ມີເດຍລາວແຂວງສາລະວັນ ພາບ-ຂ່າວ: ສິດຕາ ເພັດວົງສາ
ແຂວງສາລະວັນ ໄດ້ເຂົ້າຮ່ວມກອງປະຊຸມທາງໄກ ເພື່ອປຶກສາຫາລື ກ່ຽວກັບການຈັດຕັ້ງປະຕິບັດ ຄໍາສັ່ງ 15/ນຍ ແລະ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ທົ່ວປະເທດ ໄດ້ຈັດຂື້ນໃນຕອນເຊົ້າຂອງວັນທີ 17 ພຶດສະພາ 2021 ນີ້, ຢູ່ທີ່ຫ້ອງວ່າການສໍານັກງານນາຍົກລັດຖະມົນຕີ, ໂດຍການເຂົ້າຮ່ວມເປັນປະທານຂອງທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງສາທາລະນະລັດ, ປະຊາທິປະໄຕ, ປະຊາຊົນລາວ, ມີບັນດາທ່ານລັດຖະມົນ, ຮອງລັດຖະມົນຕີ ຄະນະສະເພາະກິດປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນສູນກາງ, ຂັ້ນແຂວງ ເຂົ້າຮ່ວມ,

ກອງປະຊຸມຜູ້ເຂົ້າຮ່ວມກໍ່ໄດ້ຮັບຟັງການລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງປະຕິບັດ ຄໍາສັ່ງ 15/ນຍ ແລະ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ໃນທົ່ວປະເທດ, ສະເໜີໂດຍ ທ່ານ ດຣ ບຸນແຝງ ພຸມມະໄລສິດ ລັດຖະມົນຕີກະຊວງສາທາລະນະສຸກ, ປະຈຸບັນນີ້ສະພາບການແຜ່ລະບາດຂອງພະຍາດໂຄວິດ-19 ຢູ່ໃນປະເທດເຮົາ, ໄດ້ມີທ່າອ່ຽງຫລຸດລົງ, ແຕ່ຢູ່ໃນບາງແຂວງຍັງມີທ່າອ່ຽງຜູ້ຕິດເຊື້ອເພີ່ມຂື້ນອອກໄປໃນຊຸມຊົນ ເປັນຕົ້ນແມ່ນຢູ່ນະຄອນຫຼວງວຽງຈັນ, ບໍ່ແກ້ວ ແລະ ແຂວງຈໍາປາສັກ, ທົ່ວປະເທດມີຜູ້ຕິດເຊື້ອສະສົມທັງໝົດ 1.591 ຄົນ, ປິ່ນປົວຫາຍດີ 574 ຄົນ, ພວມປິ່ນປົວ 1.015 ຄົນ, ເສຍຊີວິດ 2 ຄົນ,

ປະຈຸບັນຄະນະສະເພາະກິດໄດ້ເຂັ້ມງວດກັ່ນຕອງຄົນເຂົ້າອອກປະເທດ ພ້ອມທັງເກັບຕົວຢ່າງ ແລະ ຈໍາກັດບໍລິເວນເປັນເວລາ 14 ວັນ, ເພື່ອຊອກຫາເຊື້ອພະຍາດ ໂຄວິດ- 19 ຈາກບຸກຄົນທີ່ນອນໃນກຸ່ມສ່ຽງ, ໃນທົ່ວປະເທດໄດ້ສັກຢາວັກຊິນໃຫ້ກຸ່ມເປົ້າໝາຍ ແລະ ປະຊາຊົນ ໄດ້ທັງໝົດ ເກືອບ 5 ແສນຄົນ, ໄດ້ຮັບການຊ່ວຍເຫຼືອຢາວັກຊິນທັງໝົດ 1 ລ້ານ 5 ແສນກ່ວາໂດສ, ມອບໃຫ້ບັນດາກະຊວງ ແລະ ແຂວງ 1 ລ້ານ 2 ແສນກ່ວາໂດສ, ປັດຈຸບັນລັດຖະບານໄດ້ເພີ່ມທະວີ, ມາດຕະການ ປິດການເຂົ້າ-ອອກປະເທດ, ແຂວງ, ເມືອງ, ບ້ານ, ກຽມພ້ອມສະຖານທີ່ປິ່ນປົວ, ອຸປະກອນການແພດ, ບຸກຄະລາກອນແພດໝໍ ແລະ ບັນຫາອື່ນໆ,

ເພື່ອຕ້ານກັບພະຍາດດັ່ງກ່າວ, ຈາກນັ້ນບັນດາແຂວງກໍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ຢູ່ໃນແຂວງລະ 2 ຄົນ, ພ້ອມທັງໄດ້ຮ່ວມກັັນປະກອບຄໍາຄິດຄໍາເຫັນ, ປຶກສາຫາລື, ເພື່ອວາງແຜນຕອບໂຕ້ກັບພະຍາດ ໂຄວິດ-19 ຢູ່ພາຍໃນປະເທດ, ກໍຄືໃນບັນດາແຂວງຕ່າງໆໃນຕໍ່ໜ້າ ຫຼັງວັນທີ 20 ພືດສະພາ 2021 ເປັນຕົ້ນໄປ, ໃຫ້ໄດ້ຮັບຜົນສູງ, ເຮັດໃຫ້ປະເທດມີຄວາມສະຫົງບ, ການດໍາລົງຊີວິດຂອງປະຊາຊົນ ໃຫ້ຄືນສູ່ສະພາບປົກກະຕິ.

ສໍາລັບພິທີເຂົ້າຮ່ວມກອງປະຊຸມທາງໄກ ຢູ່ແຂວງສາລະວັນ ແມ່ນໄດ້ຈັດຂື້ນຢູ່ທີ່ສະໂມສອນຂອງແຂວງ, ໂດຍການເຂົ້າຮ່ວມມີທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ, ມີບັນດາທ່ານຮອງເຈົ້າແຂວງ, ພ້ອມດ້ວຍຄະນະສະເພາະກິດ ຂັ້ນແຂວງ ເຂົ້າຮ່ວມ.