ມີເດຍລາວແຂວງສາລະວັນ ພາບ-ຂ່າວ: ໂສພາ​ ສໍພະໄຊ
14.5.2021ທ່ານ​ ໄຊຊະນະ​ ສີສະຫວັດ ຮອງເຈົ້າເມືອງລະຄອນເພັງ,​ຫົວໜ້າຄະນະສະເພາະກິດໂຄວິດ-19 ໄດ້ໃຫ້ສຳພາດວ່າ: ຕົວເລກຜູ້ຕິດເຊື້ອພະຍາດໂຄວິດ-19​ ຂອງເມືອງລະຄອນເພັງ ຍັງອາດຈະມີການສືບຕໍ່ເພີ້ມຂື້ນ,​ ຍ້ອນຍັງມີຜູ້ໄປຂາຍແຮງງານຢູ່ປະເທດໄທ​ ຍັງຈະສືບຕໍ່ເດີນທາງກັບບ້ານຢ່າງຕໍ່ເນື່ອງ, ປັດຈຸບັນເຊິ່ງໃນທົ່ວເມືອງມີຕົວເລກປະຊາຊົນຜູ້ຕິດເຊື້ອທີ່ເດີນທາງກັບມາຈາກປະເທດໄທແລ້ວ 12 ຄົນ,​ ເຊິ່ງໃນນັ້ນເປັນຕົວເລກຜູ້ຕິດເຊື້ອຂອງແຂວງຈຳປາສັກ 11ຄົນ, ຕົວເລກຂື້ນຢູ່ແຂວງສາລະວັນ 1 ຄົນ, ປັດຈຸບັນປິ່ນປົວຫາຍດີແລ້ວ​ 2​ຄົນ,​ ພວມກຳລັງປິ່ນປົວຢູ່ແຂວງຈຳປາສັກ 10​ ຄົນ.​

ສະນັ້ນເຊິ່ງເປັນສິ່ງທ້າທາຍຕໍ່ຄະນະສະເພາະກິດຂອງເມືອງຕ້ອງໄດ້ເພີ່ມຄວາມຮັບຜິດຊອບ,​ ໄດ້ເອົາໃຈໃນການກວດກາລາດຕະເວນຕາມບໍລິເວນຊາຍແດນລຽບຕາມແມ່ນຳ້ຂອງ,​ ເຂັ້ມງວດຈຸດກັ່ນກອງຄົນເຂົ້າ-ອອກເມືອງ, ປຸກລະດົມທົ່ວສັ່ງຄົມໃຫ້ເຂົ້າໃຈ,​ ດ້ວຍການໂຄສະນາຜ່ານສື່ສະຖານີວິທະຍຸກະຈາຍສຽງຂອງເມືອງ,​ ໂທລະໂຄງບ້ານ ແລະໜ່ວຍງານໂຄສະນາເຄື່ອນຕາມບ້ານຕ່າງໆ ໃຫ້ປະຊາຊົນຮັບຮູ້ເຖິງຄວາມອັນຕະລາຍຂອງເຊື້ອພະຍາດໂຄວິດ-19​ ແລະວິທີການປ້ອງກັນ,​ ປຸກລະດົມພະນັກງານ-ປະຊາຊົນຢູ່ໃນກຸ່ມສ່ຽງມາຊັກຢາວັກຊິນ ທີ່ເມືອງໄດ້ຮັບຢາໃນເບື້ອງຕົ້ນຈຳນວນ​5000 ກ່ວາໂດດ,​ແມ່ນໄກ້ຈະສຳເລັດແລ້ວ100%,​ ພ້ອມນັ້ນກໍ່ຍັງມີສູນກັກບໍລິເວນ 3​ຈຸດຄຶ: ສູນກັກໂຮງໝໍນ້ອຍປາກຕະພານ,​ ຈຸດບ້ານຫຼັກ90​ ແລະຈຸດແຍກປ່ຽວຢູ່ໂຮງໝໍຊຸມຊົນເມືອງລະຄອນເພັງ,​ ເຊິ່ງມີຜູ້ເຂົ້າກັກໂຕຢູ່ສູນກັກບໍລິເວນ 21 ຄົນ.​

ຈາກນັ້ນທ່ານ ໄຊຊະນະ​ ສີສະຫວັດ​ ຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມ​ ຕ້ອງໄດ້ປະກອບສ່ວນຢ່າງເປັນເຈົ້າການເຂົ້າໃນວຽກງານສະກັດກັ້ນ,​ ຄວບຄຸມ, ແກ້ໄຂການລະບາດຂອງເຊື້ອພະຍາດໂຄວິດ-19​ ຂອງ​ເມືອງລະຄອນເພັງ​ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ,​ ຮຽກຮ້ອງທົ່ວສັງຄົມບໍ່ໃຫ້ມີການລັງກຽດກັນ,​ພາຍຫຼັງທີ່ຜູ້ຕິດເຊື້ອປິ່ນປົວຫາຍດີ​ແລ້ວ, ໃຫ້ຮັກສານຳ້ໃຈຄວາມສາມະຄີເປັນປືກແຜນ,​ ຮູ້ຮັກສາມະຄີຊ່ວຍເຫຼືອເຊິ່ງກັນແລະກັນໃນຍາມວິກິດ,​ເພາະຜູ້ທີ່ປິ່ນປົວຫາຍດີກໍ່ຄືກັນກັບຄົນປົກກະຕິທົ່ວໄປ,​ ທັງນີ້ເພື່ອໃຫ້ສັງຄົມມີຄວາມສະຫງົບໂດຍພື້ນຖານ.