ມີເດຍລາວແຂວງວຽງຈັນ ພາບ ແລະ ຂ່າວ : ພ.ບົວທອງ
ໃນໄລຍະຜ່ານມາ ບໍລິສັດ ລາວສຕາໂທລະຄົມ Unitel ສາຂາ ແຂວງວຽງຈັນ ໄດ້ໃຫ້ການຊຸກຍູ້ຊ່ວຍເຫຼືອຫລາຍດ້ານ ເຊັ່ນ : ກອງປະຊຸມທາງໄກຂອງແຂວງ, ເຄື່ອງຊ່ວຍເຫຼືອ, ຊຸກຍູ້ເຄືອຂ່າຍອິນເຕີເນັດ ແລະ ອື່ນໆ.ເພື່ອເປັນການສືບຕໍ່ຊຸກຍູ້ໃຫ້ການຊ່ວຍເຫຼືອ ແຂວງ ວຽງຈັນ, ໃນມື້ນີ້ ວັນທີ 19 ພຶດສະພາ 2021, ທີ່ຫ້ອງປະຊຸມ ພະແນກສາທາລະນະສຸກ ແຂວງ ວຽງຈັນ ມີພິທີມອບ-ຮັບ ຊິມກາດ ພ້ອມດາຕາອິນເຕີເນັດ ເພື່ອນຳໃຊ້ເຂົ້າໃນວຽກງານຕອບໂຕ້ພະຍາດ ລະບາດ ພະຍາດໂຄວິດ-19 ຢູ່ແຂວງ ວຽງຈັນ.

ໃຫ້ກຽດເຂົ້າຮ່ວມ ຂອງທ່ານ ດຣ ອິນປອນ ມະນີແສງ ຮອງຫົວໜ້າ ຄະນະສະເພາະກິດ ຕ້ານ ແລະ ສະກັດກັ້ນ ພະຍາດໂຄວິດ-19 ແຂວງວຽງຈັນ, ທ່ານ ເຈິນ ຈຸງ ເຫງ່ຍ ຜູ້ອຳນວຍການ ບໍລິສັດ ລາວສະຕາ ໂທລະຄົມ Unitel ສາຂາ ແຂວງວຽງຈັນ, ມີຕາງໜ້າພະນັກງານພາຍໃນພະແນກສາທາແຂວງ, ເມືອງ ແລະ ພະນັກງານພາຍໃນ Unitel ເຂົ້າຮ່ວມ.ທ່ານ ເຈິນ ຈຸງ ເຫງ່ຍ ອຳນວຍການບໍລິສັດ ລາວສຕາໂທລະຄົມ Unitel ສາຂາແຂວງວຽງຈັນ ໄດ້ກ່າວວ່າ:
“ ສຳລັບການຊຸກຍູ້ ຊ່ວຍເຫຼືອ ໃນຄັ້ງນີ້, ກ່ອນອື່ນຂໍຍ້ອງຍໍຊົມເຊີຍ ບັນດາແພດໝໍ ໂດຍສະເພາະຜູ້ເຮັດວຽກແຖວໜ້າໃນການຕໍ່ສູ້ກັບໂລກຮ້າຍຕ່າງໆ ໃນໄລຍະຜ່ານມາກໍຄືປັດຈຸບັນ.

ພວກເຮົາ Unitel ໃນນາມບໍລິສັດທີ່ບໍລິການດ້ານເຄືອຂ່າຍສັນຍານໂທລະສັບ ແລະ ອິນເຕີເນັດ ຢູ່ແຂວງ ວຽງຈັນ ຍິນດີໃນການຊຸກຍູ້ວຽກງານ ຕ້ານ ແລະ ສະກັດກັ້ນ ການລະບາດຂອງເຊື້ອພະຍາດ ໂໂດຍສະເພາະ ພະຍາດໂຄວິດ-19 ທີ່ກໍາລັງລະບາດຢູ່ທົ່ວໂລກ ເພື່ອນຳໃຊ້ເຂົ້າໃນການສື່ສານຂອງພວກທ່ານ ໃຫ້ສະດວກ ວ່ອງໄວຍິ່ງຂື້ນ ແລະ ເປັນກຳລັງໃຈ ໃຫ້ສືບຕໍ່ເປັນກຳລັງຫຼັກໃນການຕອບໂຕ້ ແລະ ປີ່ນປົວເບິ່ງແຍງ ເພື່ອໃຫ້ປະຊາຊົນ ມີສຸຂະພາບດີ ແລະ ໃຊ້ຊີວິດຢ່າງເປັນປົກກະຕິ ”.
ເຊິ່ງພິທີ ມອບ-ຮັບ ຊິມກາດ ແລະ ດາຕາອິນເຕີເນັດຈາກບໍລິສັດ ລາວສະຕາໂທລະຄົມ Unitel ສາຂາ ແຂວງ ວຽງຈັນ ໃນຄັ້ງນີ້ ລວມມູນຄ່າທັງໝົດ 300ລ້ານກີບ ໂດຍມີ ຊິມກາດຈຳນວນ 120 ເບີ ພ້ອມນະໂຍບາຍດາຕາ 2,5GB/ມື້ ແລະ ໂທຟຣີ 50 ນາທີ/ມື້ ພາຍໃນເຄືອຂ່າຍ, ໄລຍະເວລາ 8 ເດືອນ (ເດືອນ5-12/2021).

ທ່ານ ດຣ ອິນປອນ ມະນີແສງ ຮອງຫົວໜ້າຄະນະສະເພາະກິດ ຕ້ານໂຄວິດ-19 ແຂວງວຽງຈັນ ໄດ້ສະແດງຄວາມຂອບໃຈ ຕໍ່ກັບການຊ່ວຍເຫຼືອໃນຄັ້ງນີ້.
“ ພວກເຮົາຈະສົ່ງຕໍ່ການຊ່ວຍເຫຼືອນີ້ໃຫ້ກັບບັນດາເມືອງ ກໍຄືທ້ອງຖີ່ນຢູ່ແຂວງ ວຽງຈັນ ນຳໃຊ້ເຂົ້າໃນການປະສານງານຂັ້ນຕ່າງໆ ເພື່ອເຝົ້າລະວັງ, ຕິດຕາມ ແລະ ຕອບໂຕ້ ຢ່າງໄວວາ ຕໍ່ກັບການລະບາດຂອງພະຍາດຕ່າງໆ ພາຍໃນແຂວງ, ເຮັດໃຫ້ວຽກງານເດີນແມ່ນແລ່ນສະດວກຍິ່ງຂື້ນ ”.
ໃນຕອນທ້າຍ ພິທີ ຍັງໄດ້ມີການມອບໃບຍ້ອງຍໍ ແລະ ມອບຊິມກາດ ໃຫ້ກັບຫ້ອງການສາທາ 4 ເມືອງທົ່ງພຽງຕື່ມອີກ.