ມີເດຍລາວແຂວງຈຳປາສັກ ຂ່າວ: ທັດຊະນະ
ພິທີມອບ-ຮັບ ການຊ່ວຍເຫຼືອ, ອຸປະກອນການແພດ ລະຫວ່າງ ແຂວງກວາງບິ່ງ ສສ ຫວຽດນາມ ໃຫ້ ແຂວງສະຫວັນນະເຂດ ແລະ ແຂວງຈຳປາສັກ ສປປ ລາວ ເພື່ອຮັບໃຊ້ ເຂົ້າໃນວຽກງານ ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ມູນຄ່າ 2 ຕື້ດົ້ງ ຫຼື ເທົ່າກັບ 842 ລ້ານກວ່າກີບ.

ພິທີດັ່ງກ່າວ, ໄດ້ຈັດຂຶ້ນໃນວັນທີ 16 ພຶດສະພາ 2021 ທີ່ຫລັກໝາຍຊາຍແດນ 528 ດ້ານສາກົນນາເພົ້າ – ຈາລໍ ແຂວງຄຳມ່ວນ, ຝ່າຍ ແຂວງກວາງບິ່ງ ສສ ຫວຽດນາມ ນຳໂດຍ ສະຫາຍ ວູ້ດ່າຍຖັງ ກຳມະການສູນກາງພັກ ເຂລາພັກແຂວງ ແຂວງກວາງບິ່ງ, ແຂວງສະຫວັນນະເຂດ ສປປ ລາວ ນຳໂດຍ ສະຫາຍ ສັນຕິພາບ ພົມວິຫານ ກຳມະການສູນກາງພັກ ເຂລາພັກແຂວງ ເຈົ້າແຂວງສະຫວັນນະເຂດ ພ້ອມຄະນະ ແລະແຂວງຈຳປາສັກ ແມ່ນນຳໂດຍ ສະຫາຍ ວິໄລວົງ ບຸດດາຄຳ ກຳມະການສູນກາງພັກ ເຂລາພັກແຂວງ ເຈົ້າແຂວງຈຳປາສັກ ມີ ຄະນະຄຸ້ມຄອງດ່ານ, ຄະນະຜູ້ແທນ , ພະແນກການທີ່ກ່ຽວຂ້ອງ ຈາກແຂວງ ກວາງບິ່ງ, ແຂວງສະຫວັນນະເຂດ ແລະ ແຂວງຈຳປາສັກ ເຂົ້າຮ່ວມ.

ໃນໂອກາດດັ່ງກ່າວ, ສະຫາຍ ວູ້ດ່າຍຖັງ ໄດ້ກ່າວຈຸດປະສົງ ແລະ ຄວາມຕັ້ງໃຈຂອງພັກ, ລັດຖະບານ ສສ ຫວຽດນາມ ເວົ້າລວມ, ເວົ້າສະເພາະ ກໍ່ຄື ຄະນະພັກ, ອົງການປົກຄອງ ແລະ ປະຊາຊົນແຂວງກວາງບິ່ງ ທີ່ເຫັນໄດ້ຄວາມສຳຄັນ ລະຫ່ວາງ ສອງປະເທດ ທີ່ມີສາຍພົວພັນອັນສະໜິດແໜ້ນ ຊ່ວຍເຫລືອເຊິ່ງກັນ ແລະ ກັນໃນຍາມທຸກຍາກ ເຖິງແມ່ນວ່າ ສສ ຫວຽດນາມ ຈະມີຜູ້ຕິດເຊື້ອພະຍາດໂຄວິດກໍ່ຕາມ ແຕ່ກໍ່ບໍ່ໄດ້ປະຖິ້ມບັນດາເພື່ອນມິດສະຫາຍ.

ໂອກາດນີ້, ສະຫາຍ ວິໄລວົງ ບຸດດາຄຳ ຕາງໜ້າໃຫ້ອົງຄະນະພັກ, ອົງການປົກຄອງ ແລະ ປະຊາຊົນ ບັນດາເຜົ່າ ຊາວແຂວງຈຳປາສັກ ສະແດງຄວາມຂອບ ແລະ ຕີລາຄາສູງ ຕໍ່ນໍ້າໃຈ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງອົງຄະນະພັກ, ອົງການປົກຄອງ ແລະ ປະຊາຊົນແຂວງ ກວາງບິ່ງ ທີ່ມີໃຫ້ແກ່ແຂວງຈຳປາສັກ ໃນຄັ້ງນີ້. ພິເສດແມ່ນການປະກອບສ່ວນຊ່ວຍ ເຫຼືອແບ່ງເບົາ ໃນຍາມປະສົບຄວາມຫຍຸ້ງຍາກລຳບາກ ແລະ ທ້າທາຍ. ເຊິ່ງປະທານໂຮຈີມິນໄດ້ສັ່ງສອນພວກເຮົາວ່າ “ຊ່ວຍເພື່ອນກໍຄືຊ່ວຍຕົນ”, ແຂວງຈໍາປາສັກ ພວກຂ້າເຈົ້າຂໍໃຫ້ຄຳໝັ້ນສັນຍາວ່າ ຈະຄຸ້ມຄອງນຳໄຊ້ອຸປະກອນ, ເຄື່ອງມືການແພດດັ່ງກ່າວ ເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ທີ່ແຂວງຈຳປາສັກ ໃຫ້ຖືກຕາມຈຸດປະສົງເປົ້າໝາຍ ແລະ ເກີດປະສິດທິຜົນສູງສຸດ ເພື່ອພື້ນຟູສະພາບເສດຖະກິດ-ສັງຄົມ ແລະ ຊິວິການເປັນຢູ່ຂອງປະຊາຊົນ ໃຫ້ກັບສູ່ສະພາບປົກກະຕິໄດ້ໂດຍໄວ.

ການຊ່ວຍເຫຼືອ, ອຸປະກອນການແພດ ທີ່ນຳມາມອບໃນຄັ້ງນີ້ ມີຜ້າອັດປາກ – ດັງ, ຊຸດແພດປ້ອງກັນ ແລະ ຄວບຄຸມພະຍາດລະບາດ, ນ້ຳຢາລ້າງມືຂ້າເຊື້ອ. ແຂວງສະຫວັນນະເຂດ ແລະ ແຂວງຈຳປາສັກ ແມ່ນໄດ້ ມູນຄ່າ ແຂວງລະ 1 ຕື້ດົ້ງ ຫຼື ເທົ່າກັບ 421 ລ້ານກວ່າກີບ