ມີເດຍລາວແຂວງຄຳມ່ວນ ກອງປະຊຸມທາງໄກ ຫຼື ( Video Conference ) ເພື່ອລາຍງານການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນຂອບເຂດທົ່ວປະເທດ ໄດ້ໄຂຂຶ້ນໃນຕອນເຊົ້າຂອງວັນທີ 17 ພຶດສະພາ 2021 ໂດຍການເປັນປະທານຂອງທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ໂດຍມີບັນດາຄະນະ ສະເພາະກິດຂັ້ນສູນກາງ, ນະຄອນຫຼວງ ແລະ ບັນດາແຂວງໃນຂອບເຂດທົ່ວປະເທດເຂົ້າຮ່ວມ. ສະເພາະແຂວງຄໍາມ່ວນ ນໍາໂດຍທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ ພ້ອມດ້ວຍບັນດາທ່ານໃນຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງເຂົ້າຮ່ວມ.

ໃນໄລຍະຂອງການດໍາເນີນກອງປະຊຸມ ຕາງໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດພະຍາດ ໂຄວິດ-19 ຂັ້ນສູນກາງ ລາຍງານການສືບຕໍ່ຈັດຕັ້ງປະຕິບັດຄຳສັ່ງສະບັບເລກທີ 15/ນຍ ລົງວັນທີ 21 ເມສາ 2021 ແລະ ບັນດາແຜນວຽກຈຸດສຸມໃນຕໍ່ໜ້າ. ນັບຕັ້ງແຕ່ວັນທີ 06 ພຶດສະພາ ຫາ 16 ພຶດສະພາ 2021 ສະພາບການລະບາດຢູ່ຫຼາຍແຂວງແມ່ນມີທ່າອ່ຽງຫຼຸດລົງ ແຕ່ຈຳນວນຜູ້ຕິດເຊື້ອຢູ່ນະຄອນຫຼວງວຽງຈັນ, ບໍ່ແກ້ວ, ສະຫວັນນະເຂດ ແລະ ຈຳປາສັກ ແມ່ນມີທ່າອ່ຽງທີ່ຍັງສູງ ຍັງມີຈຳນວນຜູ້ຕິດເຊື້ອໃນແຕ່ລະວັນ. ໃນນັ້ນ ຢູ່ແຂວງສະຫວັນນະເຂດ ແລະ ຈຳປາສັກແມ່ນເປັນຈຳນວນແຮງງານທີ່ນຳເຂົ້າ.

ມາຮອດວັນທີ 16 ພຶດສະພາ 2021 ມີຈຳນວນຜູ້ຕິດເຊື້ອສະສົມທັງໝົດທົ່ວປະເທດ 1.619 ຄົນ. ໃນນັ້ນປິ່ນປົວຫາຍດີແລ້ວ 574 ຄົນ, ຍັງນອນຕິດຕາມ ປິ່ນປົວຢູ່ໃນປະຈຸບັນ 1.115 ຄົນ ແລະ ເສຍຊີວິດ 02 ຄົນ. ໂອກາດດຽວກັນບັນດານະຄອນຫຼວງ, ແຂວງຕ່າງໆ ກໍ່ໄດ້ຜັດ ປ່ຽນກັນລາຍງານກ່ຽວກັບສະພາບການຈັດຕັ້ງປະຕິບັດ ການຄວບຄຸມ, ປ້ອງກັນ ແລະ ແກ້ໄຂການແຜ່ລະບາດ ຂອງພະຍາດ ໂຄວິດ-19 ໃນຂອບເຂດຄວາມຮັບຜິດຊອບຂອງຕົນ. ພ້ອມນີ້ທ່ານນາຍົກລັດຖະມົນຕີ ຍັງໄດ້ຊີ້ນຳ ໃຫ້ບັນດາຄະນະສະເພາະກິດຂັ້ນຕ່າງໆ ເອົາໃຈໃສ່ເມີນຄືນ ກ່ຽວກັບການຈັດຕັ້ງປະຕິບັດບັນດາມາດຕະການຕ່າງໆ ທີ່ຜ່ານມາ ເພື່ອຊອກໃຫ້ເຫັນເຖິງດ້ານດີ, ຈຸດຄ້າງຄ້າງ ແລະ ແຜນສະເໜີປັບປຸງແກ້ໄຂໃນຕໍ່ໜ້າ ພ້ອມທັງປະກອບ ຄຳຄິດເຫັນລົງເລິກຕື່ມ ໂດຍສະເພາະການຊອກຄົ້ນກໍລະນີຜູ້ຕິດເຊື້ອ, ແຜນການປິ່ນປົວຜູ້ຕິດເຊື້ອ ເພື່ອເຮັດໃຫ້ມີ ປະສິດທິຜົນສູງຂຶ້ນກວ່າເກົ່າ, ລວມເຖິງແຜນການຈັດຊື້ນ ແລະ ສັກວັກຊີນໃຫ້ແກ່ປະຊາຊົນ. ສ່ວນບັນດານະຄອນຫຼວງ, ແຂວງ ທີ່ຍັງມີກາຍແຜ່ລະບາດ ແລະ ບໍ່ມີການລະບາດແລ້ວ ຫຼັງຈາກວັນທີ 20 ພຶດສະພາ ເປັນຕົ້ນໄປ ແມ່ນຍັງຈະມີມາດຕະການລັອກດາວ ຫຼື ມາດຕະການຜ່ອນຜັນຄືແນວໃດ ໂດຍສະເພາະແມ່ນການໄປທຳມາຫາກິນ ຂອງປະຊາຊົນ, ການຜະລິດ, ການໄປມາຫາສູ່ ແລະ ອື່ນໆ.

ສຳລັບແຂວງຄຳມ່ວນ ແມ່ນຍັງສືບຕໍ່ຈຳກັດບໍລິເວນແຮງານທີ່ມາຈາກຕ່າງປະເທດ, ທຸກກໍລະນີທີ່ເຂົ້າມາຕ້ອງໄດ້ກັກກັນຈໍາກັດບໍລິເວນໃຫ້ຄົບ 14 ວັນ, ກະກຽມຄວາມພ້ອມທາງດ້ານສະຖານທີ່ເພື່ອນໍາໃຊ້ເປັນໂຮງໝໍພາກສະຫນາມເພື່ອຮອງຮັບຕໍ່ການປິ່ນປົວພະຍາດໂຄວິດ-19 ຈໍານວນ 02 ເເຫ່ງ, ສາມາດບັນຈຸໄດ້ 30໐ ຕຽງ, ໄດ້ຮັບວັກຊີນຈາກສູນກາງທັງຫມົດຈຳນວນ 71.600 ໂດສ ແລະ ໄດ້ໃຫ້ບໍລິການສັກວັກຊີນເຂັມທີ 01 ສັກໄດ້ 17.559 ຄົນ ກວມເອົາ 4,73% ແລະ ເຂັມທີ 02 ສັກໄດ້ 5.420 ຄົນ ກວມເອົາ 1,23% ຂອງປະຊາກອນໃນທົ່ວແຂວງ (ປະຊາກອນ 439.633 ຄົນ).

ປະຈຸບັນແຂວງຄຳມ່ວນມີສູນກັກກັນບໍລິເວນທັງໝົດ 07 ແຫ່ງ. ໃນນັ້ນຢູ່ຂັ້ນແຂວງ 02 ແຫ່ງ ແລະ ຂັ້ນເມືອງ 05 ແຫ່ງ, ໃນໄລຍະແຕ່ວັນທີ 01 ມັງກອນ ຫາ 16 ພຶດສະພາ ມີຈຳນວນຜູ້ເຂົ້າກັກກັນບໍລິເວນທັງໝົດ 1.479 ຄົນ. ໃນນັ້ນກັກກັນຄົບ 14 ວັນ ອອກຈາກສູນມີ 1.348 ຄົນ, ຈໍານວນກັກກັນທີ່ຍັງສືບຕໍ່ໃນທົ່ວແຂວງທັງໝົດ 131 ຄົນ, ວຽກງານຕິດຕາມຄົນເຂົ້າ-ອອກດ່ານສາກົນທັງ 02 ແຫ່ງຄື: ດ່ານສາກົນຂົວມິດຕະພາບ 3 (ຄຳມ່ວນ-ນະຄອນພະນົມ) ມີຈໍານວນ 20.863 ຄົນ. ໃນນັ້ນຄົນລາວເຂົ້າມາ 2.292 ຄົນ ແລະ ຄົນໄທເຂົ້າຜ່ານລາວ 18.571 ຄົນ (ຄົນຂັບລົດຂົນສົ່ງສິນຄ້າ), ດ່ານສາກົນນາເພົ້າ-ຈາຫຼໍ (ຄຳມ່ວນ-ກວາງບິ່ງ) ມີທັງໝົດ 40.789 ຄົນ. ໃນນັ້ນຄົນລາວເຂົ້າມາ 05 ຄົນ, ຄົນຫວຽດນາມຜ່ານເຂົ້າມາ 19.779 ຄົນ ແລະ ຄົນຫວຽດນາມຜ່ານອອກ 21.005 ຄົນ (ຄົນຂັບລົດຂົນສົ່ງສິນຄ້າ).