສປປ ລາວ; ດັ່ງນັ້ນ, ຜ່ານມາລັດຖະບານ, ອົງການປົກຄອງທ້ອງຖິ່ນ, ປະຊາຊົນເຮົາ ໄດ້ພ້ອມກັນຕໍ່ສູ້ຕ້ານກັບພະຍາດດັ່ງ  ກ່າວ ໂດຍໄດ້ຮັບການສະໜັບສະໜູນ, ເປັນກໍາລັງໃຈ-ກຳ​ລັງ​ວັດ​ຖຸ ແລະ ໃຫ້ການຮ່ວມມືເປັນຢ່າງດີຈາກປະຊາຊົນລາວ ລວມທັງປະ ເທດເພື່ອນມິດໃນໂລກ-ອົງການຈັດຕັ້ງສາກົນ ເຮັດໃຫ້ເຝົ້າລະວັງພະຍາດດັ່ງກ່າວ ໄດ້ຮັບຜົນດີສົມຄວນ.

ເຖິງວ່າ: ຄໍາສັ່ງປິດເມືອງໄດ້ຮັບການປະຕິບັດຢ່າງຮັບຜົນສູງກໍ່ຕາມ ແຕ່ໃນຜ່ານມາມີກຸ່ມຄົນຈໍານວນບໍ່ໜ້ອຍຍັງລະເມີດ ຕໍ່ ຄໍາສັ່ງດັ່ງກ່າວຢ່າງຈົງໃຈລະເມີດ, ມີການເປີດປະຕູເລາະລົມຊົມວິວ, ກິນເຫຼົ້າ-ກິນເບຍ, ເຮຮາປາຕີ, ຊອກຊື້ສິ່ງຂອງຕາມຊອບໃຈ; ຍິ່ງໄປກ່ວານັ້ນ, ຍັງມີຜູ້ຝ່າຝືນໃນສະຖານທີ່ກັກກັນ; ບາງຄົນທີ່ພົວພັນກັບກຸ່ມສ່ຽງພັດບໍ່ເຂົ້າກວດຫາເຊື້ອພະຍາດຢ່າງຮີບດ່ວນ; ມີການລັກລອບເຂົ້າເມືອງຕາມແມ່ນໍ້າຂອງ-ຊາຍແດນທາງບົກ; ບາງກຸ່ມຄົນຕິດເຊື້ອພະຍາດແລ້ວຍັງມີການຫຼົບລີ້, ບໍ່ຍອມເຂົ້າປິ່ນປົວ ຕາມສະຖານທີ່ສາທາລະນະສຸກ; ດັ່ງນັ້ນ, ຈຶ່ງເກີດໃຫ້ມີການແຜ່ເຊື້ອ-ຕິດເຊື້ອພະຍາດດັ່ງກ່າວຈໍານວນຫຼາຍ; ຂະນະນີ້ ຢູ່ປະເທດອ້ອມຂ້າງຈໍານວນໜຶ່ງ ເກີດມີການແຜ່ລະບາດຂອງພະຍາດໂຄວິດສາຍພັນອັງກິດ ແລະ ສາຍພັນອິນເດຍ; ດັ່ງນັ້ນ, ຈຶ່ງເລັ່ງທວງໃຫ້ປະຊາຊົນລາວຕ້ອງສຸມໃສ່ສະກັດກັ້ນ ແລະ ຕ້ານພະຍາດດັ່ງກ່າວໂດຍສະເພາະສາຍພັນອິນເດຍ ທີ່ມີຄວາມຮ້າຍກາດກ່ວາສາຍພັນອື່ນບໍ່ໃຫ້ມີການແຜ່ຜາຍຢູ່ປະເທດເຮົາຢ່າງເດັດຂາດ.

ຄະນະສະເພາະກິດ ໄດ້ລາຍງານໃນຄັ້ງວັນທີ 14.05.2021 ວ່າ: ຕົວເລກຜົນກວດວິເຄາະຫາເຊື້ອພະຍາດມີຜູ້ຕິດເຊື້ອໃໝ່ 16 ຄົນໃນນີ້ຢູ່ ນວ ມີ 1 ຄົນ ຊຶ່ງເປັນຕົວເລກຕໍ່າສຸດໆໃນການລະບາດຮອບ 2, ຢູ່ແຂວງຈໍາປາສັກ 15 ຄົນ; ມີຜູ້ຕິດເຊື້ອສະສົມ 1.498 ຄົນ; ປະຈຸບັນ, ມີຜູ້ເສຍຊິວິດສະສົມທັງໝົດ 2 ຄົນ​; ສໍາລັບ, ຜູ້ເສຍຊີວີດວັນທີ 13.05.2021 ເປັນເພດຊາຍ, ອາຍຸ 29 ປີ, ບ້ານວຽງ ຈະເລີນ, ເມືອງໄຊເສດຖາ, ນວ; ຜູ້ກ່ຽວເຂົ້າມາໂຮງໝໍສູນກາງ 103 (11.05.2021 ເວລາ 11:00 ໂມງ) ດ້ວຍອາການທີ່ເຂົ້າກັບນິຍາມ ກໍລະນີ SARI, ແພດໄດ້ປະເມີນອາການຜູ້ກ່ຽວມີອາການໜັກ ຈຶ່ງນໍາສົ່ງຜູ້ກ່ຽວເຂົ້າຫ້ອງມໍລະສຸມທັນທີ, ທັງເກັບຕົວຢ່າງກວດຊອກ ຫາເຊື້ອໃນມື້ຕໍ່ມາ ຊຶ່ງຜົນກວດພົບເຊື້ອໂຄວິດ-19, ໃນວັນທີ 13 .05.2021​ ເວລາ 15:30 ໂມງ ຜູ້ກ່ຽວເສຍຊີວິດ.

ໃນ​ໂອກາດນີ້;​ ຄະນະສະເພາະກິດ, ຮຽກຮ້ອງໃຫ້ປະຊາຊົນເອົາໃຈໃສ່ຮັກສາໄລຍະຫ່າງ,ໃສ່ຜ້າອັດປາກ-ດັງ, ລ້າງມື ດ້ວຍ ເຫຼົ້າ 75% ຫຼື ເຈວລ້າງມື; ບໍ່ໃຫ້ອອກບ້ານໃນໄລຍະມີການລະບາດພະຍາດດັ່ງກ່າວ; ໄລຍະການລະບາດພະຍາດນີ້ ຂໍໃຫ້ອອກກໍາລັງ ກາຍຢູ່ເຮືອນຂອງຕົນ; ຂໍໃຫ້ພິຈາລະນາໄຕ່ຕອງຂ່າວທາງອອນໄລໃຫ້ຖືກຕ້ອງ, ຮັບຊົມຂ່າວຈາກເເຫຼ່ງຂໍ້ມູນຂ່າວສານທີ່ເປັນທາງການ.

ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ຂັ້ນສູນກາງ ໄດ້ຖະແຫຼງຂ່າວໃນວັນທີ 04.05.2021 ບາງຕອນວ່າ:…ພາຍຫຼັງຈັດຕັ້ງປະຕິບັດຄຳສັ່ງເລກທີ 15/ນຍ ແລ້ວ, ຄະນະສະເພາະກິດ, ຄະນະພັກຂັ້ນຕ່າງໆ ນັບທັງ ສູນກາງ ແລະ ທ້ອງຖິ່ນ ລວມເຖິງປະຊາຊົນ ໄດ້ປະຕິບັດຕາມມາດຕະການດັ່ງກ່າວຢ່າງເຂັ້ມງວດ. ດັ່ງນັ້ນ, ຈຶ່ງເວົ້າໄດ້ວ່າ: “ຄໍາສັ່ງເລກ ທີ 15/ນຍ ແມ່ນມາດຕະການຈໍາເປັນທີ່ຖືກຕ້ອງ ແລະ ມີຜົນສັກສິດ”. ການຈັດຕັ້ງປະຕິບັດຄຳສັ່ງດັ່ງກ່າວ ໄດ້ຮັບຜົນສຳເລັດຢ່າງຈົບ ງາມໃນເບື້ອງຕົ້ນ ຈຶ່ງເຮັດໃຫ້ການລະບາດຂອງພະຍາດໂຄວິດທີ່ຮ້າຍແຮງ ບໍ່ເທົ່າໃດມື້ມານີ້ມີຄວາມຜ່ອນຄາຍລົງໃນລະດັບອັນແນ່ນອນ. ນີ້ແມ່ນການຮ່ວມແຮງຮ່ວມໃຈຂອງປວງຊົນ, ການຊ່ວຍເຫຼືອຂອງທົ່ວສັງຄົມ, ການສະໜັບສະໜູນຂອງປະເທດເພື່ອນມິດ, ແມ່ນການຊີ້ນຳຢ່າງແທດເຖິງໃກ້ຊິດທາງການຂອງການຈັດຕັ້ງທຸກໆຂັ້ນ ຊຶ່ງມີທັງຄະນະສະເພາະກິດຕ້ານໂຄວິດ-19.

ຄຽງຄູ່ກັບຜົນສໍາເລັດເບື້ອງຕົ້ນນັ້ນ; ຍັງເຫັນວ່າມີປະຊາຊົນ, ທະຫານ, ພະນັກງານ, ຕຳຫຼວດ ກໍ່ຄືຜູ້ປະກອບການຈຳນວນໜຶ່ງຍັງຖືເບົາ, ຍັງລະເຫຼີງຕໍ່ບັນດາມາດຕະການທີ່ວາງອອກ, ຍັງມີຄວາມສ່ຽງທີ່ຈະເຮັດໃຫ້ເຊື້ອພະຍາດແຜ່ລະບາດ; ນອກນີ້, ຢູ່ບັນດາປະເທດໃກ້ຄຽງຍັງມີການລະບາດຮ້າຍແຮງ ແລະ ມີຕົວເລກການຕິດເຊື້ອເພີ່ມຂຶ້ນເລື້ອຍໆ ຊຶ່ງອັນນີ້ກໍ່ເປັນຄວາມສ່ຽງ ທີ່ຈະກໍ່ໃຫ້ເກີດມີ ການລະບາດຄັ້ງໃໝ່ຢູ່ປະເທດພວກເຮົາ. ຍ້ອນແນວນັ້ນ, ຈຶ່ງຮຽກຮ້ອງໃຫ້ທຸກຄົນຍົກສູງສະຕິລະວັງຕົວ ແລະ ປະຕິບັດຢ່າງເຂັ້ມງວດກວ່າເກົ່າບັນດາມາດຕະການທີ່ວາງອອກ ເພື່ອຕ້ານກັບພະຍາດນີ້ ໂດຍສະເພາະເຈົ້າໜ້າທີ່ ທີ່ກ່ຽວຂ້ອງຂັ້ນຮາກຖານໃຫ້ເອົາໃຈໃສ່ລາດຕະເວນລຽບຕາມຊາຍແດນທີ່ຈະມີການຂ້າມລອຍມາເຂົ້າປະເທດຂອງພວກເຮົາແບບຜິດກົດໝາຍ.

ຢືນຢູ່ຕໍ່ໜ້າສະພາບການດັ່ງກ່າວ, ມັນໄດ້ເລັ່ງທວງໃຫ້ທຸກຄົນ ຕ້ອງຕໍ່ສູ້ຕ້ານກັບພະຍາດນີ້ ຢ່າງເດັດດ່ຽວໜຽວແໜ້ນອີຫຼີ; ພະຍາຍາມເຮັດໃຫ້ການດຳລົງຊີວິດຂອງປະຊາຊົນເຮົາຄ່ອຍໆກ້າວເຂົ້າສູ່ການດຳລົງຊີວິດແບບໃໝ່. ຂໍຮຽກຮ້ອງໃຫ້ປະຊາຊົນເຮົາ ຕ້ອງປະ ຕິບັດມາດຕະການຢ່າງເຂັ້ມງວດ; ຫັນຊີວິດການເປັນຢູ່ໃຫ້ຮັບປະກັນແກ່ການຜະລິດ, ທຸລະກິດຮັບໃຊ້ຊີວິດການເປັນຢູ່ຕາມການດຳລົງຊີວິດແບບໃໝ່, ຮັບປະກັນການຈາລະຈອນສິນຄ້າລະຫວ່າງແຂວງຕໍ່ແຂວງ; ປະຕິບັດໜ້າທີ່ໃຫ້ໄດ້ຮັບຜົນສູງຂຶ້ນ.

Medialaos MMD (ແຫຼ່ງຂໍ້ມູນຈາກ: ຣັດສະໝີ ດວງສັດຈະ)